Isaya 1 - Bibele ye Kenile (Catholic Edition)

¹ Buka ye i na ni litaba za Juda ni Jerusalema ze bonahalizwe ki Mulimu ku Isaya mwan'a Amozi, ka nako ya Oziasi, Jotami, Akazi ni Ezekiasi ha ne ba li malena ba Juda.

Mulimu u nyaza batu ba hae

² Muñ'a Bupilo a li, “Lifasi, ni wena lihalimu, mu teeleze ku se ni ta bulela, na, Muñ'a Bupilo. Bana be ni ikuliselize ba ni fetuhezi.

³ Likomu li ziba ya li luile, ni limbongolo li ziba ko li lisezwanga. Kono zeo ki ze sa zibiwi ki batu ba ka ba Isilaele. Ha ba utwisisi ni hanyinyani.”

⁴ Mu maibile, mina sicaba sa baezalibi, batu ba ba sinyehile, ba ba maswe! Libi za mina li mi hohela fafasi! Mu hanile Muñ'a Bupilo, Mulimu ya kenile wa Isilaele, mi mu mu fulalezi.

⁵ Kikabakalañi, ha mu nze mu ni fetuhela? Kikuli mu bata ku utwiswa hahulu butuku, nji? Isilaele, toho ya hao i tezi mañiba. Munahano ni pilu ya hao za kula.

⁶ Ha ku na silama se si iketile hande mwa mubili wa hao, ku zwa kwa toho mane ku y'o fita kwa mahutu. U tezi miupa, litombo ni mañiba. Mañiba a hao h'a si ka tapiswa kamba ku tamiwa. Ha ku si ka beiwa mulyani fateñi.

⁷ Naha ya mina i shandaukile, mi minzi ya mina i cisizwe, lotee. Balicaba ba ikungezi naha ya mina ni ku sinya lika kamukana mu nze mu talimezi.

⁸ Ku siyezi feela Jerusalema u nosi, munzi o ambekilwe ki lila, o si ka silelezwa sina sibuma sa muliti mwa simu ya likota za veine, kamba mukunda mwa simu ya sikululu.

⁹ Kabe Muñ'a Bupilo ya Maata Kaufela n'a si ka pilisa batu ba bañwi, kabe Jerusalema kaufela u sinyizwe, sina mo ne i inezi minzi ya Sodoma ni Gomora.

¹⁰ Jerusalema, babusi ni batu ba hao ba swana ni batu ba Sodoma ni Gomora. A mu teeleze s'a mi bulelela Muñ'a Bupilo. Mu utwisise s'a mi luta Mulimu wa luna.

¹¹ Muñ'a Bupilo u li, “Kana mu hupula kuli ni tokwa litabelo ze mu ni ezeza ka nako ni nako, nji? Lingu ze ni fumani ka litabelo ze mu ni ciselize li likani mane ni ku fita, mi li likani ni lisuzo la lifolofolo za mina ze nde. Ni se ni nyikilwe ki mali a lipoho ni lingu ni lipuli.

¹² Ki mañi ya mi kupile ku ni tiseza zeo kaufela ha mu t'o ni lapela? Ki mañi ya mi bulelezi kuli mu filike mwa lapa la Tempele ya ka kamukana?

¹³ Ha ni sa lata limpo za mina ze si na tuso. Ni filikanyiwa ki muunko wa litabelo za insense ze mu nze mu fa. Ha ni sa kona ku iswala ka mikiti ya mina ya moonda, mazazi a mina a pumulo, ni likopano za mina za silumeli. Kaufel'a zona li sinyiwa ki libi za mina.

¹⁴ Ni toile mikiti ya moonda ni lipumulo za mina. Ki mulwalo o ni katezi ku lwala.

¹⁵ “Ha mu nanula mazoho a mina ka tapelo, ha ni na ku mi talima. Ha ni na ku teeleza, niha mu ka lapela cwañi ni cwañi, kakuli mazoho a mina a tezi sibi.

¹⁶ Mu tape mi mu kene. Mu tuhele bumaswe kaufela bo ni bona mu nze mu bu eza. Ee, mu tuhele ku eza bumaswe.

¹⁷ Mu itute ke eza ze lukile. Mu bone kuli ku eziwa ka mulao, mu tuse ba ba nyandiswa, mu fe lindiala liswanelo za bona, mi mu sileleze limbelwa.”

¹⁸ Muñ'a Bupilo u li, “Cwale, a lu feze taba. Mu lambakani libi ze fubelu, kono ni ta mi tapisa, mu kene twaa. Matampa-tampa a mina nih'a ka ba bufubelu cwañi, mu ta ba ba basweu sina boya bwa lingu.

¹⁹ Haiba mu ni utwa, mu ta ca ze nde ze mela mwa lifasi.

²⁰ Kono haiba mu hana mi mu ni shwaula, mu ka fezwa ki lilumo. Na, Muñ'a Bupilo, ni bulezi!”

Munzi o na ni sibi

²¹ Munzi o kile wa sepahala, nako ye u s'o fetuhile sina lihule. Ku kile kwa pila mwateñi batu ba ba lukile, kono cwale ku siyezi feela babulai.

²² Jerusalema, pili n'o swana ni silivela, kono cwale ha u sa na tuso. N'o swana ni waine ye nde, kono cwale u s'o li mezi feela.

²³ Baeteleli ba hao ki bafetuheli ni balikani ba masholi. Ka nako kaufela ba amuhela limpo ni mali a ku lekwa likweta. Ha ba yemeli lindiala ku ba sileleza mwa likuta, kamba ku teeleza limbelwa ha ba biha litaba za bona.

²⁴ Cwalehe, u teeleze s'a bulela Muñ'a Bupilo ya Maata Kaufela, Mulimu wa Isilaele ya maata, u li, “Ni ta kutiseza bumaswe ku mina, lila za ka, mi ha mu sa na ku ni kataza hape.

²⁵ Ni ta talimana ni wena, Jerusalema. Ni ta ku kenisa ka mo ku kenisezwa butale, mi ni ta zwisa masila a hao kaufela.

²⁶ Ni ta ku fa baeteleli ni baelezi ba ba swana ni b'o n'o na ni bona kale. Mi cwale Jerusalema u ta bizwa munzi o kenile, munzi o sepahala.”

²⁷ Kakuli Muñ'a Bupilo u lukile, u ta pilisa Jerusalema hamoho ni mutu ufi ni ufi ya mwateñi h'a baka.

²⁸ Kono u ta pyata mañi ni mañi ya eza sibi ni ya mu fetuhela. U ta bulaya mutu kaufela ya mu kwenuhela.

²⁹ Mu ta swaba ni ku inyaza ha mu ta hupula linako zeo kaufela ze ne mu ezeza milimu ya maswaniso litabelo mwa masimu a mina a likota za oke.

³⁰ Mu ta oma sina kota ya oke ha i bata ku shwa, mu ome sina simu ye si na muselaeli.

³¹ Sina muungulwa ha u ciswa ki mulilo, kamukwaocwalo ni bona batu ba ba maata ba ta bulaiwa ki likezo za bona ze maswe, mi ha ku na ya ta kona ku hanisa sinyeho yeo.