Ñwaè' Beâe Koreèn Ce Embenjïì 1 - Limbum New Testament

¹ Ŋwà' ca ce saŋ mɛ̌ Pôl, ce m yu ŋwɛ̀ ntuu nè Jisos Krâis. Nyʉ̀ a ŋwɛ̀ ce e m gèe enɛ m ba ŋwɛ̀ ntuu nè Jisòs. Wèr Timotì ce e yu nfʉr yìsèe ce saŋ ŋwà' ca nè cor Nyʉ̀ ce e yu à rla' Korèn, ker ba nè bèe Nyʉ̀ wɛɛwɛ ce a yu à ŋgǒŋ Àkayà wɛɛwɛ.

² Nyʉ̀ ce e yu yìsèe Tâ, ker ba Tata Jisos Krâis, tʉr wèe à ntee bòŋboŋ, ker fa wèe cumʉnyaŋ.

³ Sèe yoŋshi Nyʉ̀ ce e yu Tàr nè yìsèe Tata Jisos Krâis. E yu Tàr ce e ke koosimnse nè bèe, ker ce fa bèe ŋger à nfè' wɛɛwɛ.

⁴ E ke fa sèe ŋger à nfè' wɛɛwɛ ce sèe ka' ce yɛ ŋgɛ'. E ke gèe wa'a enɛ ŋwɛ̀ mò' foŋ à ka' ce yɛ ŋgɛ', sèe bo fa ŋgàŋ ŋger nè ŋger ce sèe à koni ese ye.

⁵ Ndèe ce sèe à ka' yɛ njɛ̀ɛ ŋgɛ' ce Jisos Krǎis à m yɛ, ka' ŋgɛ' anà à ka' ba gòr se ɛ̀, banɛ a ndèe ce sèe be koni ŋger njo' ye.

⁶ Wèr ka' ce yɛ mlù, wèe riŋ enɛ wèr ce yɛ tɛ mi bo fa wèe ŋger, kèr gèe tɛ wèe lûŋ. Nyʉ̀ à ka' fa wèr ŋger, banɛ wee wèe foŋ be koni ŋger anà tɛ wèe bo kur ntee, tɛɛ tatap njep ŋgɛ' ce wèe ce yɛ àmbò wèr ce yɛ na.

⁷ Wèr tʉr ntee njep wèe sê, a riŋ nè mini-ŋwɛ̀ enɛ àmbò wèe ce yɛ ŋgɛ' àmbò wer wèr ce yɛ na, wèe be koni ŋger ce wèr à koni foŋ nà ese Nyʉ̀.

⁸ Bfʉr wâ, wèr ce kòŋ enɛ wèe riŋ njɛ̀ɛ ŋgɛ' ce wèr à m yɛ à ŋgǒŋ Ɛshà. Ŋgɛ' anà à m tap sê, a ba àmbò ntɛ̀r ce yi m rìr a caa yer ŋger wa'a, wer à lo a ce kwà'shi enɛ ŋwɛ̀ be cu ntèe ka'.

⁹ Wèr à m ce kwà'shi enɛ wèr à kweŋger wɛɛ. Geewa'a, ŋgɛ' ca à m koni wèr tɛ wèr bo kù lɛ̀ buu wɛɛwɛ mbe mmbo Nyʉ̀ ce e ke fʉr bèe efa rkwe, ke' ba mbe wěr mmbò ka'.

¹⁰ E fʉr wèr efa ŋgɛ' ce e m ba yʉ wèr. E be kèr fʉr wèr. Wèr à lɛ̀ mmir ba mbe yě ndù enɛ ku ba ye ce e be kù ce fʉr wèr efa njɛ̀ɛ ŋgɛ' anà.

¹¹ Wee wèe foŋ à ba jà' à rloo nè wèr. Wèe à ka' loo, banɛ bèe magòr a be yòŋshi Nyʉ̀ njo' yuu bòŋboŋ ce Nyʉ̀ à yu' misèe mloo, a gèe nè wèr.

