Beanji 1 - BONKANDA WA NZAKOMBA

Eandelo ea joso ea boanji wa Ba-Yisalaele

¹ Yawe aotefela la Mose ndʼete keleke ea Sinai, ndʼilombe ya bito yʼetakano, nda mbile ea joso ea nsanza eʼife, nda mbula eʼife limʼakʼiyʼolaka limʼese eʼEjipeto, akela,

² “Loanda boanji wa bana ba Yisalaele bʼetakano euma, lʼeociʼekiyo la tolongo ta baiseʼakiyo, elengʼele boanji wa baina ba wengi jende, bonto lʼonto,

³ iyʼakita mbula ntuku ife la balekolʼiko, wae iyʼakuseya jola ndʼetumba nda Yisalaele, we la Alona laande lʼeloi bekiyo.

⁴ Ko jende lomoko ja wengi booci aamane lʼinyo; wete chef ea ilongo ya baiseʼakae.

⁵ Bane wae baina bʼanto baamana lʼinyo: lima Lubena, Elisula bona owa Sedeula.

⁶ Lima Simona, Selumiele bona owa Sulisadai.

⁷ Lima Yuda, Nasona bona owa Aminadaba.

⁸ Lima Yisasakala, Netanele bona owa Swa.

⁹ Lima Zebulona, Eliaba bona owa Elono.

¹⁰ Lima bana ba Yosefa, lima Efulaima, Elisama bona owa Amiuda: lima Manase, Ngamaliele bona owa Pedasula.

¹¹ Lima Benyamina, Abidana bona owa Ngidoni.

¹² Lima Dana, Aiyezele bona owa Amisadai.

¹³ Lima Asela, Pangiele bona owa Okulana.

¹⁴ Lima Ngada, Eleyasafa bona owa Dwele.

¹⁵ Lima Napatali, Aila bona owa Enana.”

¹⁶ Bane wete bako baki etakano osonaka, chefs ya tolongo ta baiseʼakiyo; iyo baki chefs ya beoci bia Yisalaele.

¹⁷ Koko Mose la Alona baokola baendeʼane baandemaki lʼaina:

¹⁸ ko baotakanya etakano euma nda mbile ea joso ea nsanza eʼife, ko baoleanya biotswelo bikiyo elengʼele baociʼakiyo, la tolongo ta baiseʼakiyo, elengʼele boanji wa baina, limʼelʼiyʼakita mbula ntuku ife la ndekola la betsa bekiyo.

¹⁹ Elengʼeko ende aolaanda ndʼete keleke ea Sinai, ngoki Yawe osisaka Mose.

²⁰ Ko bana ba Lubena, nsomi ea Yisalaele, la biotswelo bikiyo, la baociʼakiyo, la tolongo ta baiseʼakiyo, elengʼele boanji wʼaina bakiyo, la betsa bekiyo, wengi jende okita mbula ntukʼife la ndekola, wete iyʼauma bakuseya jola ndʼetumba;

²¹ ba booci wa Lubena baandemaki lʼiyo baki nkoto ntuku inei lʼotoa la benkama betano.

²² Koko bana ba Simona, la biotswelo bikiyo, la baociʼakiyo, la tolongo ta baiseʼakiyo, iyʼaandemaki ndʼoloiʼoko, elengʼeki boanji wa baina, la betsa bekiyo, wengi jende okita mbula ntukʼife la ndekola, wae iyʼauma bakuseya jola ndʼetumba;

²³ ba booci wa Simona baandemaki, baki wete nkoto ntukʼitano lʼibwa la benkama besato.

²⁴ Ko bana ba Ngada, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wae iyʼauma bakuseya jola ndʼetumba;

²⁵ ba booci wa Ngada bakiʼyʼoandaka, baki wete nkoto ntukʼinei lʼitano la benkamʼotoa la ntuku itano.

²⁶ Ko bana ba Yuda, la biotswelo bikiyo, la baociʼakiyo, la tolongo ta baiseʼakiyo, elengʼele boanji wʼaina, lima mbula ntuku ife la ndekola, wetʼiyʼauma bakuseya jola ndʼetumba;

²⁷ ba booci wa Yuda bakiʼyʼoandaka, baki nkoto ntuku nsambo lʼinei la benkama botoa.

