མར་ཀུ། 1 - གློ་བ།

ཁྲུས་གསོལ་གནང་མཁན་ཡོ་ཧ་ནན་གྱིས་ཆོས་བཤད་པ།

¹ དཀོན་མཆོག་གི་སྲས་ཡེ་ཤུ་མཱ་ཤི་ཀའི་གཏམ་བཟང་འགོ་བཙུགས་པ།

² མངོན་ཤེས་མཁན་ཡེ་ཤ་ཡཱ་ཡི་དེབ་ལ་དེ་རེ་བྲིས་འོད་ད་ལགས། ལྟོས་དང་། ཁྱོའི་ལམ་གྲ་སྒྲིག་བཟོ་ཡས་ལ། ང་ངའི་བང་ཆེན་ཁྱོའི་གདོང་གདོང་ལ་བརྫངས་ང་ཡིན།

³ རི་སྟོང་ནས་འབོད་མཁན་གཅིག་གི་སྐད། གཙོ་བོ་དཀོན་མཆོག་གི་ལམ་གྲ་སྒྲིག་བྱེད། ཁོང་པ་ཡི་ཕེབས་ལམ་ཁབ་ཐད་བཟོས།

⁴ ཁྲུས་གསོལ་གནང་མཁན་ཡོ་ཧ་ནན་གྱིས་རི་སྟོང་དུ་འོངས་རེ་མི་ཀྱ་ལ་ཁྲུས་གསོལ་སྟེར་པ་ལགས། དེ་ནས་རང་གི་སྡིག་པ་སེལ་ཡས་ལ་རང་གི་སྡིག་པ་སྤངས་རེ། སེམས་སྒྱུར་ཡས་ཀྱི་ཁྲུས་གསོལ་གྱི་ཆོས་བཤད་པ་ལགས།

⁵ ཡུ་དེ་ཡཱ་ཡི་ཡུལ་གི་རི་དང་ཡེ་རུ་ཤ་ལེམ་གྱི་མི་ཀྱ་གི་རི་ཁོའི་རྩ་རུ་སོང་བ་ལགས། དེ་ནས་ཁོང་ཀྱ་རང་རང་གི་སྡིག་པ་ཀྱ་ཁས་ལེན་ཏེ་ཁོ་ནས་ཡོར་དན་གཙང་པོ་རུ་ཁྲུས་གསོལ་ལེན་པ་ལགས།

⁶ ཡོ་ཧ་ནན་སེམས་ཅན་སྣ་བོའི་སྤུའི་གོས་གོན་ད་ལགས། ཁོའི་རྐེད་པ་ལ་ཀོ་བ་ཡི་སྐ་བུ་རེལ་ལ་ལགས། དེ་ནས་ཁོ་ཨི་ལི་ཚག་ཚག་དང་རིའི་སྦྲང་རྩི་ཀྱ་ཟ་ལགས།

⁷ ཁོས་མི་ཀྱ་ལ་ཁྱབ་བསྒྲགས་བྱས་རེ་སྨྲས་བ་ལགས། ང་ལས་དབང་ཆེ་གཅིག་ངའི་གཤམ་ལ་ཕེབས་ཀྱི་ལགས། དེ་ནས་ངས་ཁོང་པ་ཡི་གདོང་དུ་པུས་མོ་བཙུགས་ཏེ་ཁོང་པ་ཡི་ཞབས་ལྷམ་གྱི་སྒྲོག་ཐག་བཀྲོལ་རིན་ཁ་ཡས་མེད།

⁸ ངས་ཁྱེད་ཀྱ་ལ་ཆུ་ཡིས་ཁྲུས་གསོལ་སྟེར་ར་ཡིན། ཡིན་ནའང་ཁོང་པ་ཡིས་ཁྱེད་ཀྱ་ལ་དམ་པའི་ཐུགས་ཉིད་ཀྱིས་ཁྲུས་གསོལ་གནང་ང་མཛད་ཀྱི་ལགས།

