Malako 1 - BONKANDA WA NZAKOMBA

Bolemo wa Yoane-Wini

¹ Iango ya nsango eʼolotsi ea Yesu Masiya, Bona owa Nzakomba.

² Nkʼelenge ekotama la Yesaya, boteli, Bala ntoma ekima ekami nda joso jʼelongi eke, Ende ifokeleza mboka ekawe.

³ Lolaka jʼontʼobeleza ndʼetekeleke, Loongya mboka ea Nkolo, Locilaza mboka ekande ci.

⁴ Yoane-Wini aoya ndʼetekeleke, ayolongoza inamelo ea mbututala ele etungwelo lima baoyiʼobe.

⁵ Ko bantʼauma ba Yudea la ba Yelusalema baocwa elʼende, ko baolinama lʼende nda ntando ea Yoladane, akiʼyʼiezaka bebe bekiyo.

⁶ Yoane aolota eto ea nkunza ea ngamela, la bonsenge wʼekoto ndʼonkeke, ko aleki basalankata la mpako.

⁷ Ko aolongoza ngʼone, Bonto ayoya ndʼafekʼakami olekolʼemi la mpamba; emi mpeji losunama wae ndembole bekulu bia bikoto bikae.

⁸ Emi njinʼinyo ndʼasi, lolo ende ifinʼinyo nda Bolimo wʼoeko.

Inamelo ea Yesu

⁹ Ko ndʼembilʼeko Yesu aoya lima Nazaleta ea Ngalilaya, ko inamaki la Yoane nda Yoladane.

¹⁰ Ko akiʼndʼosafwaka limʼasi, aolena loola lokombwa, ko Bolimo aokitela elʼende ngʼembenga.

¹¹ Ko lolaka loya lima loola, wete, We ole Bona okami olangema lʼeefe, ndokʼesaza la we.

Yesu aomekama

¹² Ko nkako Bolimo aolocinza ndʼetekeleke.

¹³ Ko aki ndʼetekeleke bembile ntuku inei, aomemolama la Satana. Ko aki eko la nyama ya wale; ko bikima bia loola baolosaela.

Yesu aanga bolemo bokae

¹⁴ Ndʼafeka bʼekandelo ea Yoane, Yesu aoya nda Ngalilaya, ayolongoza nsango eʼolotsi ea Nzakomba.

¹⁵ Aokela, Ekeke eokita ko likulaka ja Nzakomba jotutama. Loututala bobe, ko limeza nsango eʼolotsi.

Etelo ea bakimi ba joso

¹⁶ Akiʼnde ndʼeselo ea lieke ja Ngalilaya, aolena Simona la Andelo, okosangi la Simona ise, bayuse bojanga nda lieke; ekiʼyo baasi ba nse.

¹⁷ Ko Yesu aolakela, Lonkimʼemi ko njifolokitsa mpifo ea baasi bʼanto.

¹⁸ Ko baocika bejanga limpo, ko baolokima.

¹⁹ Aokongʼokenda isisi, ko aolena Yakobo, bonʼowa Zebedayo, la Yoane, okosangi lʼende ise, nda wato, bayoongya bejanga bekiyo.

²⁰ Nkako aolaeta, ko baocika ise ekiyo, Zebedayo, nda wato lʼasali, ko baolokima.

Yesu aikya owa demona nda Kapalanauma

²¹ Ko baokenda nda Kapalanauma. Ko aolotswa nda Sabata nda sunangonga, ko aolalaka lilako.

²² Ko baokamwa la lilako likae, ekiʼndʼalakakʼiyo ngole bomongo joi, afa nga bakoci bʼenkanda.

²³ Ko bontʼomo aki nda sunangonga ekiyo oki lʼolimo wa linyamo, ko aobeleza wae;

²⁴ Joi ndatsʼiso la we na, Yesu owa Nazaleta? Oyaki otofita nde? Njokea we; wole owʼoeko owa Nzakomba.

²⁵ Lolo Yesu aolosasa, aokela, Yala o wai, ko ola limʼelʼende.

²⁶ Ko bolimo wa linyamo aolofukya lʼefukyelo mongo, ende aobeleza la lofoso ja bolo, ko aolola limʼelʼende.

²⁷ Bantʼauma baokamwa kamo, wete baoluana, baokela, Joi line na? La lilako jʼaeyoko? Ayosise belimo bia linyamo la mpamba, ko boimeza la lifiki.

²⁸ Nkakoyoko lokumo lokae lolambwa wiji la wiji ndʼokili bouma wa Ngalilaya.

Yesu aikya bokilo owa Petelo lʼantʼamo baki la nkangi

²⁹ Akiʼyʼolaka lima sunangonga, baolotswa ndʼilombe ya Simona la Andelo, wetʼiyo la Yakobo la Yoane.

³⁰ Nyango ea waji owa Simona akeci lʼeefe eʼangala. Ko baolosangela joi liko likande.

³¹ Ko aoyʼelʼende, aolokita la likata, ko aoloemaza. Angala eolocika, ko aolasaela.

³² Lʼokolo, aki jefʼilaka, baoloyela bandokaki nkangi bauma, ko lʼiyʼaki la bademona.

³³ Ko bonanga bouma boyotakana nda joso ja wiso.

³⁴ Ko aikyaki bauke baki la nkangi ya bilenge la bilenge, ko aoloza bademona bauke. Ko ntacikela bademona elekelo wae batefele, ekiʼyʼoeaka.

Yesu aonda boondo nkʼomongo

³⁵ Ko la nkesa mongo, jefa lifʼino, aolemala, aolola, ko aokenda ndʼitenela yʼetekeleke, ko ayoondʼeko.

³⁶ Simona lʼiyʼaki lʼende baolokima,

³⁷ baolotana, ko baolokela, Bantʼauma bayokase.

³⁸ Ko aolakela, Kela tokongokenda ndʼenanga betutsi, wae ndongoza bosako eko, ekiʼmi oyaka la ncina ene.

³⁹ Ko aocwa nda Ngalilaya euma, ayolake nda sunangonga ikiyo, ko aoloza bademona.

Yesu aikya bontʼoki lʼaeka

⁴⁰ Ko bontʼoki la nkangi eʼaeka aoyʼelʼende, aololomba, aolokusamela, ko aolokela, Ayaka olanga, okusʼompetola.

⁴¹ Ekiʼndʼookaka isei, aosembya likata likae, aolofomwa, ko aolokela, Ndanga. Fetswaka.

⁴² Ko baeka baolimana limʼelʼende limpo, ko aofetswa.

⁴³ Ko aolasasa la bolo, nkako aolokenza,

⁴⁴ ko aolokela, Fonga loala wae ofosangele bontʼomoko joi line nye, lolo kenda, oyaeneya ele nkanga, ko lekya mbeka eki Mose osisaka ndʼeloko eʼefetswelo eke, ngole lotaza elʼiyo.

⁴⁵ Lolo akiʼndʼolaka aoanga jongoza joi liko, la lolanza liko: la ngoko Yesu ntakusa lenkina jotswa la folefole ndʼonanga, lolo aki o nda totenela ta bitekeleke; ko banto bayaki elʼende lima biiji beuma.