Yoane 1 - BONKANDA WA NZAKOMBA

Yesu Nkolo limʼiango

¹ Joi liki ndʼiango, ko Joi liki la Nzakomba, ko Joi liki Nzakomba.

² Ende aki la Nzakomba ndʼiango;

³ wengi yomba yemamaki lʼende, ko lakʼende, nkʼolemʼomoko wemamaki.

⁴ Loiko loki elʼende ko loiko loki fole eʼanto;

⁵ fole eyongese nda wilima, ko wilima ntabolongʼeko.

⁶ Bontʼomo oki la lina Yoane, atomamaki limʼele Nzakomba.

⁷ Ayaki ngole bosangi wae asange nsango ea fole, ncina wae bantʼauma bimeza lʼende.

⁸ Ende ntaki fole eko, lolo ayaki losanga nsango ea fole.

⁹ Fole ea nsosolo eki eko efolaza wengiʼonto, eko eoya ndʼokili,

¹⁰ Endʼaki ndʼokili, ko bokili bolemama lʼende, lolo ba-bokili ntaboea.

¹¹ Ayaki ndʼokiliʼokae mongo, ko bakande ntaboamba.

¹² Lolo elʼiyʼandoambaki, aolakaya mpifo wae bayaleme bana ba Nzakomba wae iyʼandimeza nda lina likae.

¹³ Iyo baotswaki, afa lʼalongo, afa la wango wa jonge, ko afa la wango wʼonto, lolo baotswaki limʼele Nzakomba.

¹⁴ Ko Joi joyalema jonge, ko likokitase lʼiso, ko iso tenaki jilangi likae, wae jilangi nga liko ja bona owa likinda owʼIse, ko aokama lʼoya ko la nsosolo.

¹⁵ Yoane aosanga nsango ndʼeloko ekande, ko aosangya lofoso, akela, One alʼende okiʼmʼosangelakʼinyo, Oso oyandʼafekaʼakami, aoyala nda joso likami, ekiʼnde eko nda joso likami.

¹⁶ Isʼauma tosilʼamba lima bofulaʼokae, wete boya bokokyama ndʼoya,

¹⁷ ele Esekyelo ekaemaki la Mose, lolo boya la nsosolo bayaki la Yesu Masiya.

¹⁸ Nkʼonto ondenaki Nzakomba ekekʼemo nye; lolo Bona owa likinda, ole nda ntolo ea Ise, ende aoleanya Nzakomba.

Temoignage ea Yoane-Wini ele Yesu

¹⁹ Ene wae nsango eki Yoane osangaka. Aki Ba-Yuda lima Yelusalema otomelakʼende nkanga la Ba-Lewi wae bouole, We ole na?

²⁰ Aolimeza, ko ntangana nye, lolo aolimeza, Emi mpa Masiya.

²¹ Ko baolouola, Nkina ngoko, ole na? Wʼole Eliya? Aokela, Mpʼende. Wʼole boteli oko? Aolamba o nye.

²² Baolokela, Wʼole na? wae tokaoza iyʼatotomaki. Joi litefela we ndʼeloko eke na?

²³ Akela, Emi nde lolaka jʼontʼomo obeleza ndʼetekeleke, Locilaza mboka ea Nkolo ci, ngoki Yesaya boteli otelaka.

²⁴ Iyʼatomamaki elʼende baki limʼele Bafalusi

²⁵ ko iyo baolouola, Nkina ofa Masiya, ko ofa Eliya, ko ofa boteli oko, oyinʼanto lae?

²⁶ Yoane aolaamba, akela, Emi njinʼanto ndʼasi, omo ayemale ndʼetei ekinyo, ofʼinyʼea,

²⁷ wae ende ondielʼemi, ofʼemʼeji lotungola bekulu bia sandale ekae.

²⁸ Baoyiʼane bakela-maki nda Betania, wijʼa Yoladane, endina Yoane banto.