ཡེ་ཤུའི་ཁྲུས་གསོལ་དང་ཚོད་ལྟ།

⁹ འོ་དེ་གང་གི་ཉིན་གཅིག་ལ་ཡེ་ཤུ་ག་ལིལ་གྱི་ན་ཙ་རེད་སྨྲ་གིན་ཡུལ་ནས་ཕེབས་པ་ལགས། དེ་ནས་ཡོར་དན་གཙང་པོ་རུ་ཡོ་ཧ་ནན་ནས་ཁྲུས་གསོལ་ལེན་པ་ལགས།

¹⁰ ཆུའི་ནང་ནས་ཐོན་ལུང་མེད་ད་ལ་ཁོང་པ་ཡིས་ནམ་མཁའ་བབ་པ་དང་། དམ་པའི་ཐུགས་ཉིད་ཕུག་རོན་གྱི་གཤིས་ཀ་ལ་བབ་ཀྱིན་གོ་གཟིགས་པ་ལགས།

¹¹ དེ་ནས་ནམ་མཁའ་ནས་གསུང་སྐད་གཅིག་གོ་པ་ལགས། ཁྱོད་ངའི་བི་ཛ་དྲིན་ཅན་ཡིན། ཁྱོའི་མུ་ལ་ང་དམི་ཅིག་གི་ཉམ་མོ་དགའ་འོད།

¹² དེ་ནས་དམ་པའི་ཐུགས་ཉིད་ཀྱིས་ཁོང་པ་ལ་ལམ་སང་རི་སྟོང་ཕྱོགས་ལ་ཁྲིད་མཛད་པ་ལགས།

¹³ དེ་ནས་ཁོང་པ་འོ་དུ་རུ་ཞག་མོ་བཞི་བཅུ་ཐུག་པའི་བདུད་ཀྱི་ཚོད་ལྟ་ལ་དང་སེམས་ཅན་ཀྱ་མུ་ལ་བཞུགས་པ་ལགས། དེ་ནས་དཀོན་མཆོག་གི་བང་ཆེན་ཀྱ་ཡིས་ཁོང་པ་ལ་ཞབས་ཕྱི་ཞུས་བ་ལགས།

ཡེ་ཤུ་ཡིས་འགོ་མ་ཉེ་གནས་ཀྱ་འདམ་པ།

¹⁴ ཡོ་ཧ་ནན་བཙོན་ཁང་དུ་འདགས་ཚར་ཏེ་གཤམ་ལ། ཡེ་ཤུ་ག་ལིལ་དུ་དཀོན་མཆོག་གི་གཏམ་བཟང་གསུངས་བའི་གསུངས་བའི་ཕེབས་པ་ལགས།

¹⁵ ཁོང་པ་ཡིས་གསུངས་བ་ལགས། ད་དུས་ཚོད་སླེབས་ཚར་བ་ལགས། དེ་ནས་དཀོན་མཆོག་གི་རྒྱལ་སྲིད་ཉེ་སླེབ་འདུག། སེམས་སྒྱུར་བ་གཏོང་། དེ་ནས་གཏམ་བཟང་ལ་དད་པ་བྱེད།

¹⁶ ག་ལིལ་གྱི་རྒྱ་མཚོ་འགྲམ་ནས་ཕེབས་བའི་གང་ལ། ཡེ་ཤུ་ཡིས་སི་མོན་དང་ཁོའི་ནུ་བོ་ཨན་དྲི་ཡཱ་ཡིས་རྒྱ་མཚོ་ནང་དུ་ཉ་རས་གཡུག་གིན་གོ་གཟིགས་པ་ལགས། ཁོང་གཉིས་བོ་ཉ་པ་ལགས།

¹⁷ དེ་ནས་ཡེ་ཤུ་ཡིས་ཁོང་གཉིས་བོ་ལ་ངའི་གཤམ་པ་ལ་ཤོག ངས་ཁྱེད་ཀྱ་ལ་མིའི་ཉ་པ་འོང་ཡས་ལ་བསྐོ་ལོ་གསུངས་རེ་གསུངས་བ་ལགས།

