Danyele 1 - BONKANDA WA NZAKOMBA

Danyele nda Babele

¹ Nda mbula eʼisato limʼaki Yoyakima ilamaka roi ea Yuda, Nebukadenesala roi ea Babela aoyʼouna la Yelusalema etumba.

² Nkolo aolokaya Yoyakima roi ea Yuda nda likata likande, ko la bijwa bimo bia ilombe ya Nzakomba, ko aotomba biko ndʼese ea Sinaia ndʼilombe ya nzakomba ekande: ko aoyela bijwa biko ndʼilombe ya liomba jʼaumba ya nzakomba ekande.

³ Koko roi atefela la Asepenaza, chef ea biunuko bikande, wae ayele bana ba Yisalaele bamo ba ilongo ya roi la chefs:

⁴ banolu basamba bolema, ba lituka, bandekela wanya bouma, ko la losifya, bakotola njea, ko bakuseya jemala ndʼelolombe ea roi; ko alakʼiyo wanya la lofoso ja Ba-Kasada.

⁵ Ko roi aelezakʼiyo liondo ja toma ta ndala ta roi bembile lʼembile, ko la liondo ja vina emelʼende, akelaki wete baongwame ngoko mbula isato; wae nda nsukela ea mbula iko bemale nda joso ja roi.

⁶ Bana ba Yuda bamo baki ndʼoloiʼoko, Danyele, la Ananya, la Misaele la Azalaya.

⁷ Ko chef ea biunuko aolaila baina: aolila Danyele lina ja Beletesasala; ko aolila Ananya lina ja Sadalaka; ko aolila Misaele lina ja Mesaka; ko aolila Azalaya lina ja Abedenengo.

⁸ Lolonde Danyele aolanga wango ndʼotemaʼokande wete afilʼende mongo linyamo la bofambe wa roi, la vina emelʼende: la ncina eko, aoluola chef ea biunuko wae afomasʼende wae ayailʼende mongo linyamo.

⁹ Ko Nzakomba aolieza Danyele wete atanʼoya lʼisei ndʼaiso ba chef ea biunuko.

¹⁰ Chef ea biunuko aokela Danyele, “Emi mbanga roi nkolo ekami osiselakʼinyo toma tokinyo ta ndala la mmamela: ende ena bilongi bikinyo bilekola biʼaebiʼakinyo lʼobe ncina na? ngoko londila nda likambo ele roi, nkinʼantenʼotsa.”

¹¹ Limʼako Danyele aokela wesanyi oki chef ea biunuko ilelaka Danyele la Ananya, la Misaele, la Azalaya:

¹² “Nkoonda, meka basaliʼake bembile jom: kela batokaya njunda tole, ko la basi tomele.

¹³ Kelawengele bilongi bikiso la bilongi bia banoluʼamo baleka toma ta roi; ko okeela basaliʼake elenge endena we.”

¹⁴ Ende aolaokoza nda joi liko, ko aolameka bembile jom.

¹⁵ Ko nda nsukela ea bembile jom, bilongi bikiyo biolenya la lituka, ko baonona, baolekolʼanolu bauma baleki toma ta roi.

¹⁶ Elengʼeko wesanyi aolimola befambe bekiyo la vina ekiyo ea mmamela, ko aolakaya njunda.

¹⁷ Nzakomba aokaya banolu bakʼanei njea la losifya nda jekela liuma la wanya: ko Danyele aki la nkoto ea bienelo la baloto bauma.

¹⁸ Nda nsukela ea bembile beki roi osisaka wae otsweyʼiyo, chef ea biunuko aolayela nda joso ja Nebukadenesala.

¹⁹ Ko roi aomesa lʼiyo limeso: ko lʼiyʼauma nkʼomo otanema osongi la Danyele, la Ananya, la Misaele, la Azalaya: ndʼewelʼeko iyo baolemala nda joso ja roi.

²⁰ Ko nda wengi joi ja wanya la jekela liki roi auolaka, aotana wete iyo baolekola nkanga yʼakunda la nkanga yʼete, baki nda likulaka likae liuma belekola jom.

²¹ Ko Danyele aoakakala elaka nko mbula ea joso ea Roi Kulese.