Efeso 6 - Ecorit Aŋejuk 1969

Monyye iko Aduri Hosi

¹ Oŋyayai, ifahati esyok hatai ta afure Hobu nyo obis ana.

² “Itahabuyete monyatai iko honyatai.” Ara ana efahi etteri on owon iko ecorit on ojo,

³ “Oyyu adi jihatai bwo imanyati adi itai ifau fur.”

⁴ Bwo jihatai monyye, heitiloŋojata aduri hatai asai ati itaboloruna isi te esiŋyo bwo fe te efahita huno Hobu.

Eleittaha iko Apiti Hosi

⁵ Lapiti, oniŋyete eleittaha hatai hutta fau ta abaŋi, ta anyalami, iko te egigilo abotye ono ataji ihwa jyo Kristo.

⁶ Oŋida ibyaŋata tai igyamati ta abaŋi hoŋite wati itamunori isi. Ati igyamati ihwa apiti hulo Kristo hul ihanie’to awahan Hollum ta atajya hosi.

⁷ Igyamati te egigilo on oyyu’to to tajya hatai ihwa igyamati tai jyo Hobu obeŋ ara ta aati.

⁸ Nyo imijana tai jo obo ariŋ an ihanio atulo on oyyu ifwotu adi inyi jyo Hollum on oyyu ara dwadi bu ara inyi apit kuyya obeŋ inyi ara apit.

⁹ Bwo eleittaha, ihaniete ihwa ania jyo lapiti hatai, heitabaŋata isi ati omijana jo owon Hobu hosi iko Hobu hatai idou bwo fe obeŋ inyi igigya obo atulo.

Erremiti Huno Hollum

¹⁰ Ihwania te ettubit, ijara atajya hatai hotogolohi jyo Hobu ta adwaran iko agolon honyi.

¹¹ Iyyafana erremiti daŋ huno Hollum jo oŋida itai iremehina iŋere enyobita huno etisyahani.

¹² Obeŋ arrem hohoi ara ono ahwan ati iko anjelohyen bwo ajohin ojo edwariti huno edumele hutta fau, bwo ajohin hun orrohoji’to hutto hide.

¹³ Tania iyyafana erremiti huno Hollum daŋ jo oŋida iwotyati tai iholoŋ on ottuniere arrohoji. Bwo fe al atuhuno oduloro wotya.

¹⁴ Ihwania owotyati, bwo fe iluronia nelahode ihuluhi hatai an ara’to ihwa agas bwo fe iyyafana alibori tajya ihwa ayel isuhyara hatai.

¹⁵ Iyyafana amuha ihejek hatai hun arai ihwa asayyo huno elik tajya tania idahati tai on ogol.

¹⁶ Agalik daŋ, iduhuna neruk an ara’to ihwa abuhu itihyere awwa hun owulori huno esuswani.

¹⁷ Iyyafana etalahuna an ara’to ihwa attamu bwo fe iduhuna ekyana Hollum an ara’to afere ono Oloyiri.

¹⁸ Oduloro mojo bwo fe efiyo oŋitek daŋ ta agolon ono Oloyiri ol Olibo. Ihumata mojo oŋitek daŋ ta aati Hollum daŋ,

¹⁹ bwo toni jo oŋida isyori jihoŋ ekyanita ikyanari bwo fe ittiyeniere te eŋere asayyo hun oyiji hunya idimani.

²⁰ Te eram ana ara ni ellellahit al ifitani ta aririk. Omojoti toni, ijara ani ekyana te eŋere woŋ woŋ.

Efonya ono Esidi

^21-22 Ati nyo oŋida imijana tai eram hoŋ bwo fe aŋai ahwan hoŋ efak ni Tikiko jihatai itahutaniere erre huna daŋ. Ara inyi illaŋ al amuno ni bebe bwo fe egyamani ol oyyu’to jyo Hobu. Tania imijana adi itai aŋai ahwattek hohoi bwo ilihi adi atajya hatai.

²³ Ijara elik tajya hatawana jyo illarak iko namuno bwo neruk ono Hollum Monye iko Hobu Yesu Kristo.

²⁴ Ijara amehino hatawana jyo hulya daŋ hul omunoi Hobu hohoi Yesu Kristo ta amuno an ara’to ahode.