Efeso 4 - Ecorit Aŋejuk 1969

Enosoni Hohoi to Oloyiri Abotye

¹ Tania ani ababus ta afure Hobu, esiŋyo ni itai jo oŋida idahati on osiru jyo eloŋo an iloŋorik itai.

² Adahati ta abyaŋan itadara, ta anyalami, ta adihan ettigemita, bwo fe odihuna illarak hatai ta namuno.

³ Oduloro itimoryo aati jo oŋida isi inosoi to Oloyiri iko nelik tajya.

⁴ Owon nahwan abotye bwo Oloyiri abotye, ihwa iloŋo Hollum hohoi jyo neyihina abotye.

⁵ Owon Hobu abotye bwo neruk abotye iko batisimo abotye,

⁶ iko Hollum Monye wati daŋ abotye, al agalik’to erre daŋ bwo fe amanya itwajin hohoi daŋ.

⁷ Isyo inyi jihohoi daŋ ababo amehino ifwotuniere esyoryo ono Kristo.

⁸ Ojori nya egyerita jo, “Inya adahari inyi ahide Orihoro inyi aati hinya ifitani, Bwo isyo inyi esyorita jyo aati.”

⁹ Lya ol odok’to ahide isuru nya inyi bwo fe litwa fau.

¹⁰ Linya isuru’to, inyi alya ol odok’to ahide idou an agalik daŋ jo oŋida inyi itufutak erre daŋ.

¹¹ Inyi alya al isyo’to jyo laati omuk aratan alefahat, omuk eyak sayyo, omuk ahetisarrak sayyo hun oyiji, omuk leyyak klesya hul ittiyenie.

¹² Ihuhumani isi aati Hollum te egyama ono alwahyo itaboloryerea hwan Kristo,

¹³ many efwonni hohoi jyo neruk abotye, bwo fe jyo amijana ono Lonyi Hollum, ette hohoi bobolororo many efut hohoi iko Kristo.

¹⁴ Tania oŋida dwo hohoi ebeŋ enyyak ratan ihwa aduri hul oniŋye ahuta ono ettiyenita wati ihwa oniŋyo aari ahuta oyyami. Oŋida hohoi ebeŋ eniŋyo enyaba iko esusuta wati hul awahi’to itipalyo hohoi.

¹⁵ Ati ijara hohoi ekyana nelahode ta amuno, tania ebolo adi hohoi te erre daŋ jyo Kristo al ara ahou hohoi.

¹⁶ Bwo fe jihonyi inosoni hohoi ihwa ahwan an inosoni iŋaco daŋ igyamari egyamita hosi gele gele ta adwaran honyi itaboloryere ahwan ta amuno.

Nesu Aŋejuk to Kristo

¹⁷ Eramak ni itai ihwania bwo elolya ni ta afure Hobu, jo oŋida itai ibyaŋata inyyahata daha ihwa paganohyen hul ijifatye egigilita hosi hun arai’to asai.

¹⁸ Iryohi egigilita hosi bwo fe opyaharai isi jyo nesu ono Hollum ta abyaŋan hosi mijana inyi iko ta adwaran tajya hosi.

¹⁹ Ta adwaran tajya hosi odulori isi ihanio erre somon iko erre daŋ hun iboti’to ta adaya.

²⁰ Ati ibyaŋata tai ittiyenuna erre huna jyo Kristo.

²¹ ?Ibyaŋata tai itaniŋuna ekyanita honyi bwo fe ibyaŋata tai ittiyenuna nelahode on owon’to jyo Yesu?

²² Oŋida ihara tai ’tuŋ emanyiti hatai hunya beryen iko amarwahi tajya hatai hun itadihoroi’to itai ihima te ewahiti hun inyobye’to.

²³ Tania ihaniete ihwania itaŋejuhyere atajya iko egigilita hatai.

²⁴ Ittata tai itarutana atajya aŋejuho hun oyyeu Hollum ta alibori iko nelahode.

²⁵ Tania iyara addi agesemita hatai bwo ikyanati nelahode jyo hutto lonyihari hatai, nyo era hohoi daŋ aŋaco huno ahwan abotye.

²⁶ Al iloŋojitati tai heyyauna ati imwarati hobeŋ oloŋ iddorro.

²⁷ Heŋatana etisyahani obo amaji jihatai.

²⁸ Ijara lya ol ohoholyo’to obeŋ inyyak hoholyo, ati ijara inyi hetegyamai obo egyama on oyyu’to ta ahas honyi jo oŋida inyi owon iko omuk erre ilwahyere alocaŋak.

²⁹ Helaha ekyanita hun orrohoji’to ofwonni to hutuhe hatai ati al iremehina tai ikyana, ikyanati ekyanita hun oyiji’to jo oŋida isi iyaŋunie amehino jyo hul itaniŋuni’to ette muno.

³⁰ Bwo fe hetejiriŋata Oloyiri ol Olibo olo Hollum nyo oridinyani inyi jihatai ihuhumaniere atajya hatai to oloŋ ono etalahuna.

³¹ Iyara addi jihatai eswati, abolori jore, eloŋojita, ehutuk, amoryo, iko aliwa.

³² Anyalamata jyo illarak hatai bwo fe omehiniete jihosi. Obusana illarak hatai ihwa inya obusaniere Hollum itai to Kristo.