Luta 1 - BONKANDA WA NZAKOMBA

Eamanelo ea Luta la Naomi

¹ Ndʼembile beki bateni bʼakambo otenaka bakambo, eto ea nzala eoliela ndʼese eko. Ko bontʼomo bosi Bete leme-yuda aocwa oyala ndʼese ea Moaba, ende la waji okae ko lʼanaʼakande bafe bʼaende.

² Lina jʼontʼoko wae Elimeleke, ko lina ja waji okae Naomi, ko baina ba banaʼakiyo bʼaende wae Malona la Kiliyona, Ba-Efulata ba Bete lemeyuda. Ko baoya ndʼese ea Moaba, ko baomongʼeko.

³ Koko Elimeleke, bome owa Naomi aowa; ko ende akociki la banaʼakande bʼaende bafe.

⁴ Ko iyo baokola baaji, bamato ba Moaba, lina ja waji omo Olupa, ko lina ja omo Luta: ko baoyalʼeko mbula jom.

⁵ Malona la Kiliyona baowa, iyʼakʼafe: bomoto awei bome la bana bakʼafe, okociki nkʼende kika.

⁶ Limʼako aolemala, ende lʼakiloʼakae baki bana okolaka, wete ute limʼese ea Moaba; ekiʼndʼokaka bosako ndʼese ea Moaba ngoki Yawe obizaka bantoʼakande wae akaya mampa.

⁷ Aolola limʼekaʼnde, ende la bakiloʼakae bafe; ko baocwa mboka wae bute ndʼese ea Yuda.

⁸ Ko Naomi aokela bakiloʼakae bafe baki bana okolaka, “Lokenda, lute wengiʼonto ndʼilombe ya nyango ekande: kela Yawe akeelʼinyo bolotsi ngokiʼnyʼokeelaka bawei ko lʼemi bolotsi.

⁹ Yawe akayʼinyo elekelo wete lotane jomo wengiʼonto ndʼilombe ya bome.” Ko aolasisa la baisers; ko baololomwa, baolela.

¹⁰ Iyo baolokela, “O nye, iso tute la we elʼantoʼake.”

¹¹ Naomi aolakela, “Banaʼakami, luta, locwa lʼemi lae? la, nde la bana bamo bʼaende nda likunju likami wete bay ale life baomeʼakinyo?

¹² Banaʼakami luta, lokenda mboka ekinyo: emi njokita ekota, mpaata lenkina bome. Nga nkele, Ndendeza, nga mbata bome botsʼone, ko mbote bana bʼaende;

¹³ inyo lafalʼiyo elaka nko baocwʼanto? loyale nkʼaome ndʼeweʼekiyo? O nye, banaʼakami, elʼemi njokeselʼouke ndʼeloko ekinyo; ele likata ja Yawe jolola onsuka.”

¹⁴ Ko baosangya lofoso, baolele lenkina: ko Olupa aosisa bokilo okae la baiser. Lolonde Luta aolokatemela.

¹⁵ Ko aokela Luta, “Bala Olupa aolutelʼantoʼakande lʼele nzakomba ekae; we uta, yokimʼende.”

¹⁶ Lolonde Luta aokela, “Tombondake wete nkosundole, ko ndute wae mpokokime we: la ncina wae ecwa we emi ncwe nkʼeko; eyala we, emi njale nkʼeko; bantoʼakawe bayaleme bantoʼakami; ko Nzakomba ekawe ayaleme Nzakomba ekami:

¹⁷ ewa life we, emi mbwe nkʼeko, ko nkundame nkʼeko: nga joi limo litolenola, emʼa we, imola nkʼiwa, Nzakomba ankelʼemi elengʼeko, ko la ndekola!”

¹⁸ Aki Naomi enaka wete aokemya lokai wae acwe lʼende, aolambya; ntatefela lenkina lʼende.

¹⁹ Ko iyʼakʼafe baokenda elaka nko baokita nda Bete leme. Ko akiʼyʼoyaka nda Bete leme, bonangʼouma, bonanenga ndʼewelʼekiyo, ko bamato bakela, “One, la Naomi nde?”

²⁰ Naomi aolakela, “Talondetake Naomi, londete Mala: ele Owa mpamba euma aonkeela baoyi bʼololo mongo.

²¹ Ndolaki lʼomengo, ko Yawe aonduteya o mpampa: Yawe aosanga nsango ea temoin onsuka, ko Owa mpamba euma aonjeneyʼelo, londeta lenkina Naomi noina na?”

²² Naomi aoluta elengʼeko, ende la Luta, bosi Moaba, bokilo okae oki bona okolaka, ondutaki limʼese ea Moaba: ko baoya nda Bete leme ndʼiango ya emukelo ea orge.