Osea 1 - BONKANDA WA NZAKOMBA

¹ Joi ja Yawe liyaki ele Osea bona owa Beli, ndʼembile bia Uziya, la Yotama, la Aza, la Izikiya, rois ya Yuda, la ndʼembile bia Yelobama bona owa Yoasa, roi ea Yisalaele.

Osea akola Ngomele waji – Banʼakiyo basato

² Aki Yawe otefelaka lʼomwa wa Osea, Yawe aokela Osea: Kenda yokole waji owa linsamba, la bana ba linsamba: ele boociʼone boyokele baoyi ba linsamba ja linene, boyosundole Yawe.

³ Ko aocwʼokola Ngomele, bona owa Dibelaima; ko ende aofoswa jemi, ko aolootela bona owa jende.

⁴ Ko Yawe aolokela: “Wʼoile lina Yizelele: nkʼelingi emi njifosombola nkele ea balonga ba Yizelele ele ilongo ya Yeu, ko njifosukeza likulaka jʼilongo ya Yisalaele.

⁵ Ko nda mbilʼeko njifouna bongango wa Yisalaele ndʼofoku wa Yizelele.”

⁶ Ko aofoswa lenkina jemi, ko aoota bona owʼomoto. Ko Yawe aolokela: “Wʼoilʼende lina Loluama; efʼemʼokele lenkina ilongo ya Yisalaele isei, wae ntungolʼiyo limʼaoyiʼobe bakiyo nye.

⁷ Lolonde njifokela ilongo ya Yuda isei, ko njifaikya la Yawe Nzakomba ekiyo; mpaikyʼiyo lʼongango, lʼifaka yʼetumba, lʼetumba, la chevaux, la banto bandafema nda chevaux.”

⁸ Akiʼndʼokizaka Loluama baele, aofoswa lenkina jemi, ko aoota bona owa jende.

⁹ Ko Yawe aokela: “Wʼoilʼende lina Lo-ami; efʼinyo bantʼakami, ko emi mpaoyala Nzakomba ekinyo.”

¹⁰ Lolonde boanji wa bana ba Yisalaele wifoyalema ngole bekongo bia lieke jʼokwa befezameya ko befoandemeya; ko ndʼitenela iki joi okelamakʼelʼiyo, Inyo lofa bantʼakami, nkʼeko joi lifokelamʼelʼiyo, Inyo lole bana ba Nzakomba eyoike.

¹¹ Mpanga bana ba Yuda la bana ba Yisalaele batakane, ko bifila omo chef ekiyo, ko bifocwa limʼese eko: ele mbile ea Yizelele ifoyalema mbile eʼenene.