²⁸ Ko bana ba Yisasakala, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wete iyʼauma bakuseya jola ndʼetumba;

²⁹ ba booci wa Yisasakala bakiʼyʼoandaka, baki wae nkoto ntukʼitano lʼinei la benkamʼenei.

³⁰ Ko bana ba Zebulona, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wetʼiyʼauma bakuseya jola ndʼetumba;

³¹ ba booci wa Zebulona, bakiʼyʼoandaka, baki nkoto ntuku itano la nsambo lʼenkamʼenei.

³² Ko bana ba Yosefa, wete bana ba Efulaima la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wete iyʼauma bakuseya jola ndʼetumba;

³³ ba booci wa Efulaima bakiʼyʼoandaka, baki wae nkoto ntukʼinei la benkama betano.

³⁴ Ko bana ba Manase la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntuku ife la ndekola, wetʼiyʼauma bakuseya jola ndʼetumba;

³⁵ ba booci wa Manase bakiʼyʼoandaka, baki wae nkoto ntukʼisato lʼife lʼenkamʼefe.

³⁶ Ko bana ba Benyamina, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wete iyʼauma bakuseya jola ndʼetumba;

³⁷ ba booci wa Benyamina bakiʼyʼoandaka, baki wae nkoto ntuku isato lʼitano la benkamʼenei.

³⁸ Ko bana ba Dana, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wetʼiyʼauma bakuseya jola ndʼetumba;

³⁹ ba booci wa Dana bakiʼyʼoandaka, baki wae nkoto ntukʼotoa lʼife lʼenkama nsambo.

⁴⁰ Ko bana ba Asela, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wete iyʼama bakuseya jola ndʼetumba;

⁴¹ ba booci wa Asela bakiʼyʼoandaka, baki wae nkoto ntuku inei lʼemoko lʼenkama betano.

⁴² Ko bana ba Napatali, la biotswelo bikiyo, la baociʼakiyo, la tolongo ta baiseʼakiyo, elengʼele boanji wa baina, lima mbula ntukʼife la ndekola, wetʼiyʼauma bakuseya jola ndʼetumba;

⁴³ ba booci wa Napatali bakiʼyʼoandaka, baki nkoto ntukʼitano lʼisato la benkamʼenei.

⁴⁴ Bane wetʼiyʼaandemaki, baki Mose la Alona oandaka, iyo la chefs ya Yisalaele, bako wae banto jom lʼafe; wengiʼonto wengi ilongo ya baiseʼakande.

⁴⁵ Elengʼeko iyʼauma baandemaki limʼana ba Yisalaele, la tolongo tʼaiseʼakiyo, lima mbula ntukʼife la ndekola, bauma bakuseya jola ndʼetumba nda Yisalaele,

⁴⁶ wetʼiyʼauma bakiʼyʼoandaka baki wae nkoto benkama botoa lʼisato la benkama betano la ntuku itano.

⁴⁷ Lolonde Ba-Lewi lʼooci wʼaiseʼakiyo ntabaandemaki lʼiyo.

⁴⁸ Eki Yawe otefelaka la Mose, akelaki,

⁴⁹ “Toandake booci wa Lewi, ko toandolake boanjiʼokiyo mbamana la bana ba Yisalaele;

⁵⁰ lolo ila Ba-Lewi bafongi ba tabernacle ea nsango, la ndʼelemo bia toma tʼeko; ko la toma tʼeko touma: iyo batombe tabernacle, ko la belemo biʼeko beuma; basale besala nda tabernacle, ko bumbe balako bakiyo ndengama lʼeko.

⁵¹ Akenda tabernacle, ba-Lewi bakitezʼeko, ko ae tabernacle emyama Ba-Lewi bemyʼeko, ko ngʼonto ofa Bo-Lewi atutamʼeko, aomame.

⁵² Koko bana ba Yisalaele bemya tolombe tokiyo ta bito, wengiʼonto ndʼitenela ikae loswele, ndongama la ndele ekande mongo, elengʼele beloi bekiyo.

⁵³ Lolonde Ba-Lewi bemya tokiyo ndengama la tabernacle ea nsango, nyango nkele efiela ndʼetakano ea bana ba Yisalaele; Ba-Lewi bilame nda mpifo wae bafonge tabernacle ea nsango.”

⁵⁴ Bana ba Yisalaele bakelaki ngoko; elengʼeki Yawe osisaka Mose ndʼaoyiʼauma, iyo bakelaki elengʼeko.