Ezra 1 - Bibele ye Kenile (Catholic Edition)

Mulena Sirusi u laela Majuda kuli ba kute

¹ Mwa silimo sa pili Sirusi ha n'a li Mulena yo Muhulu wa Peresia, Muñ'a Bupilo a mu fa muhupulo wa kuli a ñole taelo ni ku i hasanyeza kwa batu ba ba mwa mubuso wa hae kaufela. Kwa ezahala cwalo kuli ku petahale se ne si bulezwi ki Muñ'a Bupilo ka mupolofita Jeremia. Sirusi a li,

² “Ki ye taelo ya Mulena yo Muhulu Sirusi wa Peresia. Muñ'a Bupilo, Mulimu wa lihalimu, u ni ezize mubusi wa lifasi kamukana, mi u ni file buikalabelo bwa ku mu yahela Tempele mwa Jerusalema, mwa naha ya Juda.

³ Mulimu a be ni mina, batu kaufela ba ba li ba hae. Mu swanezi ku ya kwa Jerusalema, mwa Juda, ku y'o yaha Tempele ya Muñ'a Bupilo, Mulimu wa Isilaele, ili Mulimu ya lapelwa mwa Jerusalema.

⁴ Haiba kwa batu ba hae ba ba hapilwe ku na ni ba ba bata tuso ya ku kuta, ba ba yahile ni bona ba swanezi ku ba tusa. Ba ba fe silivela, ni gauda, libyana ni limunanu ze lwala lika, hamohocwalo ni limpo za ku y'o fitisa kwa Tempele ya Mulimu ye mwa Jerusalema.”

⁵ Cwale litoho za mishiku ya masika a Juda ni Benjamine, baprisita ni Malivi, ni mutu kaufela ya n'a sisimuzwi cwalo ki Muñ'a Bupilo ba itukiseza ku funduka ni ku y'o yaha sinca Tempele ya Muñ'a Bupilo mwa Jerusalema.

⁶ Ba ba ne ba yahile ni bona kaufela ba ba tusa ka ku ba fa lika ze ñata ze cwaleka mikeke ya silivela, gauda, libyana, limunanu za ku lwalisa, ni ze ñwi za butokwa, ni limpo za ku y'o fitisa kwa Tempele.

⁷ Mulena Sirusi a ba fa mikeke ni likomoki ze ne ngilwe ki Mulena Nebukadenezare mwa Jerusalema, ni ku y'o li beya mwa tempele ya mulimu wa hae.

⁸ A li isa ku Mitiredati, nduna ya n'a babalela tutu ya bulena, mi yena a sin'o li bala, a li lumela ku Sheshibazare, mubusisi wa naha ya Juda,

⁹ ili, mikeke ya gauda ya limpo ye mashumi a malalu, mikeke ya silivela ya limpo ye sikiti si li siñwi, mikeke ye miñwi ye mashumi a mabeli ka ye supile ni ye mibeli,

¹⁰ mikeke ye minyinyani ya gauda ye mashumi a malalu, mikeke ye minyinyani ya silivela ye mianda ye mine ka ye lishumi, ni liitusiso ze ñwi ze sikiti si liñwi.

¹¹ Kaufel'a yona mikeke ya gauda ni silivela ni libyana ze ñwi cwalo ne li fita fa likiti ze ketalizoho ka mianda ye mine, ili ze ne ngilwe ki Sheshibazare ni ba bañwi ha ba zwa mwa Babilona ku kutela kwa Jerusalema.