¹² Yuu mo' yi yu ce wèr ce nàa tu àgho, a ke' ce tarni ka'. Yuu anà yi yu enɛ wèr à cu njep ŋgòŋ na, laŋlaŋ à nfè' wèr à m ba a wěe mʉ nè ntee rara ba mini ce e lò ese Nyʉ̀. Wèr à cu wa'a ba nè bfee enjep ŋgòŋ na ka', wèr à cu ba njo' ntee bòŋboŋ ce Nyʉ̀ tʉr nè wèr.

^13-14 Mŋwà' ce wèr à saŋ nè wèe nà, buu embo wɛɛwɛ vi yu brara, a ba kùyɛɛ. Wèe à be riŋ wèr sè'ni na bòŋboŋ ka'. Banɛ m ce kwà'shi mɛnɛ wèe be lò rìŋ wèr bòŋboŋ tɛ wèe bo lò nàa tu nè wèr àmbò wèr be lò nàa nè wèe foŋ à nòŋ ce Tata Jisòs be vʉ̀.

¹⁵ M rìŋ mɛnɛ wèe be lò rìŋ wèr bòŋboŋ. Yi ka' ba wa'a, mɛ̀ kwà'shi mɛnɛ m be cà'ni wèe entòmbì tɛ wèe bo lu'shi ŋkàrà' baa.

¹⁶ Mɛ̀ m kwà'shi mɛnɛ m be ce dù à ŋgǒŋ Mɛ̀sɛ̀donìyà tɛ m caa cà'ni wèe mɛ ce kʉti, ker ca'ni wèe, tɛ wèe bo mà'shi mɛ̀ tɛ m du à ŋgǒŋ Jùdiyà.

¹⁷ Seemò' àmbò mɛ̀ m kʉti a vʉ ka' nà, wèe ce kwà'shi enɛ m yu njɛ̀ɛ ŋwɛ̀ ce e ke kupse ntee àfo àfo. Wà' m ka' ce kwà'shi yuu ce m be gèe, m kwa'shì àmbò bèe enjep ŋgòŋ na ce a ke byemi yuu, ker lo kani nà a?

¹⁸ Yi yu wa' ka'. Àmbò sèe rìŋ enɛ Nyʉ̀ yu ŋwɛ̀ mini, banɛ àde' wèr byemì à rgèe yuu ker lo kani efa rgèe yi ka'.

¹⁹ Jisos Krǎis ce e yu Muu Nyʉ̀, yu ŋwɛ̀ ce e ke byemi ker kani ka'. Yu ye ce wèr Timotì ba Silàs à m ce fè'shi àmbò ye à nfè' ce wèr à m ba a wěe mʉ nà. E yu ŋwɛ̀ ce e ce dùŋshi enɛ Nyʉ̀ e ke làa enɛ ɛ̀no, ku tɛɛ ba njo,

²⁰ njobè' e ce dùŋshi enɛ Nyʉ̀ à byemi enɛ e be gèe buu wɛɛwɛ ce e kà'. Banɛ sèe ce làa enɛ̂, “Yi yu wa'a” ba njo' ye. Sěe làa wa'a, ce ku'si ba Nyʉ̀.

²¹ Yu ye Nyʉ̀ ce e gèe sèe à tɛɛ tatap njep Krâis. Yu ye ce e ce sèe à yì bèe,

²² a ker fa sèe ncòo ce e ce dùŋshi enɛ sèe yu yì bèe. E fa yi Yʉ' njep sěe mntee, yi ba àmbò yuu ce e tɛr nè sèe enɛ sèe be koni buu wɛɛwɛ ce e kà' enɛ e be kè fa nè sèe.

²³ Mɛ̀ m vʉ̀ à rla' Korèn ka' fà dì' m bo lò gèe tɛ nyor bep wèe ka'. M ce kɛ' Nyʉ̀ enɛ e tɛɛ yà njìnsa' enɛ yuu ce m ce làa na yi yu mini.

²⁴ Yi yu enɛ wèr be vʉ̀ lòr ba ŋger ka' suŋ wèe yuu ce wèe byemi ka', njobè' wèe à tɛɛ tatap njep le rbyemì. Ler rfà' li yu ba enɛ wèr ja' wèe tɛ wèe bo yu' rbòŋ.