Efesaa 1 - Lautu New Testament

Bie-achangna

¹ Khazing khingna ta Khrih Zingsuv lucuotuv a cuopa kama Paul ta, Khrih Zingsuv thueta zangtluo aa tlapa Efesa lie a awpa mingpathepa tie kha caa ica paphya yi.

² Ima Paa Khazing'a taata hne Abyipa Zingsuv Khrih'a taata vihnyina hne diena ca niema'a lie aw mangsue.

Khrih'a Taata Thlaapa Thluechiy

³ Ima Byipaapa Zingsuv Khrih a Paa hne Khazing ca pathuosa pata cuo mangsue. Ama ca vuoruo lie thlaapa thluechiy ting kha Khrih thueta kiema malie a pipa tana a cuo.

⁴ A hmiekunglie a pathepa hne syi riy a aw lipa ma cuo riypata chuelyi sa hluo baataata Khrih chunglie kha duena ta malie aa tlaw.

⁵ Ama ta kiema ca Zingsuv Khrih thueta a saata ta cuhluo riypata khingna hne palung tlingsa pata ama lieriyuopuopa tama ma cuo.

⁶ A duesapa Saacapaa thueta malie a pipa a rungnaapa a vihnyina nakawta Khazing ca pathuosa ungsiy.

⁷ Khrih thiyse thueta khuona hne sue a ngiethena kha

⁸ Khazing ta pahyasa pata malie a pipa a vihnyina thueta ma hmung.

⁹ Ama ta a singna hne aa thuvpa a pachangna ta a ting ciepa kha hrie te Khrih thueta a patling sa khingpa a bieparuv ca kiema'a lie a paluo sa.

¹⁰ A cuo a tling tiyta Khazing ta vuoruo lie a awpa hmang bangkhuo hne alyi lie a awpa hmang bangkhuo kha Khrih'a lie suvkha ta pahmya diy aa ting.

¹¹ Ama khingna haata hmangting bangkhuo kha a patlungpa Abyipa a tingna haata kiema kha Khrih thueta rucutuv ta malie a tue.

¹² Cacuonakawta, Khrih cunglie a ruechuona a hnyi taapa kiema ca a rungnaana pathuo sa riypata hring ungsiy.

¹³ Niema zaw, khuona thuophaabie, biehmisipa kha thyi ung cate ama nama zang tiyta biekuo ciepa Thlaapa Pathe ta caa khepa ta nama cuo tli.

¹⁴ Thlaapa Pathe ca ama rungnaana ma pathuosa the riypata Khazing cawsaa a cuopa zaw ta ma cupa ru cuota aamahkhan tana a cuo.

Paul Thlaachuona

¹⁵ Abyipa Zingsuv nama zangna hne mingpathepa tie cunglie nama hnyipa duena kha i thyi tli.

¹⁶ Canakaw cata i thlaachuona lie niema kha caa thyi pari yi ang te palungtluona bie kha i hluo pari.

¹⁷ Ima Byipaapa Zingsuv Khrih a Khazing, rungnaana Paa ta niema kha ama nama pachang na riypata singna thlaapa hne biephu a ca pi riy'apa yi ta thlaa ica chuopa yi.

¹⁸ Cahaa cata nama pachangna pathiypalung a pahaw sala, Abyipa ta a tuepa a lepa a rungnaana kha pachang pata, Abyipa ta aca u hnuochuonapa yi a nguopuona hne mingpathepa tie ta ama hmung riypa ru hing khatluv tama a rungnaa tapa kha pachang'a ung cate,

¹⁹ kiema ama a zangtuv zaw cuota a cahrana hing khatluv tama a le tapa zaw kha nama pachang riypata thlaa i chuo.

²⁰ Khazing ta Zingsuv kha pathu te vuoruo lie ama cacuo luo kuo ta a patu khu taata capa rehrie khuna cahrana ca a pi.

²¹ Khrih ca uvtuv bangkhuo hne nawhnyina bangkhuo hne cahrana bangkhuo hne abyi bangkhuo cunglie kha chi te, ata chuo lie dyi cuo li pata hmie luo chuo lie zaw ku pata a cuo riypa ming zawdya cunglie ming sungcepa kha a pi.

²² Khazing ta hmangting bangkhuo Khrih phyipazaa rawlie chi te, hmangting bangkhuo cunglie Abyi tana a cuo ta te Khrihsaabuv luv ta a chi.

²³ Khrihsaabuv ca Khrih pangpa ta cuote, hmangting bangkhuo a patling sana ama tlingna tana a cuo.