Baefeso 1 - Ibayibuli Ingwalaafu

¹ Ibaluwa yino yaama isiise Paulo, umurume wa Kristo Yesu, lwe khuukana khwa Wele, nga ingibaronela inywe bakhosefu ba Wele be mu Efeso, babaali babeyikinwa mu khufukiilila Kristo Yesu.

² Bubweela ni lukoosi bibyaama isi Wele Paapa weefwe n'Umukasya Yesu Kristo, bibe khusiinywe mweesi.

Tsikhabi tsitsiili mu Kristo

³ Khakhusiime Wele luundi Paapa w'Omukasya weefwe Yesu Kristo, lwekhuuba mu butweela ni Kristo, wakhuwa ifwe ikhabi iya buli saambo iye kumwoyo niye mu shiibala she mwikulu.

⁴ Lwekhuuba akhurobola ifwe khuuba babeewe mu butweela ni Kristo, nga shiibala shishiili nakhubuumbibwa ta, nio akile khube bakhosefu, luundi babaakhalikho likoondo lyoosi mu moni tseewe ta. Mu khukana khweewe,

⁵ Wele wakhwawula ifwe khaale mu khukana ari khube babaana beewe babeene, khulwa Yesu Kristo, nga shino shikholebwa mu khusiima khweewe, ni shitsilililwa sheewe.

⁶ Shino shili shiryo nio akile ifwe khubuyile shiriifwa she bubweela bwa Wele, lwe shiwaanwa sha busa sheesi niye akhuwa ifwe khuubirira mu Mwaana weewe isi akana naabi.

⁷ Ni lwe khuufwa khw'omweeneyo, ifwe khwanyoola khuwonesebwa khu lwe kamafuki keewe nio bibyoonako byeefwe byeyakhilwa. Mu shino nimwo mumuuli buyiindifu bwe bubweela bweewe,

⁸ bweesi akhutsukhila ifwe mu makyesi koosi ni khumanya.

⁹ Wele akhumanyisa ifwe shimoonyo she khuukana khweewe, lwe khusiima khweesi aŋoonaŋoona khaale mu Kristo,

¹⁰ khukhuulitabusibwa mu bifukhu bibyeene nga byoolele, khureera bibiindu byoosi atweela; bye mwikulu nibye mu shiibala, asi e kumurwe mutweela, nga nikwo Kristo.

¹¹ Mu Kristo fweesi khwarobolewa, nga ni khwamala khukhwawulibwa khuuba babaandu beewe, nga niyaba iŋoonaŋoona yeewe khukhwaama makiboole. Khuno khwaba khuukana khweewe,

¹² ari nio ifwe khukhwanyoowa khuuba ni kumwiyikino mu Kristo, khunyale khubuyilisa shiriifwa sheewe.

¹³ Ni nanywe muryo mwenjisibwa mu Kristo nga ni mwawulila buurume bwa ŋali, niko Kamakhuuwa Kamalayi ke buwonesi bweenywe. Ni nanywe ni mwamala khufukiilila, mwareebwakho khabonelo kh'Omwoyo Umukhosefu isi Wele abalomela.

¹⁴ Umwoyo yuno niye uŋaŋasa busikha bweefwe, khukhwoolesa khu buwonesi bubweene bweesi Wele aliiwa babaandu beewe lwe shiriifwa ni lubuyi lweewe.

Khuusiima ni khuuloomba

¹⁵ Ni lwe lomo yino, khukhwaama nga ni namala khuuwulila khu khufukiilila khweenywe mu Mukasya Yesu, ni khuukana khweesi muli nakhwo isi bakhosefu ba Wele boosi,

¹⁶ ise sinayakamisakho khuusiima Wele khulweenywe ni khuubashebulila mu khuloomba khwase ta.

¹⁷ Inoomba ndi Wele w'Omukasya weefwe Yesu Kristo, Paapa uwe shiriifwa abawe inywe Umwoyo we kamakyesi ni khubiimbulilwa, nio mumumanye niye bulayi.

¹⁸ Ise inoomba luundi ndi tsimoni tseenywe tse mu mwoyo khali tsimokele mubona buwaanga bweewe nio akile mumanye kumwiyikino kweesi abalaangila ni bukali bwe buyiindifu bwe shiriifwa sheesi abalomela inywe nga bakhosefu beewe,

¹⁹ ni butsowe bwe kamaani keewe nga ni buli bubukholela musiifwe babafukiilila. Kamaani iko musiifwe niko bunyala bweewe bwe kamaani,

²⁰ keesi araambisa nga n'alamusa Kristo mu bafu, wamwikhasa khu mukhono kweewe kumulayi mwikulu.

²¹ Ibweeneyo isi aamura niye khuufuura buuwuli bwoosi, ni buunyala, kamaani ni bukasya, nga niye ali angaaki e kamasina koosi, akhuba mu muboolo kuno kwonyene ta, ne ni mu muboolo kukwiitsa.

²² Wele waara bibiindu byoosi khuuba aasi ebikyele byeewe, waamuwa niye khuuba kumurwe kwe babaandu ba Wele babaafukiilila,

²³ nga nibo kumubili kweewe, ni bubwitsufu bweewe umweene uwitsusilisa bibiindu byoosi, oosi oosi.