Toango 1 - BONKANDA WA NZAKOMBA

Bosako wʼemelo

¹ Ndʼiango Nzakomba emaki loola lʼokili.

² Ko bokili botaki lʼelenge loswele, botoswaki, ko wilima boki ndʼaliko bʼasi. Ko bolimo wa Nzakomba bokendaki ndʼaliko bʼasi.

³ Ko Nzakomba aotefela, “Kela fole eyaleme”; ko fole eoyalema.

⁴ Ko Nzakomba aolena fole wae eki bolotsi. Ko Nzakomba aokafola fole lima wilima.

⁵ Nzakomba aolila fole lina Mbile, ko aolila wilima lina Botso. Ko bokolo boki eko, ko nkesa eki eko, wae mbile ea joso.

⁶ Ko Nzakomba aotefela, “Kela etanda eyaleme ndʼetei eʼasi, kela eko ekafole ndatsʼasi lʼasi.”

⁷ Ko Nzakomba aolema etanda eko, ko aokafa basi baki ndʼase bʼetanda limʼasi baki ndʼaliko bʼetandʼeko; ko joi liko liki ngoso.

⁸ Ko Nzakomba aolila etanda eko lina Loola. Bokolʼoko la nkesa eko wae mbile eʼife.

⁹ Ko Nzakomba aotefela, “Kela basi bale ndʼase ba loola batakane nda wiji bomoko, ko kela bamoci ba kotukotu benya.” Ko joi liko liki ngoso.

¹⁰ Nzakomba aolila bamoci ba kotukotu lina Bokili, ko aotanga etakano ea basi Baeke. Ko Nzakomba aolena wae joi liko liki bolotsi.

¹¹ Nkako Nzakomba aotefela, “Kefa bokili bomele beyau la njunda icwa biofo, ko la betamba becwa bamuka bale la biofo bia bako, wengi limuka la wofo wʼelenge ea liko ndʼokili.” Ko joi liko liki ngoso.

¹² Ko bokili bomela beyau la njunda iewa biofo biʼelenge eʼomongo, ko lʼetamba becwʼamuka bale la biofo bia bilenge biʼako. Ko Nzakomba aolena wae joi liko liki bolotsi.

¹³ Bokoloʼoko la nkesa eko wae mbile eʼisato.

¹⁴ Nkako Nzakomba aotefela, “Kela bafole bayaleme ndʼetanda ea loola wae bakafole mbile lima botso; kela bayale ntaza ko la bileko ko la bembile ko la mbula.

¹⁵ Ko kela bayale bafole ndʼetanda ea loola wae baatele bokili fole.” Ko joi liko liki ngoso.

¹⁶ Ko Nzakomba aolema bafole bafe bʼanene; fole eleki bonene wae engese la mbile, ko eambi lʼeko wae engese lʼotso: ko aolema tooci ngoko.

¹⁷ Ko Nzakomba aolila bako ndʼetanda ea loola wae baatele bokili fole.

¹⁸ Ko besanya mbile lʼotso, ko bakafole fole lima wilima. Ko Nzakomba aolena wae joi liko liki bolotsi.

¹⁹ Bokolʼoko la nkesa eko wae mbile eʼinei.

²⁰ Ko Nzakomba aotefela, “Kela basi baote bitukuluku bia nyama iyoike, koko la tofulu tofekwa ndʼaliko bʼokili ndʼase bʼetanda ea loola.”

²¹ Ko Nzakomba aolema nyama yʼesakaana ya lieke, ko la wengi nyama eyoike ko eyokende, iki basi ootaka la mpafula nda bilenge bikiyo, ko la wengi ifulu ile lʼafafu ndʼelenge ekae. Ko Nzakomba aolena joi liko wae liki bolotsi.

²² Nzakomba aosakelʼako bokako wa swa, aokela, “Lootaka, ko lofulaka, lonyenga ndʼasi ba baeke, ko kela tofulu tofule ndʼokili.”

²³ Bokolʼoko la nkesa eko wae mbile eʼitano.

²⁴ Ko Nzakomba aotefela, “Kela bokili boote nyama iyoike nda bilenge bikiyo: nyama ya mbongola la nyama indakula ko la nyama yʼokili nda bilenge bikiyo.” Ko joi liko liki ngoso.

²⁵ Ko Nzakomba aolema nyama yʼokili nda bilenge bikiyo, ko la nyama ya mbongola nda bilenge bikiyo, ko la wengi nyama lʼiwawa bandakula ndʼokili nda bilenge bikiyo. Ko Nzakomba aolena wae joi liko liki bolotsi.

²⁶ Nkako Nzakomba aotefela, “Kela teme bonto ndʼekoya ekiso, ngʼesonganya ekiso: ko kelʼiyo bayale bankolo ba nse ya lieke, la tofulu tʼaliko, la nyama ya mbongola, ko la bokili bouma, ko la wengi nyama la iwawa bandakula ndʼokili.

²⁷ Elengʼeko Nzakomba aolemʼonto ndʼekoya ekae mongo, wete aoloema ndʼekoya ea Nzakomba; aolaema jende lʼomoto.

²⁸ Ko Nzakomba aolasakela bokako wa swa; ko Nzakomba aolakela, “Lootaka, lofulaka, lonyenga ndʼokili, ko loongya boko. Loyale bankolo ba nse ya lieke, la tofulu tʼaliko, ko la wengi iwawa la nyama ikende ndʼokili.”

²⁹ Ko Nzakomba aokela, “Bala, njokayʼinyo wengi njunda icwa biofo ile ndʼokili bouma, ko wengi botamba bole lʼamuka bacwa biofo; bako bifoyala toma tokinyo ta ndala.

³⁰ Ko nkaya wengi nyama yʼokili, ko wengi tofulu tʼaliko, la wengi nyama la towawa bandakula ndʼamoci, wete wengi okiyo oyoike, nkaya bako wengi njunda yʼesolo, wae iko iyale toma tokiyo ta ndala.” Ko joi liko liki ngoso.

³¹ Ko Nzakomba aolenda belemo beuma bekiʼndʼemaka, ko bala, beki bolotsi mongo. Bokolʼoko la nkesʼeko wae mbile eʼotoa.