Eneyelo 1 - BONKANDA WA NZAKOMBA

¹ Eneyelo ea Yesu Masiya eki Nzakomba okaakʼende wae eneya bakwalaʼakae baoyiʼaso bandiela nkʼelingi, ko atomaki ekima ekae ea loola ko ende eneyaki bokwala okae Yoane,

² osangaki Joi ja Nzakomba ko la nsango eki Yesu Masiya, wete baoyiʼauma bakiʼndʼenaka.

³ Ende oanda, lʼiyʼandoka baoyi ba lotelo lone ko bafonga baoyi bakotamʼeko, bakemʼekemo; ele ekeke eotutama.

Yoane aokotela bikelesia nsambo

⁴ Yoane ele bikelesia nsambo bile nda Asia: Boya elʼinyo la kuci limʼelʼende olʼeko, ko oki eko, ko oyalema seko; ko limʼele Belimo nsambo bele nda joso ja ngwende ekae,

⁵ ko limʼele Yesu Masiya, wae Témoin ea nsosolo, Nsomi limʼele bawei, Roi ea Rois yʼokili. Elʼende otokʼeefe ko atotungolaki lima baoyiʼobe bakiso lʼalongoʼakae mongo;

⁶ ko atokelaki wae toyale likulaka ja nkanga ele Nzakomba, Ise ekande; elʼende jilangi la mpifo bikeke la bikeke. O ngoko.

⁷ Bala! Aoya lʼatute; wengi liso lifoenʼende, ko lʼiyʼandookaki mbaoka o ngoko; ko baoci bauma bʼokili bifolela ndʼewelʼekae. O nde, o ngoko.

⁸ Nkolo Nzakomba akela, Emi nde Alpha la Omega, ende olʼeko ko oki eko, ko oyalema seko, Nzakomba ea mpamba euma.

Eneyelo ea Masiya

⁹ Emi, Yoane, ole lilongo likinyo, oamana lʼinyo ndʼelo, la nda likulaka, la ndʼikelo eʼotema ele Yesu, nki ndʼekole etangema Patemo ndʼewela ea Joi ja Nzakomba, ko ndʼewela ea nsango ea Yesu.

¹⁰ Emi nki nda Bolimo nda mbile ea Nkolo, ko ndokaki lolaka ja lonene nga bolola ndʼafekaʼakami,

¹¹ loko lokelaki, Kotaka baoyi bandena we ndʼonkanda, ko sokoza bako ele bikelesia nsambo; nda Efeso, la Semuluna, la Pelungamona, la Twatila, la Saludi, la Filadelufiya, la Laodikiya.

¹² Koko nkengwanaki wete njene bomongo lolaka lotefelaki lʼemi. Ko akiʼmʼokengwanaka, ndenaki biilelo bia totswa nsambo,

¹³ ko ndʼetei ea biilelo bia totswa nsambo, omo ngole bonʼowʼonto, olota bonkoto bokita ndʼakaka, ko la bosenge wʼilemba wa wolo bolembama nda ntolo.

¹⁴ Botsaʼokande la babwoʼakande baki fe nga nkunza ya mpate, nga neige, ko baisoʼakae baki nga tsa toyofete;,

¹⁵ bakakʼakae baki nga konga engesa, ngʼetumbamaki ndʼetumbelo; ko lolaka lokande loki nga lofoso ja basi bauke.

¹⁶ Akitaki tooci nsambo nda likata likae jʼelome, ko ifaka yʼetumba ya bempempe befe bia mpia mongo iolola limʼomwaʼokande; ko elongi ekande eki ngole jefa lingesa la mpamba ea liko.

¹⁷ Akiʼmʼoenakʼende, nkweki ndʼakakʼakae nga bonto owei. Afyaki likata likae jʼelome elʼemi, ko aokela, Toangake, Emi nde owa joso, lʼowʼafeka,

¹⁸ ko la Oyoike; mbwaki, ko bala njoike seko; ko mbata nsete ya Iwa la Adese.

¹⁹ Ndʼewelʼeko, kotaka baoyi bakiʼwʼenaka, la baoyi bʼaeyoko, ko la bako bacwʼokelama ndʼafeka;

²⁰ wisisa wa tooci nsambo toki wʼenaka nda likata likami jʼelome, la biilelo bia totswa bia wolo nsambo. Tooci toko nsambo tole wae bikima bia bikelesia nsambo, ko biilelo bia totswa nsambo bile Bikelesia nsambo.