Efeso 5 - Ecorit Aŋejuk 1969

Adahati Ihwa Onyirok Faŋan

¹ Ijifatyete Hollum ihwa lonyirok hul omuno inyi.

² Bwo fe adahati ta amuno ihwa omuno nya Kristo hohoi ette isyo ahwan honyi tohohoi ihwa esyoryo on oŋwo’to gir gir an ara’to ehuma jyo Hollum.

³ Ati ta aroto iko erre somon kuyya adaya, helaha erre huna ojiŋani jihatai aati Hollum.

⁴ Bwo fe te eyaba hirre somon, iko ekwaraŋa bwo ecaforo, obeŋ oyyu jihatai ikyanari erre huna ati oyyu jihatai isyoryere ahumo jyo Hollum.

⁵ Oŋida imijana tai ahode ahode obeŋi adi aati hul orrohoji’to owoni iko amaji ilobye Kristo iko Hollum, isi hulo: arotoni, eyabani hirre somon, iko adayani nyo ara adayani atulo al itahabuyo erre asai.

⁶ Helaha obo atulo inyobyo itai te eyabita asai. Nyo te eyyata huna ottu eloŋojita Hollum jyo aati hul omesye’to.

⁷ Tania hedahati ikosi.

⁸ Beryen iwatta nya itai idumele ati ihwania iwatta tai ifaŋan to Hobu. Adahati ihwa lonyirok hulo afaŋan.

⁹ Nyo nayijon iko adaha on obis bwo nelahode arai isi ahaŋer faŋan.

¹⁰ Ittiyenuna erre hun itamunoi’to Hobu.

¹¹ Herryahati iko egyamita huno edumele hun obeŋi’to iko aŋer, ati italeyeuna arrohojita hosi.

¹² Nyo ara ariri ikyanari erre hun ihanie isi edimai.

¹³ Erre daŋ hun italeyeuni ta afaŋan oleye isi bwo fe ofwonni adi isi moi ratan afaŋan.

¹⁴ Te eram ana igyoroni jo, “Iye al ijoto’to ohenyu, ibuhu to ye, Bwo afaŋ adi Kristo jihoi.”

¹⁵ Ihumata mijo aŋai idahati tai. Hedahati ihwa laati hul ibuyaŋai’to ati adahati ihwa laati hul ilofyoroji’to.

¹⁶ Igyamati egyama hatai al iwanata tai iko asiruna miji nyo orrohoji oŋitek huna.

¹⁷ Tania herata abuyaŋak ati omijana awahan ono Hollum.

¹⁸ Herumati ta abalu nyo iyaŋuno abalu emanyiti hun orrohoji’to, ati ifutata to Oloyiri ol Olibo.

¹⁹ Ikyanati jyo illarak hatai ta afureta huno Davide, iko ta afureta etahabuta Hollum hun itamunoye’to inyi. Idoloti ta atajya hatai jyo Hollum.

²⁰ Isyatta ahumo jyo Hollum Monye te erre daŋ oŋitek daŋ ta afure Hobu hohoi Yesu Kristo.

Habiak iko Aŋorwo Hosi

²¹ Oniŋyete jyo illarak hatai ta abaŋanio Kristo.

²² Aŋorwo, oniŋyete habiak hatai ihwa jyo Hollum.

²³ Nyo ara habi ahou olo aŋotte ihwa an arari Kristo ahou bwo Etalahani olo eklesya an ara’to ahwan honyi.

²⁴ Ihwa on oniŋyere eklesya Kristo oŋida bwo fe aŋorwo oniŋye habiak hosi te erre daŋ.

²⁵ Alyawa, omunoti aŋorwo hatai ihwa on omunori Kristo eklesya ette isyo ahwan honyi tenyi,

²⁶ jo oŋida inyi ottunak bwo illilla ta aari iko ekyanita.

²⁷ Tania ifwotu inyi ta ahwan honyi eklesya an ilaman on obeŋ iko obo aforoi iko enyunyuriji kuyya erre ihwo huna, ati olibo inyi bwo obeŋ obo amaji on orroho.

²⁸ Inyi ania oŋida alyawa omunoi aŋorwo hosi ihwa an omunorik isi ahwattek hosi. Lya ol omuno’to ŋorwoi honyi omuno ahwan honyi.

²⁹ Nyo hobeŋ obo atulo oliwari ahwan honyi ati itaŋiyo inyi bwo fe irrirrya ahwan honyi ihwa an ihaniere Kristo jyo eklesya,

³⁰ nyo era hohoi aŋaco huno ahwan honyi.

³¹ “Te eram ana idehi adi atulo monyonyi iko honyonyi ette inosonio iko ŋorwoi honyi, tania ette isi arrihai ratan ihwa ahwan abotye.”

³² Ara ana eram on obolo’to inya idimani an ekyana ni ihwania, ekyana ni to Kristo iko eklesya.

³³ Ati itai daŋ ababo oŋida imunoti aŋorwo hatai luŋa ihwa an ara inyi ahwan hoi, bwo oŋida aŋotte abaŋ habi honyi.