Danieli 1 - Ibayibuli Ingwalaafu

Danieli ni basaale beewe

¹ Mu mwiiko kweesi Yehoyakimu aaba waamalile kimiiko kitaru nga ali umuyiinga uwa Yuda, umuyiinga Nebukaduneza uwa Babulooni ni liiye lyeewe, bebwaakala Yerusalemu, baashibotookhelela.

² Umukasya waalekha Nebukaduneza khuuwaamba umuyiinga Yehoyakimu, ni khuusuuta bibiindu abe bibyabiikhibwa mu libiikhilo lye Lisaayilo Likhulu, khuubiyila mu Babulooni. Waayila bibiindu ibyo waabira mu libiikhilo lye muntsu isi abe esaayilamo wele weewe.

³ Lwanyuma lwayo, khu shifukhu shitweela, umuyiinga Nebukaduneza waalakila uyo ufuurisa shiriifwa mu bukhulu mu baandu babaamuraambira, nga bamulaanga bari Ashipenazi, ari arobore basoleeli khukhwaama mu be muungo mw'omuyiinga uwa Yuda, ni khukhwaama muungo tsitsiindi tsye Bayudaaya.

⁴ Nga basoleeli bano bali ni khuuba baalamu buulayi, baamiliwu, be kamakhula, babaali ni buuleekele buulayi, naluundi nga bali babaanyalisa khukhwakaanisa mu lubili lw'omuyiinga. Waalakila ari babaleekele luulomo ni khuurona bye ba Babulooni.

⁵ Umuyiinga waalakila ari bali ni khuuwa basooleli bano biilyo ni bye khuunywa, khukhwaama khwiibyo byeesi niye umweene abe alya. Abe bali ni khuubawa buleekeli khuumala kimiiko kitaru, lwanyuma lwayo, batsye babe baakhulu mu buyiinga bwa Nebukaduneza.

⁶ Batweela khu babaaroborebwa mwabamo Danieli, Hananiya, Mishayeli, ni Azariya, nga boosi bali be mu shikuuka sha Yuda.

⁷ Kila umuraangirisi uyo abatwiikha kamasiina ke shi Babulooni. Danieli bari Beliteshaza, Hananiya bari Shaduraka, Mishayeli bari Meshaki, ni Azariya bari Abedinego.

⁸ Ne Danieli waakhalawo ari niye singane alye, naluundi anywe ibyo bibyaama w'omuyiinga ta, khulwekhuuba abe biitsya khumureerera bunyaalu bwe mu mwooyo. Nashiryo waaloomba umuraangirisi uyo, khuumufukiilisa niye alekhe khuulya, namwe khuunywa khu biindu ibyo ta.

⁹ Wele waakhola Ashipenazi khuuba uwe kumwooyo kumulayi isi Danieli.

¹⁰ Ne Ashipenazi waalomela Danieli ari, “Ise ndi ni khuurya, khulwekhuuba umuyiinga uwakhalawo ari mulye naluundi munywe khw'ibyo bibyaama khu shikabilo sheewe, siinga abona ari iwe s'uuli ni kamaani nga basoleeli bashoowo ta, kane antsire ise.”

¹¹ Lwanyuma Danieli waalomela umuliindi abe isi baraangirisi abo baroboore khumuliinda niye ni basheewe bataru ari,

¹² “Ni mukhuwe ifwe tsiinyanyi busa tsiimali khuulya, naluundi nga khuunywa busa kameetsi, khuumala bifukhu likhumi, mukhukhake mubone.

¹³ Lwanyuma lwe bifukhu liikhumi ibyo, mukhureere atweela ni basoleeli babaalya naluundi baanywa bibyaama khu shikabilo sh'omuyiinga, mukhulekhaase, mubone naanu ufuura ukuundi, nio akile mukhukholekho sheesi mukana.”

¹⁴ Nashiryo umuliindi waafukiilisa khuukhola sheesi Danieli aamuloomba, waabakhaka khuumala bifukhu likhumi.

¹⁵ Lwanyuma lwe bifukhu likhumi, shanyoolikhana nga Danieli ni baashe bali baakhomefu naluundi babonekha buulayi, khuuminyisa basoleeli abe babaalya naluundi baanywa ibyo abe bibyaama khu shikabilo sh'omuyiinga.

¹⁶ Nashiryo, umuliindi uyo waabalekha khuulyatsaka tsiinyanyi tsiimali, mu shifwo she khuulya ni khuunywa ibyo abe bibyaama w'omuyiinga.

¹⁷ Wele waawa basoleeli bane bano bumanyilifu ni khuumanya mu bye khukhwiyika ni kamakhula. Danieli waba ni kamakhula ke khurumbura byeesi kamarooro ni bye khubonekhelwa byoosi bimanyisa.

¹⁸ Lwanyuma lwe kimiiko kitaru abe kyeesi umuyiinga Nebukaduneza aalakila nga kyaaweelekho, umuraangirisi uyo waayila basoleeli tsana boosi mu moni tsy'omuyiinga.

¹⁹ Nga umuyiinga waamalile khuukanikha ni nabo, waashifumbula nga abe mbaawo mu baaramire boosi, uwamusangaasa nga Danieli, ni Hananiya, ni Mishayeli ni Azariya ta. Nashiryo baabawa buukhulu mu lubili lw'omuyiinga.

²⁰ Khukhwaamila abweene awo, abe buli lweesi umuyiinga abareeba khuumuwa khu makhula, abe ashinyoola nga bafuurira aleeyi kimiluundi likhumi, abo abe babaawa umuyiinga kamakhula.

²¹ Danieli weeloosela khuuba mutweela khu baraangirisi be mu lubili, khukhwoolisa kumwiiko kukuunyoowa, nga Sayiraasi wekyelile umuyiinga wa Pasiya, lwanyuma lwe khukhwoonakisa buyiinga bwa Babulooni.