Luka 1 - Ibayibuli Ingwalaafu

Shitsiilililwa she khuurona kamakhuuwa kano

¹ Uwelukoosi Tefilo: Babaandu bakali baakhakakho nga esi banyala khuurona ni khukhwimenielesa naabi kamakhuuwa kakolelesebwa mwiifwe.

² Baarona bibiindu bibyakholewa ni naabo babaabibona ni tsimoni tsaabwe khukhwaama makiboole, luundi nga nibo bababoolela Ilomo ya Wele.

³ Ni nashiryo, Uwelukoosi Tefilo, nga nase n'imbimenielesile naabi khukhwaama shimantsamantsa, shambonekhele nga shilayi khukhuronela iwe bulayi nga ni bilondekhana.

⁴ Shino ise naashikholile nio nawe wikurire ilala bwa ŋali bwe bibiindu byeesi baakhuleekela iwe.

Khukuukuula khuusaalikha khwa Yokana Umubatisa

⁵ Mu bifukhu bya Herode, umuyiinga uwe Bayudaaya, aabaawo umusaayi lisiina lyeewe bari Zekariya, nga ali uwe mwibuli lye busaayi bwa Abiya; n'umukyelema weewe abe alaangibwa bari Elisabesi, naye uwaba uwe munda ya Aroni.

⁶ Nibo boombi baaba babaandu baalayi mu moni tsa Wele, nga bakhola mu bwitsufu byoosi byeesi kamakaambila k'Omukasya kaloma.

⁷ Ne sibaaba ni babaana ta, lwekhuuba Elisabesi aba umukuumba luundi nga boombi bawangaale mu miiko.

⁸ Shifukhu shitweela, Zekariya aaba ali khu luwalo lwe khukhwakaanisa nga umusaayi mu Lisaayilo Likhulu lya Wele.

⁹ Nga ni yaba isaambo ye basaayi, Zekariya baamurobola nga bakhupa khakokha, khuutsya Mwisaayilo ly'Omukasya khukhwoosha bubaane.

¹⁰ Ulwo imbuka ni yoola iye khukhwoosha bubaane, lituuli lye babaandu baaba baloombela ibulafu.

¹¹ Malayika w'Omukasya waabonekhela Zekariya. Malayika aabonekha nga wimikhile khu luwaande lwe kumukhono kumulayi lwe shisheeso she khukhwookhelakho bubaane.

¹² Ne Zekariya nga n'amubona wesindukha, waarya naabi.

¹³ Ne malayika waamuloma ari, “Zekariya, ukharya ta, lwekhuuba Wele waawuliile khuuloomba khwoowo, n'umukyelema woowo Elisabesi alikhusaalila umwaana umusiinde, ni nawe ulimutwiikha lisiina uri Yokana.

¹⁴ Umwaana yuno alikhureerera kumwikhoyo ni khukhwikitya, ni babaandu baliikhoya lwe khusaalikha khweewe,

¹⁵ lwekhuuba aliba umuundu umukhulu mu moni tsa Wele. Nashiryo, s'akhila khunywakho iviini yoosi ta, namwe shishimeesa shoosi ta. Alitsusibwa n'Umwoyo Umukhosefu khukhwamila ilala khu khusaalikha khweewe.

¹⁶ Alikobosa bakali khu baana ba Isiraeli isi Umukasya, Wele waabwe.

¹⁷ Aliitsya iburaangisi w'Omukasya mu mwoyo ni kamaani nga Eliya n'aba, khushuusa kimyoyo kye ba paapa khukobola isi babaana baabwe, ni khushuusa ibo babaali bamiinyi bambaasile mu khumanya khwe bukwalaafu, aryo aŋoonaŋoone babaandu khukhwirekekhela khukhwiitsa khw'Omukasya.”

¹⁸ Zekariya wareeba Malayika ari, “Ne shino kane ishimanye indyeena ndi kane shikholikhe? Lwekhuuba ise ndi musakhulu, luundi n'umukyelema wase naye ali umuloosi naabi.”