¹⁸ དེ་ནས་ལམ་སང་ཁོང་གཉིས་བོ་ཡིས་ཉ་རས་གོ་བོར་ཏེ་ཁོང་པ་ཡི་གཤམ་པ་ལ་འབྲངས་བ་ལགས།

¹⁹ ཅི་མེ་ཧ་ལ་ཕེབས་ཏེ་ཁོང་པ་ཡིས་ཟེ་བད་དཱི་ཡི་བི་ཛ་ཡ་ཀོབ་དང་ཡོ་ཧ་ནན་ལ་གྲུ་ནང་དུ་ཉ་རས་འདུས་བསྡད་ཀྱིན་གོ་གཟིགས་པ་ལགས།

²⁰ ཁོང་པ་ཡིས་བོས་ལུང་མེད་ད་ལ་ཁོང་གཉིས་བོ་ཁོ་རི་ཨ་རྒས་ཟེ་བད་དཱི་ལ་མི་ལག་ཀྱ་མུ་ལ་གྲུ་ནང་དུ་བོར་ཏེ། ཁོང་པ་ཡི་གཤམ་ལ་འབྲངས་བ་ལགས།

གནོད་པ་འཛུལ་ཛ་མི་གཅིག

²¹ ཡེ་ཤུ་དང་ཉེ་གནས་ཀྱ་ཀཱ་ཕར་ན་ཧུམ་དུ་ཕེབས་པ་ལགས། ངལ་གསོ་གིན་ཉིན་མ་ལ་ཁོང་པ་ཚོགས་ཁང་ནང་དུ་ཕེབས་ཏེ་ཆོས་གནང་བ་ལགས།

²² དེ་ནས་ཆོས་ཁྲིམས་ཀྱི་སློབ་དཔོན་ཀྱ་ཅོག་རེ་མིན་ད། ཁོང་པ་ཡིས་དམི་ཅིག་གི་དབང་ཆེ་བྱས་རེ་བསླབས་ཀྱིན་གོ་ལ། མི་མང་ཀྱ་ཁོང་པ་ཡི་ཆོས་ལ་ཧ་ལས་བ་ལགས།

²³ འོ་དེ་གང་ལ་ཁོང་ཀྱ་ཡི་ཚོགས་ཁང་དུ་གནོད་པ་འཛུལ་ཛ་མི་གཅིག་འོད་ད་ལགས། ཁོས་སྐད་བརྒྱབ་པ་ལགས།

²⁴ ན་ཙ་རེད་ཀྱི་ཡེ་ཤུ། ཁྱེད་རང་མུ་ལ་འི་ཀི་གི་བྲེལ་བ་འོད་ད་ལགས་སེ། ཁྱེད་རང་འེ་ཀྱ་མེད་ད་ལ་མཛད་དུ་ཕེབས་པ་ཡིན་ནེ། ཁྱེད་རང་དཀོན་མཆོག་གི་དམ་པ་གོ་ལགས་སྨྲས་རེ་ངས་ངོ་ཤེས་ལི་འོད།

²⁵ ཡེ་ཤུ་ཡིས་འདི་ལ་བཀའ་བཀྱོན་གནང་བ་ལགས། ཁ་པ་སྡོད། དེ་ནས་ཁོའི་ནང་ནས་ཐོན།

²⁶ དེ་ནས་འོ་དེ་གནོད་པ་ཡིས་ཁོ་ལ་ཧ་ལ་ཚུར་ལ་སྤྲུགས་ཏེ། དམི་ཅིག་གི་ཕེ་ར་བརྒྱབ་སྟེ་ཁོ་ནས་ཐོན་ཏེ་སོང་བ་ལགས།

²⁷ ད་མི་གི་རི་ཧ་ལས་རེ་གཅིག་གིས་གཅིག་ལ་དྲིས་བ་ལགས། འདི་གི་ལེ། འདི་ནི་དབང་ཆ་འོད་ཀྱིན་ཆོས་ལུགས་གསར་པ་གཅིག་ཡིན་ད་རགས། ཁོས་གནོད་པ་ཀྱ་ལའང་བཀའ་གནང་བའི། དེ་ནས་གནོད་པ་ཀྱ་ཁོའི་ཁ་ལ་མཉན་འདིག།

