Ñwaè' Kuu Buu Ce Vi Be Keè Koni 1 - Limbum New Testament

¹ Cena yu buu ce Jisos Krǎis à m gèe bèe ce a ce dù àmbùu Nyʉ̀ a rîŋ. Nyʉ̀ à m gèe Jisos Krǎis a riŋ buu ca tɛ e bo gèe tɛ bèe ce a ce dù àmbùu Nyʉ̀ a riŋ buu ce vi be koni nfè' mʉcàr. Yi ka' ba wa'a, Jisos Krǎis à tuu yì ncìndap enɛ e du yɛ Jǒn ce e yu yì ŋwɛ̀ rfà', gee tɛ e yɛ buu ca.

² Jǒn à ka' yɛ, a suŋ bèe. E m saŋ ba blàa ce vi m lò ese Nyʉ̀, Jisòs à suŋ ye.

³ Ŋwɛ̀ ce e ka' be' blàa ca banɛ e yu ŋwɛ̀ Mbǒŋtu. Bèe ce a ka' yu' blàa ca, gee àmbò vi làa banɛ wowèe a yu ŋgǎa Mbǒŋtu njobè' nfè' ce buu ca vi be koni ku bɛti mʉcàr.

⁴ Ŋwà' ca à saŋ mɛ̌ Jǒn nè bcor sàambâ, ce vi yu à ŋgǒŋ Ɛsìyà. M ce loo mɛnɛ Nyʉ̀ tʉr ntee bòŋboŋ nè wèe ker fa wèe cumʉnyaŋ. Ku ba ye ce e yu sè'ni na, à ker ba Nyʉ̀ ce e m ba, à ku ker ba ye ce e be kè vʉ̀. Buu ca à lò foŋ ese Byʉ' sàambâ, ce vi tɛɛ kùntombì nè yi kàbàrà'.

⁵ Vi lò foŋ ese Jisos Krǎis ce e ke suŋ buu ce vi yu mini, a ba ŋwɛ̀ ce e m fʉʉ efa rkwe entombì, a ker ba ŋwɛ̀ ce e ce sa' bkʉʉ enjep ŋgòŋ na wɛɛwɛ. M ce yòŋshi ye ce e m kòŋ sèe, a kwe a sěe btù a fʉr sèe efa buu bbebep nè vi blɛɛ.

⁶ E gèe sèe à ba bèe ce e ce sa' sèe àmbò ŋkʉʉ, a ker gee sèe à ba ŋgǎa taŋshi taŋshì nè Nyʉ̀ ce e yu yì Tâ. Tɛ fòo yi ba nè Jisòs, tɛ ŋger yi ba nè ye foŋ à nfè' sìp. Yi yu wa'a.

⁷ Yɛ̂, e ce vʉ̀ mbe mʉ̀ mmbà'. Bèe wɛɛwɛ a be yɛ ye. Bèe ce a m sòp ye nè rkòŋ a be yɛ ye foŋ. Běe à bto' wɛɛwɛ enjep ŋgòŋ na a be war enɛ a m ba riŋ a m ba byemi nè ye. Ɛ̀no, yi yu wa'a.

⁸ Ŋger wɛɛwɛ yi yu mbà mmbo Nyʉ̀ ce e yu yìsèe Tâ. E yu sè'ni na. E m ba, à ku ba ye ce e be kè vʉ̀. E m làa enɛ̂, “A mɛ̀ Alfà a ker ba Òmɛgà.”

⁹ A mɛ̀ Jǒn ce m yu nfʉr wèe, sèe à ba àbee àtu Jisos Krâis. Sèe yu àbee à ŋgɛ' ce sèe ce yɛ. Jisos Krǎis yu yìsèe ŋkʉʉ. Sèe ce yɛ ŋgɛ' ca wa'a, a ke' ce sɛ̀ ka'. À m ba à nfè' mò', a koo mɛ̀ a du àgho à dì' mo' ce a m ce too enɛ Patmòs ce rdip rgòr li m sìr a kaari a tarte. A m koo mɛ̀ a du àgho àfo njobè' blǎa Nyʉ̀ ce mɛ̀ m ce fè'shi kuu Jisos Krâis.

¹⁰ À ka' ba nyʉ̀ mmbomntaa Nyʉ̀, mɛ̀ ba mbà mmbo Yʉ' Nyʉ̀, a yu' àmbò njèndoŋ à làa embe mɛ̌ njì àmbò rsòŋ wa'a, enɛ̂,

¹¹ “Lòr ŋwà', saŋ buu ce wɛ̀ yɛ mbo, tuusi nè bcor ce à rla' Ɛfɛsòs, ba Sìmainà, ba Pɛgamòm, ba Tàitirà, ba Sadìs, ba Fìlàdɛlfìyà ker ba à rla' Làodisìyà.”

¹² Mɛ̀ ka' yu' njèndoŋ ca a karsi nyor tɛ m bo yɛ ŋwɛ̀ ce e ce làa. Mɛ̀ ka' karsi nyor a yɛ mʉ njɛ̀ɛ btɛbùr ce a ke tooshi blam mbo vi sàambâ. A m gèe mʉ btɛbùr ca nè bco' ce a too enɛ gûl.

¹³ Mɛ̀ ka' fyɛ' a yɛ ŋwɛ̀ mò' à tɛɛ mbetar btɛbùr ca a ba àmbò muu ŋwɛ̀ wa'a. E m mà' sàaro à nyòr, a cʉʉ kʉ̀ cɛ̀' ce a gèe nè gûl, nje ŋgùŋ.

¹⁴ Yi nyʉ̀'tu yi m ce fʉp àmbò mmbà', mi mmir mi ba àmbò mcùŋ mor wa'a.

¹⁵ Mi mkùu mi m ce là'ŋger àmbò bco' ce ŋgǎa ntòo nlàa a kupshi wa'a. Yì njèndoŋ à m ba àmbò njèndoŋ rdip ce li ke gwè à rkoŋ wa'a.

¹⁶ E m tʉr mkàŋsì sàamba mbà bo mà', sà' mbyɛ̀rɛŋ à fʉʉ eku yě cùu. Vi bsii vi m ce raa àmbò nyʉ̀ ce e ke saŋ nèmootì nà.

¹⁷ Mɛ̀ ka' yɛ ye, a gwe a noŋ njep yě tìi àmbò ŋwɛ̀ ce e kwe wa'a. E lɛ yi bo mà' mbe mɛ̌ ndù a laa enɛ̂, “Fa wɛp ka', m yu ŋwɛ̀ entòmbì a ba ŋwɛ̀ elʉ̀simbùu.

¹⁸ M yu ŋwɛ̌ ntèe. Mɛ̀ m kwe a kʉti ntèe, cu nfesè. Rkwe ker ba ŋgòŋ byir a yu mba mɛ̌ mmbò.

¹⁹ Saŋ buu ce wɛ̀ yɛ na mbe ŋwà'. Saŋ buu ce vi be koni sè'ni ker ba buu ce vi bii ka' koni.

²⁰ Wɛ̀ yɛ mkàŋsì ce m tʉr mbà bo mà' a ker yɛ mʉ btɛbùr sàamba ce a ke tooshi blam mbo nà. M be suŋ wɛ̀ mbùu efa buu ca. Mkàŋsì sàamba ca mi tɛɛ àtu bcìndap sàamba ce a ce kè'ni bcor sàambâ, mʉ btɛbùr sàamba ca à ba bcor sàambâ.”