Ñwaè' Joân Ce Elúèsimbuèu 1 - Limbum New Testament

¹ Ŋwà' ca à saŋ mɛ̌ nleeŋwɛ̀ nè ŋkarǎ Gayòs ce mɛ̀ kòŋ nè mini-ŋwɛ̀.

² Ŋkarà, m ce loo mɛnɛ à cu yɛɛnì, tɛ yò buu wɛɛwɛ ba yɛɛnì àmbò yo ntee yi yu yɛɛnì foŋ nà.

³ Mɛ̀ m lu'shi sê, à nfè' ce bfʉr mo' a m vʉ̀ a ce suŋ mɛ̀ àmbò à ce cu rcu ce li yu nè mini-ŋwɛ̀. Yi ku ba mini wa'a.

⁴ Àde' yuu mo' yi gee m ker lu'shi caa àmbò m ce lu'shi à ryu' enɛ boo wa a ku cu njep mini na ka'.

⁵ Ŋkarà, buu ce à ce gèe nè bfʉr na, à ce gèe nè mini-ŋwɛ̀, laŋlaŋ nè bkèe.

⁶ Wowèe a suŋ ŋgǎa cor àmbò lo rkòŋnì. Be ba yuu bòŋboŋ ce wɛ̀ ka' daasi wowèe à njɛ̀ɛ njì ce e yu yɛɛnì à bsii Nyʉ̀.

⁷ Yu njo' rlii Krǎis ce enɛ wowèe a m fʉʉ à mbè a ke' ce koo yuu mo' ese bèe ce a mɛŋni Nyʉ̀ ka'.

⁸ Banɛ sèe à ba ce jà' njɛ̀ɛ bèe ca tɛ sèe wowèe bo fà' àbee à rsuŋ nsuŋ ce mini.

⁹ Mɛ̀ m saŋ yuu mo' nè côr, geewa'a Dàyotrɛfɛ̀s ce e kòŋ à rba tu embe cor à byemì ka'.

¹⁰ Banɛ m ka' vʉ̂, m fʉʉ nè ye àwaŋ, suŋ ku' buu bbebep ce e làa a kuu wèr. E ce sa' wèr nè bsàrbuu-ŋwɛ̀. E gèe ca wa'a, yi ghɛɛ ye ka', e kani à rkoni bfʉr, a kani bèe ce a ce kòŋ à rgèe wa'a foŋ, a fʉr wowèe embe côr.

¹¹ Ŋkarà, fa bè'ni yuu bebep ka', bè'ni ba yuu bòŋboŋ. Ŋwɛ̀ ce e ka' ce gèe yuu bòŋboŋ banɛ ŋgàŋ yu ŋwɛ̀ Nyʉ̀. Ŋwɛ̀ ce e ka' ce gee yuu bebep, banɛ ŋgàŋ à m yɛ Nyʉ̀ ka'.

¹² Ŋwɛ̀ wɛɛwɛ ce làa bòŋboŋ kuu Dɛ̀mitròs. Ka' yì nděe mini foŋ ce dùŋshi wa'a. Wer wèr foŋ ce làa bòŋboŋ kuu ye. Wɛ̀ rìŋ wɛnɛ yuu ce wèr ce làa yi yu mini.

¹³ M tʉr buu magòr ce m ba bà saŋ nè wɛ̀, m be kèr saŋ saŋ ka'.

¹⁴ M ce kwà'shi à rvʉ̀ yɛ wɛ̀, làa nè ya cùu.

¹⁵ Cumʉnyaŋ ba nè wɛ̀. Bkar a ce cà'ni wɛ̀. Cà'ni bkar à mlii.