Hebru 1 - Lautu New Testament

Khazing Ta Saacapaa Taata Bie A Ri

¹ Hluo ningta ca Khazing ta ma mingchingmingvuo tie'a lie kha profet tie hmuo pata yi hluvpuv hne a luo hluvpuv ta bie a za ri.

² Cuorasala ata chuotliepa chuo lie hingca a Saacapaa taata kiema'a lie kha bie a ri. Khazing ta ama kha hmangting bangkhuo rucutuv riypata tue te chuelyi zaw hing ama thueta sapa a cuo.

³ Saacapaa ca Khazing rungnaana a paluo satuv hne Khazing ama hrahring a lupa ta sapa a cuo. A cahrapa a bie ta hmangting bangkhuo kha a pacu sa. Sue pathesana kha tue te, Cungnungce Khazing cacuo luota aa tu.

⁴ Ama a pipa ming ca avuoming ming laata a suo vie pahaata ama ca avuoming laata a le vie karaapa ta a cuo.

Saacapaa Ca Avuoming Laata A Le vie

⁵ Tahematapakieca Khazing ta tuokhaapa avuoming kha hmuo, “Nama ca i Saacapaa ta na cuo; ata ning hing na Paa ta i cuo tli,” ta vayi. A cuo li kie, “Kama ca a Paa ta cuo'a ang te, ama ca i Saacapaa ta a cuo aa,” ta buo ra vyi.

⁶ Cakhutaa, Khazing ta sa-uvthyi kha chuelyi luo a zaa chiy ningta a ripa ca, “Khazing avuoming bangkhuo ta ama hing abie ung,” a ta.

⁷ Avuoming kawlie taca, Avuoming kha thliy ta tue yite, a changtaapa tie kha myihlaa ta a tue yi,” a ta.

⁸ Cuorasala Saacapaa kawlie taca, “Vya Khazing, naa Byithude ca chuozaa ta a hmang mangsue, adangna hne uvpa pena ca nama pena tana a cuo.

⁹ Nama ca adangna kha tlechuo cate pha lina kha na hue; cacuonakawta Khazing, nama Khazing ta palungtluona sathu ca pathuv te, na viesaa zaw laata aca cyicalang vie.

¹⁰ Cakhutaata, “Khazing, a hruothu taata nama ta chuelyi hing sa cate, vuoruo zaw hing nama kuvzung tana a cuo;

¹¹ Iema bangkhuo hing ra'a yite, cuorasala nama ca naa hmang aa; iema bangkhuo ca pang haata caw diy'a yite,

¹² buohryi haata na kadiy thluv'a yi, Iema ca caw haata thlepa ama cuo aa. Cuorasala nama ca na hmanghmangpa ta cuo pari'a cate, na kungkhue zaw khatiy tahmuo chuo buo'a vyi,” a ta.

¹³ Cuorasala tuokhaapa avuoming khahmuo, “Na carie zaw kha na phyipazaa rawlie i chi hluo li yi, I cacuo luo khata a tu tie,” a ta buo yi ma?

¹⁴ Avuoming bangkhuo hing khuona ru a cu riypa tie mangchiy riypata pathliepa Abyipa re a hrietuv thlaapa cuo vayi ma?