Yuda 1 - BONKANDA WA NZAKOMBA

¹ Yuda, bokwala owa Yesu Masiya, ko bokune owa Yakobo, elʼiyʼandetama lʼetelo, balangema ele Nzakomba Ise, ko bafongama ele Yesu Masiya:

² Isei la kuci la eefe bafule elʼinyo o mpafula.

Ncina ea bonkanda bone

³ Inyʼalangema, akiʼmʼasaka la mposa ea loncinji wete nkotelʼinyo ncina ea loiko lokisʼauma, njokamema wae nkotelʼinyo ko nkamanyʼinyo wete loswele la mposa mongo ncina ea imeezo ekaema boka bomoko wa seko ele ba-boeko.

⁴ Ele bantʼamo baolotswa la jongo wete iyʼaandemaki kalakala ndʼumbelo ene, bafomemya Nzakomba, bafaningola boya wa Nzakomba ndʼewela ea mposa eʼobe efosukame, ko banganʼende, ole nkʼende kika, Bokonji la Nkolo ekiso Yesu Masiya.

Nsisoza ea bantʼobe ba lokumo

⁵ Aeyoko ndanga ndofweyʼinyo, mpeka la lolea baoyiʼauma fombo, elengʼeki Nkolo osikolaka banto limʼese ea Ejipeto, ko ndʼafeka amelenganyakʼiyo batimeza.

⁶ Ko bikima bia loola batayala nda mpifo ekiyo mongo, lolo basundolaki boyaloʼokiyo mongo, aolaomba ndʼenyolo bia seko nda wilima, elaka nkʼetenelo eʼakambo ea mbile eʼenene.

⁷ O ngoko Sodomo la Amola, ko la benanga bekotutsi la beko, bakelaki linsamba nkʼelenge ekiyo, ko bakimanaki la mposa eʼobe ileki ndekola ifosongi, ko baolumbama la tsa ta nsisoza ko baolilama nga lotaza ja lilako seko.

⁸ Lolonde nkʼelengʼeko, bantʼane bayofite jonge ndʼalotoʼakiyo ba linyamo ko batengwela bampifo, ko basaola bajilangi.

⁹ Lolo Mikaele, ekima ea loola ea joso, akiʼndʼoswelaka la Satana, ko ikyakʼende bikoli ndʼewela ea ilaka ya Mose, ntakuseya jumbʼende lʼumbelo ea isaola, lolo akela, Nkolo akofele we lofeli.

¹⁰ Lolo bane basaola baoyi nko loswele bafʼiyʼea; ko bafitana la baoyi bakotolʼiyo elenge ea jonge, lʼelengʼele nyama isamba nkai.

¹¹ Elo elʼiyo! Ekiʼyʼocwaka nda mboka ea Kaina, ko bikumwaki la jenge ndʼoseketano wa Balama ncina ea ndako, ko bafitanaki nda bikoli bia Kola.

Lolotaka bakeli bʼobe

¹² Bane wae bako bale bafici nda bilambo bikinyo biʼeefe ea lolango, alʼiyo ndʼelambo lʼinyo; baesanyi baleyʼiyo mongo nko boangi, batute basambʼasi, batombama lʼompompo; betamba besambʼamuka ndʼekeke ea emukelo; beowa bewa befe, beoluwa lima biiji;

¹³ mpombe ya wale ya lieke jʼokwa indoza mpulo ya nsoi ikiyo mongo, bale tooci tondesesa, potopi ea wilima eoombama elʼiyo seko.

¹⁴ Koko Anoka oki owa nsambo limʼele Adama, atelakʼaoyi ndʼeloko ea bantʼane nkʼelengʼeko, aokela, Bala, Nkolo ayaki la bitukuluku bia ba-boeko bakande,

¹⁵ wete atenʼakambo ba bantʼauma, aolomolʼiyʼauma bafomemya Nzakomba ndʼewela ea beketo bekiyo beuma befeji la mmamemya ea Nzakomba, bekiʼyʼokelaka ndʼosamba wa mmamemya ea Nzakomba, ko ndʼewela ea baoyiʼauma ba bolo baki bantʼobe otangakʼende.

¹⁶ Bane bale bamemesanyi bayokine lokino, bayokime mposa ikiyo yʼobe ileki, ko bomwa bokiyo boyotefela baoyi bʼanene bʼeloloko bayosime banto ndʼewela ea nkito.

¹⁷ Lolo inyʼalangema, lofwaka baoyi baki bikima bia Nkolo ekiso Yesu Masiya otefelaka nda joso;

¹⁸ ngokiʼyʼosangelakʼinyo, Balengoli bifiela ndʼekeke ea nsukela, bakima mposa ikiyo ileki isamba mmamemya ea Nzakomba.

¹⁹ Bane wae iyʼakafolʼanto ndʼeloi, bale la mposa ea jonge, basamba Bolimo.

²⁰ Lolo inyʼalangema, lokemyakʼinyo mongo ndʼimeezo ekinyo eʼoeko mongo, loondaka nda Bolimo wʼoeko;

²¹ lesanyakʼinyo mongo ndʼeefe ea Nzakomba, lolendezakʼisei ya Nkolo ekiso Yesu Masiya nda loiko ja seko.

²² Ko bamo bandikya bikoli, lokelʼiyo isei,

²³ loikyʼamo, o nga labelʼiyo lima tsa; ko lokelʼamo isei la boangi, lina o la jino benkoto bekela baanda lima jonge.

²⁴ Aeyoko elʼende okuseya lesanyʼinyo nyango lofokunumwela, ko okuseya jilʼinyo nda joso jʼelongi ea jilangi likande, nkʼolema lʼekemo elekola,

²⁵ ele Nzakomba nkʼemoko kika, Boikyi okiso, la Yesu Masiya Nkolo ekiso, jilangi, lʼimemya, la mpamba, la mpifo, nda joso ja bikeke biuma, ko lʼaeyoko, ko la bikeke biuma seko. O ngoko.