¹⁹ Malayika wamwiilamo ari, “Ise indi Gabulyeli. Ise ndi umwakaanisi wa Wele, luundi narumanibwile khukhwiitsa khukanikha is'uli, ni khukhuboolela iwe Kamakhuuwa Kamalayi kano.

²⁰ Ne lwekhuuba iwe siwakhufukiilila buurume bwase bubulyoolelela khu mbuka inyene ta, kane ube wawuma, ulekhe khunyala khukanikha ta, khukhwoolesa khu shifukhu sheesi bino byoosi bilyoolelela.”

²¹ Khu mbuka iyo, babaandu baaba baliindile Zekariya, nga beyaanga lwashiina ayila imbuka indeeyi Mwisaayilo Likhulu.

²² Ne Zekariya n'arura ibulafu, walekha khunyala khukanikha isi bali ta. Baryo bamanya bari, Zekariya waboone khubonekhelwa Mwisaayilo Likhulu, lwekhuuba aba abamesela busa ni kamakhono keewe, nga s'anyala khukanikha ta.

²³ Imbuka yeewe iye khukhwakaanisa ni yawakho, Zekariya wilayo ingo weewe.

²⁴ Nga imbuka yabirirewo, umukyelema weewe Elisabesi waba shisoombo, webisa mu ntsu khumala kimyeesi kiraano.

²⁵ Elisabesi waaloma ari, “Aluno, Umukasya wanjeetile ise. Mu bifukhu bino wantsokesaane khuukana khweewe luundi wandusilekho kamaŋaanyu mu baandu.”

Malayika akuukuula khuusaalikha khwa Yesu

²⁶ Mu mweesi kwe khasesaba kwe shisoombo sha Elisabesi, Wele warumana Malayika Gabulyeli, mu shiriimba she Galilaaya shilaangibwa Nazareesi,

²⁷ isi umukhaana ulaangiwa Malyamu, abe uweliinda, luundi uwaba erengarengekhela bukhwaale khu musaani ulaangiwa Yusufu, uwe mu shikuuka sh'Omuyiinga Dawudi.

²⁸ Malayika waatsya is'ali wamuloma ari, “Lukoosi lube ni nawe! Umukasya wakhuwaambiile iwe shiisa shikali, luundi Umukasya ali ni nawe.”

²⁹ Malyamu wesindukha naabi khu lwe bilomo bya Malayika bino, luundi weyaanga naabi khuusheesa khuno sheesi khumanyisa.

³⁰ Ne Malayika wamuloma ari, “Malyamu, ukharya ta! Lwekhuuba wanyoolile tsikhabi mu moni tsa Wele.

³¹ Lola, uliba shisoombo, usaale umwaana umusiinde, ulimutwiikha lisiina uri, Yesu.

³² Niye aliba mukhulu naabi, luundi alilaangibwa ari, Umwaana wa Wele Uuli Angaaki Lukali; Umukasya Wele aliimuwa shitsoloŋo sha kuuka weewe Dawudi.

³³ Luundi aliba umuwuli uwe babetsukhulu ba Yakobo nga Umuyiinga, biilo ni biilo, ni buyiinga bweewe sibuliwawo ta.”

³⁴ Malyamu wareeba Malayika ari, “Ne shino shilinyalikha shiryeena? Lwekhuuba ise sinabatsakakho n'umuseetsa yeesi ta!”

³⁵ Malayika wamwiilamo ari, “Umwoyo Umukhosefu alikhwikhakho, ni kamaani ka Wele Uuli Angaaki Lukali kalikhufuusilisa. N'umwaana umukhosefu ulisaalikha alilaangibwa Umwaana wa Wele.

³⁶ Akhaba n'umulebe woowo Elisabesi, ali shisoombo mu buloosi bweewe, niye uwalaangiwatsaka khuuba umukuumba busa. Ari kuno nikwo kumweesi kwe khasesaba kwe shisoombo sheewe.

