Ñwaè' Táèsaèlonikaè Ce Embenjïì 1 - Limbum New Testament

¹ Ŋwà' ca a saŋ mɛ̌ Pol ba Silàs ba Timotì nè ŋgǎa cor ce a yu à rla' Tɛ̀sàlonikà, ce yu bèe yìsèe Ta Nyʉ̀, a ker ba bèe Tata Jisos Krâis.

² M ce loo mɛnɛ Tàr Nyʉ̀ ba Tata Jisos Krǎis a tʉr wèe à ntee bòŋboŋ, ker fa wèe cumʉnyaŋ.

³ Bfʉr wâ, yu yer dì' à ryòŋshi Nyʉ̀ à nfè' wɛɛwɛ njo' wèe. Yi bòŋ enɛ wèr gee wa'a njobè' ler rbyemì li ce tap, a caa àmbò li m ba, ŋwɛ̀ wɛɛwɛ à ce kòŋ nfʉr yì a caa àmbò e m kòŋ.

⁴ A mbùu ce wer ke làa nè bcor mo', ce nàa tu nè wèe njobè' bèe a ke nyʉ̀' wèe, ker fa wèe ŋgɛ', wèe ku tɛɛ tatap, byemi ba nè Nyʉ̀.

⁵ Ca yi ce dùŋshi enɛ buu ce Nyʉ̀ e ke gèe vi yu yɛɛnì, njobè' yi be gèe tɛ wèe ghɛɛte à bèe ce a be ye rbòŋ embe dǐ' kʉʉ Nyʉ̀. A mbùu ce wèe ce yɛ ŋgɛ' sè'ni.

⁶ Nyʉ̀ yu ŋwɛ̀ mini. E be kʉsi mcucu' nè bèe ca njobè' a ce fa wèe ŋgɛ',

⁷ jà' wèe efa ŋgɛ' ce wèe ce yɛ anà, kèr jà' wèr foŋ efa ŋgɛ'. E be gèe cena à nfè' ce Tata Jisòs ce vʉ̀ embe bùu nè ŋger-ŋwɛ̀, a bcìndap Nyʉ̀ wèe.

⁸ E be vʉ̀ njè mʉ̀ mcùŋ mor, fa ŋgɛ' nè bèe ce a mɛŋni Nyʉ̀ a kani efa rgèe yuu ce Nsuŋ Mbòŋmboŋ àmbò Tata Jisòs ce làa enɛ a gêe.

⁹ Wowèe a be bʉ nfesè, gàpni a Tata Nyʉ̀ wèe, bɛ fòo efa yi ŋger.

¹⁰ E be kè vʉ̀ à nòŋ anà tɛ yì bèe ce a byemi nè ye a ku'si ye kèr vʉse ye. Wèe be kè ba à mʉ̀ bèe ca njobè' wèe à byemi blǎa Nyʉ̀ ce wèr à m fè'shi nè wèe.

¹¹ A mbùu ce wer ke loo nè wèe à nfè' wɛɛwɛ enɛ Nyʉ̀ gee tɛ wèe cu njɛ̀ɛ rcu ce e kòŋ enɛ yì bèe a cu. Tɛ yìsèe Nyʉ̀ gee à yi ŋger tɛ buu bbòŋboŋ ce wèe ce kwà'shi à rgèe vi geetî, ker gee tɛ mfà' ce wèe ce gèe njo' le rbyemì mi geetî.

¹² Yi ba wa'a, a ku'sì Jisos Krǎis njo' wèe, ku'si wee wèe foŋ njo' ye. Bkù' ca vi be ba wa'a njobè' ntee bòŋboŋ ce yìsèe Nyʉ̀ ba Tata Jisos Krǎis a tʉr nè sèe.