²⁸ དེ་ནས་ཡེ་ཤུ་ཡིས་དེ་ལབ་ཀྱ་ག་ལིལ་གྱི་ཡུལ་ཕྱོགས་གི་རི་ལ་ཨུ་ཀུ་ར་གཅིག་ལ་ཁྱབ་པ་ལགས།

ཡེ་ཤུ་ཡིས་ནད་པ་ཀྱ་བཅོས་ག་མཛད་པ།

²⁹ ད་ཡེ་ཤུ་ལམ་སང་ཚོགས་ཁང་ནས་ཐོན་ཏེ། ཡ་ཀོབ་དང་ཡོ་ཧ་ནན་མུ་ལ། སི་མོན་དང་ཨན་དྲི་ཡཱ་ཡི་ཁང་པ་རུ་ཕེབས་པ་ལགས།

³⁰ སི་མོན་གྱི་སྐྱེས་དམན་གྱི་ཨ་མ་གོ་ཚ་བ་འཕར་ཏེ་ནད་རེ་བསྡད་འོད་ད་ལགས། དེ་ནས་མོའི་སྐོར་ལ་ཁོང་ཀྱ་ཡིས་ཡེ་ཤུ་ལ་ཞུས་བ་ལགས།

³¹ དེ་ནས་ཁོང་པ་མོའི་བོ་ལོག་ཏུ་ཕེབས་ཏེ་ལག་པ་ཟིམ་ཏེ། མོ་ལ་ཡར་ལ་བསླངས་ང་མཛད་པ་ལགས། དེ་ནས་ཚ་བ་ཡིས་མོ་ལ་བཏང་བ་ལགས། དེ་ནས་མོས་ཁོང་པ་ཀྱ་ལ་ཞབས་ཕྱི་ཞུས་བ་ལགས།

³² འོ་དེ་དགོང་མོ་ཉི་མ་ཕེབས་ཏེ་ཁོང་ཀྱ་ཡིས་ནད་པ་ཀྱ་དང་། འདྲེ་འཛུལ་ཛ་གི་རི་ལ་ཁོང་པ་རྩ་རུ་ཁྲིད་དེ་འོངས་བ་ལགས།

³³ འོ་དེ་རྒྱལ་ས་ཡི་མི་གི་རི་ཁང་པའི་སྒོ་རྩར་རུ་མུ་ལ་འཛོམས་པ་ལགས།

³⁴ ཡེ་ཤུ་ཡིས་ན་ཚ་སྣ་མི་སྣ་ཚོགས་ཀྱི་ནད་པ་ཀྱ་ལ་བཅོས་ག་མཛད་པ་ལགས། དེ་ནས་འདྲེ་དམི་ཅིག་གི་མང་ང་བཏོན་མཛད་པ་ལགས། འདྲེ་ཀྱ་ཡིས་ཁོང་པ་སུ་ཡིན་གྱིན་གོ་ངོ་ཤེས་རེ་ཁོང་པ་ཡིས་འོ་དེ་ཀྱ་ལ་ལབ་བཏང་དུ་མ་བཅུག་པ་ལགས།

ཡེ་ཤུ་ཡིས་ག་ལིལ་དུ་ཆོས་བཤད་པ།

³⁵ ནམ་ལངས་ཡས་ཨེན་ལ་རང་ཡེ་ཤུ་ཡར་ལ་བཞེངས་ཏེ། ས་དབེན་ད་གཅིག་ལ་ཕེབས་ཏེ་འོ་དུ་རུ་གསོལ་བ་བརྒྱབ་སྟེ་བཞུགས་པ་ལགས།

