Efeso 3 - Ecorit Aŋejuk 1969

Ettiyenio Paulo Paganohyen

¹ Ani Paulo, ara ni ababus to Yesu Kristo te eram hatai paganohyen.

² Ihwa itaniŋuna nya itai, isyo Hollum jihoŋ egyama ittiyeniere amehino honyi jihatai,

³ bwo fe italeyehi inyi jihoŋ eram inya idimani ihwa egyorok dwo ni jihatai.

⁴ Tania imijana adi itai jo amijak ni eram Kristo inya idimani.

⁵ Obeŋ nya bu Hollum itahutak eram ana jyo lonyirok wati hunya beryen, ati ihwania itahutak Oloyiri inyi jyo eyak sayyo iko lefahat honyi hul olibori’to.

⁶ Ara ana eram inya idimani jo inosoni hohoi Yudea iko paganohyen ahwan abotye itwa Yesu Kristo. Erutak adi hohoi ikosi bwo fe efwotu hohoi ikosi ecoriti huno Kristo ta asayyo hun oyiji’to.

⁷ Ihuhumak Hollum ani ahettiyanani sayyo bwo fe isyo jihoŋ amehino iko adwaran honyi.

⁸ Dwadi ara ni atulo al amuta ihiji wati Hollum isyo inyi jihoŋ amehino ana ittiyeniere jyo paganohyen etalahuno ono Kristo on obolo’to agalik ofyoro wati.

⁹ Bwo fe etahutak ni jyo laati daŋ awahan ono Hollum inya idimak inyi t’etteri hirre. Inyi alya al oyyeu’to erre daŋ.

¹⁰ Jo oŋida ajohin iko anjelohyen hutte dou omijani ofyoro Hollum hun agalihini’to, hun italeyehini te egyama honyi iklesya.

¹¹ Ara ana awahan honyi an onyimu nya inyi beryen ihaniere to Yesu Kristo Hobu hohoi.

¹² Ara ta neruk jihonyi an ewon hohoi iko eŋere ikyanari bwo fe ijiŋaniere jyo Hollum.

¹³ Tania ajo ni jihatai jo oŋida ibyaŋata tai ilafuhoti te ettigemita hoŋ hun adihu ni tetai, nyo arai isi akwatan jihatai.

Amijana Amuno Kristo

¹⁴ Te eram ana arigoŋ ni imojori jyo Monye,

¹⁵ al ara’to a Monye wati daŋ hutte dou iko hutta fau.

¹⁶ Ijara inyi isyo jihatai agolon tajya on odulo fur ihwa akwatan honyi. Igyama adi Oloyiri ana itajya hatai ta adwaran honyi.

¹⁷ Bwo fe amojo ni jo oŋida Kristo amanya itajya hatai ta neruk, bwo fe itagol itai ta namuno ihwa adde ’yani,

^18-19 jo oŋida imijana arabotye iko aati Hollum daŋ namuno ono Kristo an agalik’to ofyoro wati. Bwo oŋida imijana alatan iko ahodori iko abolori iko awudori ono amuno honyi. Tania ifutata adi itai iko awanan Hollum.

²⁰ Ihwania ijara akwatan hatawana jihonyi, nyo inyi alya ol oremik’to ihanio on oyyu agalik an efiyo hohoi dwadi bu an egigilo hohoi, ta adwaran honyi an igyama’to itajya hohoi.

²¹ Ijara akwatan hatawana jihonyi fur tulaŋ te etalahuna honyi eklesya to Yesu Kristo. Amen.