³⁷ Lwekhuuba imbaawo shishikhaasa Wele ta.”

³⁸ Malyamu welamo ari, “Ise ndi umwakaanisi w'Omukasya, kha shikholikhe shiryo khwiise nga n'ulomele.” Ulwo Malayika wenyukhawo, waatsya.

Malyamu akyeniyila Elisabesi

³⁹ Mu bifukhu byeene ibyo, Malyamu weŋoonaŋoona, waatsya wangu mu shiriimba shishiili muungoongo, mu shaalo shishilaangibwa Yuda.

⁴⁰ Winjila mu ntsu iya Zekariya, washeesa Elisabesi.

⁴¹ Aryo Elisabesi nga n'awulila khuusheesa khwa Malyamu, umwaana wesutaka munda mweewe, Elisabesi witsusibwa n'Umwoyo Umukhosefu.

⁴² Elisabesi waalomela angaaki mwikono likali ari, “Uli ni khabi imbiririfu mu bakhasi boosi, n'umwaana isi ulisaala ali ni khabi.

⁴³ Ni nase ifunile indyeena ikhabi yino, indi maayi w'Omukasya wase khukhwiitsa wangeniyila?

⁴⁴ Lwekhuuba nga ise n'imbuliile likono lye khuusheesa khwoowo, umwaana wesutakila muunda mwase lwe sangaalo.

⁴⁵ Nga uli n'ikhabi khuuba nga waafukiilila uri buurume bw'Omukasya bulyoolelela nga n'akhulomela.”

Malyamu abuyila Wele

⁴⁶ Malyamu waaloma ari, “Kumwoyo kwase kuruuya Umukasya,

⁴⁷ ni kumwoyo kwase kwekhoyeele mu Wele umuwonesi wase,

⁴⁸ lwekhuuba Wele wakhebuliile ise, waboone umwakaanisi weewe uwe aasi, lwekhuuba khukhwaama ni shaleelo, babaandu be kimiboolo ni kimiboolo, kane banaangatsake bari uwe tsikhabi,

⁴⁹ lwekhuuba umunyali wa byoosi wakholele ise bibiindu bikhulu. Lisiina lyeewe likhosefu naabi.

⁵⁰ Ni shiisa sheewe shimalatana mu baandu boosi babamurya, khukhwaama khu muboolo mutweela khukhwoola khu kuundi.

⁵¹ Wakholile bibiindu bikhulu ni kumukhono kweewe kwe kamaani, wasalanisile ibo babaali ni byambaaso bye khukhwininisa angaaki mu myoyo kyaabwe.

⁵² Wekhisile aasi bawuli bakhulu khukhwaama khu bitsoloŋo byaabwe, ne waniinisile angaaki ibo babaali be aasi.

⁵³ Babaali ni intsala wabekusile ni bibiindu bilayi, ne bayindifu wabawoonele khuutsya nga bali busa, nga sibali ni shishiindu shoosi ta.

⁵⁴ Wayeetile umwakaanisi weewe Isiraeli, ni khulwe shiisa sheewe, wolelesile sheesi alomela bakuuka beefwe.

⁵⁵ Wakhebuliile khukhwokesa shiisa isi Iburayimu ni babetsukhulu beewe biilo ni biilo.”

⁵⁶ Malyamu wamenya ni Elisabesi khumala kimyeesi nga kitaru, lwanyuma welayo ingo weewe.

Khusaalikha khwa Yokana Umubatisa

⁵⁷ Imbuka iya Elisabesi ni yoola iye khusaala, wasaala umwaana weewe umusiinde.

⁵⁸ Babesanwa atweela ni balebe ni bawulila khu shiisa sheesi Umukasya amwokesana, bekhoyela atweela ni naye.