³⁶ སི་མོན་དང་ཁོའི་རོགས་བ་ཀྱ་ཁོང་པ་རྩ་རུ་སོང་བ་ལགས།

³⁷ དེ་ནས་ཁོང་ཀྱ་ཡིས་ཁོང་པ་ལ་མཇལ་རེ་ཞུས་བ་ལགས། མི་གི་རི་ནི་ཁོང་པ་བཙལ་ལི།

³⁸ དེ་ནས་ཁོང་པ་ཡིས་གསུངས་བ་ལགས། འོ་རང་ཀྱ་ཡུལ་ཉེ་ཀྱ་ལ་འགྲོ། འོ་དེ་རུའང་ང་གཏམ་བཟང་བཤད་དགོས་གུ་ལགས། གི་བྱས་རེ་སྨྲ་ན་དེའི་ཕྱིར་ལ་རང་ང་འོངས་བ་ཡིན།

³⁹ དེ་ནས་ཚོགས་ཁང་ཀྱ་ནང་དུ་ཆོས་གསུངས་བའི་གསུངས་བའི་དང་། འདྲེ་ཀྱ་བཏོན་ད་མཛད་དེ་མཛད་དེ་ཁོང་པ་ག་ལིལ་གྱི་ས་ཆ་གི་རི་དུ་ཕེབས་པ་ལགས།

ཡེ་ཤུ་ཡིས་མཛེ་ཕོག་པ་གཅིག་ལ་བཅོས་ག་མཛད་པ།

⁴⁰ མཛེ་ནད་མི་གཅིག་ཡེ་ཤུ་ཡི་གདོང་དུ་འོངས་རེ་པུས་མོ་བཙུགས་ཏེ་ཁོང་པ་ཡི་ཐུགས་ལ་འོད་ན། ཁོང་པ་ང་ལ་ན་ཚ་འདི་ནས་འདག་ཏུ་བཅུག་བ་མཛད་ཐུབ་གི་ལགས་སྨྲས་རེ་ཞུ་བ་ཕུལ་བ་ལགས།

⁴¹ སྙིང་རྗེ་རེ་ཡེ་ཤུ་ཡིས་ཕྱག་བརྐྱངས་རེ་ཁོང་ལ་འཇུས་རེ་གསུངས་བ་ལགས། ང་ཁྱོད་དྲག་ཡས་ཀྱི་འདོད་པ་འོད།

⁴² ལམ་སང་ཁོའི་མཛེ་ན་ཚ་གོ་སྟོར་པ་ལགས། དེ་ནས་ཁོ་དྲག་པ་ལགས།

^43-44 དེ་ནས་ཡེ་ཤུ་ཡིས་འདིའི་སྐོར་ལ་སུ་ལའང་གིའང་མ་སྨྲ། ཡིན་ནའང་སོང་། དེ་ནས་མཆོད་དཔོན་རྩ་རུ་ཁྱོད་རང་ལ་སྟོན། དེ་ནས་གི་རིའི་གདོང་དུ་དཔང་པོ་འོང་ཡས་ལ་མོ་ཤེའི་བཀའ་ལ་གསུངས་ཀྱིན་ཅོག་རེ་མཆོད་པ་ཕུལ་སྨྲས་རེ། ཁོ་ལ་བཀའ་ཤུགས་ཆེ་གནང་རེ་དལ་ལ་གིན་ད་མ་བྱེད་པ་འོ་དེ་ནས་ཧ་ལ་བརྫངས་བ་ལགས།

⁴⁵ ཡིན་ནའང་ཁོ་སོང་རེ་འོ་དེ་སྐོར་ལ་འོད་ལེ་རུ་བཀྲམ་ཡས་མགོ་བཙུགས་པ་ལགས། དེ་ནས་ཡེ་ཤུ་རྒྱལ་ས་དུ་ལྡབ་ལེ་མི་མང་ཀྱ་ཡིས་མཐོང་ས་ལ་ཕེབས་མ་ཐུབ་པ་ལགས། དེ་ནས་ཡེ་ཤུ་རི་སྟོང་ཕྱོགས་ལ་བཞུགས་པ་ལགས། གི་ཡིན་ནའང་མི་ཀྱ་ཕྱོགས་གི་རི་ནས་ཁོང་པ་རྩ་རུ་འོངས་བ་ལགས།།