Bona owa Mpate owa Nzakomba

²⁹ Nda mbile ea lobi, aolena Yesu aoyʼelʼende, ko akela, Bala, Bonʼowa mpate owa Nzakomba oyimole bobe wʼokili!

³⁰ One wae endʼokiʼmʼosangaka, Ndʼafekaʼakami, bonto aoya oyalemaki nda joso likami, ekiʼnde nda joso likami.

³¹ Ko emi ncoea, lolo njoyʼinʼanto ndʼasi wae ende enya ele Yisalaele.

³² Yoane aosanga, akela, Njenaki Bolimo ayokitele, ngolʼembenga, lima loola, ko aokotamʼelʼende nkotama.

³³ Ko emi ncoea; lolo endʼontomaki wae njinʼanto ndʼasi, aonkela, Ende oe wena Bolimo ayokitele ko asilamʼelʼende, wetʼende ondinʼanto ndʼolimo wʼoeko.

³⁴ Nsolena ko nsosanga nsango wae one ale Bonʼowa Nzakomba.

Bakimi ba Yoane la Yesu

³⁵ Lenkina, nda mbile ea lobi, Yoane akemi, lʼakimiʼakae bafe,

³⁶ ayolende Yesu alandʼende, ko aokela, Bala, Bonʼowa mpate owa Nzakomba.

³⁷ Ko bakimiʼakae bafe baoloka atefelʼende, ko baokima Yesu.

³⁸ Ko Yesu aokengwana, ko aolaena bayokimʼende, ko aolakela, Ondasʼinyo na? Iyo baolokela, Labi, wae Bolaki, okitase nko?

³⁹ Endʼaolakela, Loyaka, lene. Ko iyo baocwa, ko baolena boyalo bokiʼnde, ko baokitase lʼende mbilʼeko: eki nkina jefinei.

⁴⁰ Andelo okosangi ise la Simona Petelo, aki omo owa bakʼafe bandokaki Yoane ko bakimaki Yesu.

⁴¹ Nda joso aotana Simona osangi lʼende, ko aolokela, Tolena Masiya; wae Kilisto.

⁴² Ko aoloyelʼele Yesu. Ko Yesu aoloteemeza, ko akela, We ole Simona, bonʼowa Yoane: wifotangema Kefa, wae Petelo.

⁴³ Nda mbile ea lobi Yesu alangaki lokenda nda Ngalilaya, ko aotana Filipo, ko Yesu aolokela, Yonkime.

⁴⁴ Filipo aki bosi Betesaida, bonanga wa Andelo la Petelo.

⁴⁵ Filipo aotana Nata-naele, ko aolokela, Totanʼendʼoki Mose okotaka ndʼEsekyelo, ko oki bateli otelaka, wae Yesu owa Nazaleta, bonʼowa Yosefa.

⁴⁶ Koko Natanaele aolokela, La joi jʼolotsi joya lima Nazaleta nde? Filipo aolokela, Yaka, yene.

⁴⁷ Yesu aolena Natanaele ayoyʼelʼende, ko akela, Bala Bo-Yisalaele owa nsosolo, ofa la jongo nye.

⁴⁸ Natanaele aolokela, Onjea emi lima nko? Yesu aolamba aolokela, Atafa Filipo oketa, aki we ndʼase ba botamba wa boteli, nkenaki.

⁴⁹ Natanaele aoloamba, Labi, We ole Bonʼowa Nzakomba, Roi ea Yisalaele.

⁵⁰ Yesu aolamba, aolokela, Wimeza nde ndʼewelʼekiʼmʼokosangelaka, Nkenaki ndʼase bʼotamba wa boteli? Wifena baoyi balekola bane.

⁵¹ Koko aolokela, Nsosolo, nsosolo, ndosangelʼinyo, lifena loola lokombwa, ko bikima bia Nzakomba bayounde ko bayokitele nda Bonʼowʼonto.