⁵⁹ Shifukhu she shinaane ni shoola, beetsa khukheba umwaana imbalu, luundi bakana khutwiikha umwaana tsana lisiina lya paapawe, bari Zekariya.

⁶⁰ Ne maayi weewe waaloma ari, “Taawe, lisiina lyeewe kane libe bari Yokana.”

⁶¹ Nabo bamuloma bari, “Ne mu shikuuka sheenywe imbaawo umuundu yeesi ulaangiwa lisiina ilyo ta.”

⁶² Lwanyuma bamesela paapawe nga bakana babone lisiina shiina ly'akana khutwiikha umwaana.

⁶³ Zekariya waloomba ari bamuwe libaale lye khuronakho, aryo waronakho ari, “Lisiina lyeewe bari Yokana.” Boosi belaliila busa.

⁶⁴ Lubaluba, kumunwa kwa Zekariya kwekukha, ni lulimi lweewe lwakangulukha, aryo warakikha khukanikha nga abuyila Wele.

⁶⁵ Babesanwa beewe boosi lisuno lyabawaamba, ni bilomo ibyo byafuma mu byaalo ibyo byoosi bye muungoongo tse i Yuda.

⁶⁶ Nabuli muundu yeesi uwabiwulila weyaanga nga ereeba mu mwoyo kweewe ari, “Ne umwaana yuno atsya khuba umuundu uwasaambo shiina?” Lwekhuuba shabonekhelawo shiri tsikhabi tsy'Omukasya tsaba tsili khu niye.

Kumweenya kwa Zekariya

⁶⁷ Zekariya paapa w'omwaana witsusibwa n'Umwoyo Umukhosefu, waloma bilomo bye buŋoosi bwa Wele nga aruuya ari,

⁶⁸ “Umukasya Wele wa Isiraeli abuyilisibwe, lwekhuuba wetsile khuyeeta babaandu beewe ni khubawonesa.

⁶⁹ Wakhwinyusiile ifwe umuwonesi uwe kamaani, uli umwitsukhulu w'omwakaanisi weewe Dawudi.

⁷⁰ Wele akanikhila khaale mu baŋoosi beewe bakhosefu,

⁷¹ khukhuwonesa ifwe isi basiku beefwe, ni khukhwaama mu mikhono ky'abo boosi babaakhubiiyila ifwe.

⁷² Asuubisa khukhwokesanisa shiisa sheewe isi bakuuka beefwe, ni khushebulila indakaano yeewe ikhosefu,

⁷³ khukhwoolelesa shishitsubo sheesi etsubila kuuka weefwe Iburayimu,

⁷⁴ khukhusikula ifwe khukhwaama mu mikhono kye basiku beefwe, nio khunyalise khumwisaaya nga sikhulikho ni sheesi khuurya ta,

⁷⁵ nga khuli bakhosefu luundi bakwalaafu mu moni tsa Wele bifukhu byeefwe byoosi.

⁷⁶ Ni nawe mwaana wase, ulilaangibwa umuŋoosi uwa Wele Uuli Angaaki Lukali, lwekhuuba iwe uliraangila utsye iburaangisi w'Omukasya, khu muŋoonaŋoonela tsintsila tseewe,

⁷⁷ Khuumanyisa babaandu beewe bibiwaamba khu buwonesi, bububirira mu khubeyakhila bibyoonako byaabwe.

⁷⁸ Khulwe shiisa sha Wele weefwe shikali, alikhwaburusila ifwe kumuumu kwe buwonesi khukhwaama mwikulu;

⁷⁹ kulyaburukhila ibo boosi babamenya mu shilima, ni mu shiniini she khuufwa, ni khuraangilila bikyele byeefwe khuutsya mu ntsila tse lukoosi.”

⁸⁰ Aryo umwaana watsowa, welooselamo kamaani mu mubili ni mu mwoyo. Wamenyatsaka mu mubiimbi khukhwoolesa khu shifukhu sheesi eyokesana mu lubuula isi babaandu ba Isiraeli.