Kölôse 1 - Mbëtï Ndjapä: TÄFO MADƗ̈

Kə̂ pö ndə̂ azü

¹ Mëmê Pôlo, më də̈ badjângele ndə̂ Jezü Krîsiti lə̂ köbosə̂ nə̈ ndə̂ su Ndjapä nyîndə̂ nə̈, mëmê la ngâ azə̂ Timotë,

² ârâ wän mbëtï âtə sə̈ azü ndə̂ Ndjapä ndə̂ andjë sə̂ lə̂ gö ndə̂ Kölôse, azü ndə̂ andjë zâ su andjê sə̈ Krîsiti ânyë kə̈ wâ balë la tchë. Äfü pä Ndjapä Bha azə̂ mbo tchôtchô su tə̂ nyê kə̂ za zɨtɨ su sə̈ nyê.

Pôlo zä ayîabâ sə̈ Ndjapä

³ Ndə̂ ârâ âsə̈ to pö sə̈ Ndjapä logbɛ̂ bëte nyê, ârâ zä ayîabâ sə̈ Ndjapä Bha Gbölö Gbïɛ̈ ndə̂ azə̂ Jezü Krîsiti.

⁴ Bëte ârâ djê pö ndə̂kə̂ za su nyê sə̈ Jezü Krîsiti lâme nə̂, ndjë lakə̂ nyində̂ azü ndə̂ Ndjapä gbɛ̂ lâme.

⁵ Bëte sə̂nə̈ ndə̂ lëge pö ndə̂ âdə̂ Tchôtchô Pö wûtu tə̂ dokʉ̈ nə̈ lə̂ gbâtə̂ nyê, nyë zä su nyê pâ rə ndə̂ Ndjapä nyîkrə rə̂ bëte nyê bhâ lafô. Rə ndə̂ nyë zâ su nyê pânə̈ lâme mbö rə̂ ânyë nyë zâ su nyê sə̈ Krîsiti ânyë kə̈ nyîndə̂ azü ndə̂ Ndjapä.

⁶ Tchôtchô Pö nə̈ lâme wütu kə̈ zâ tchô pâ cho gbɛ̂, ânyë azü gbôtə̂ bəndɨ köbo andjê, ânyë Tchôtchô Pö nə̈ sə̂ lakə̂ êë atə̂ tchâtchu nə̈. Rə nə̈ wä ndjë kütû käko lə̂ gbâtə̂ nyê, ndə̂kə̂ to tə̂ lo nə̈ ndə̂ nyë gâmba Tchôtchô Pö nə̈, kə̈ wûnsə̂ lëge pö lə̂ köbosə̂ nə̈ ndə̂ Ndjapä mbô tchôtchô su tə̂ azü,

⁷ Ëpäfrâse, agü ârâ earə̂ kua ndə̂ ârâ nyîndə̂ yê tə̂ gbölösə̂nə̈ mû pö lâme sə̈ nyê nə̂, tche də̈ ndjë lëge earə̂ kua ndə̂ Krîsiti bëte nyê.

⁸ Tchetchë kä âkə̈ tô rə̂ sə̈ ârâ päkëdə̂: Kpɨ̂ki Yingö kä âkə̈ zâ gbôgbô tə̂ su nyê ndə̂kə̂ nyində̂ angâ nyê.

⁹ Bëte rə̂ kä ndə̂, kə̂ to tə̂ lo nə̈ ndə̂ ârâ djê pö lâme, ârâ gbôâbo tə̂kə̂ to pö sə̈ Ndjapä bëte nyê-a. Ârâ yükû nə̈ sə̈ Ndjapä ndə̂kə̂ pa tche mbo rə̂ ânyë nyë wunsə̂ apö gbɛ̂ ndə̂ su yê nyîndə̂ nə̈, kə̂ wunsə̂ rə gbɛ̂ lakə̂ wunsə̂ dju arə ndə̂ Yingö ndə̂ yê kʉ rə̂ sə̈ azü.

¹⁰ Käko äwäpä tchîsûwu ndə̂ nyê daka gbɛ̂ gundə̂sə̂ nə̈ ndə̂ Gbölö Gbïɛ̈ nyîndə̂ nə̈, ânyë nyê mbo arə ndə̂ âfû tə̂ yê. Äwäpä kə̂ wunsə̂ Ndjapä ndə̂ nyê e atə̂ tchâtchu nə̈.

¹¹ Ndjapä mboadje rə̂ ndə̂kə̂ pa nyë kpokpo tə̂ nyê tə̂ gbölösə̂nə̈ lə̂ köbosə̂ gbôgbô ndə̂ yê ndə̂ ânyîsə̂ gbölö ndə̂ yê. Käko lə̂ agbôgbô arə, nyë wä la gbôgbô, kə̂ rʉatə̂ su nyê ndə̂kə̂ krʉ bëte tchë.

¹² Nyë zä ayîabâ la mômô sə̈ Ndjapä Bha azə̂ ndə̂ tche mbô rə̂ ânyë nyë kʉ̂sə̂ kə̂ gbo atchôtchô arə bëte azü ndə̂ yê lə̂ ngbänga.

¹³ Ndjapä jï azə̂ tchâtchâ gbôgbô ndə̂ makündji ndə̂ tchə̂lə̂ bütchî kə̈ kʉ̂ azə̂ bhâlə̂ Gbölö gö-gbïɛ̈ ndə̂ Modô ndə̂ yê ndə̂ tche nyîndə̂ yê tə̂ gbölösə̂nə̈.

¹⁴ Lə̂ köbosə̂ Modô ndə̂ yê, tche jï azə̂ lə̂ angbongbo rə, kə̈ kô pö lə̂ küma azə̂ gbɛ̂.

Krîsiti wätə̂ küma arə gbɛ̂

¹⁵ Krîsiti də̈ nyîsɨ̂ Ndjapä ndə̂ akrə wâbo ndə̂kə̂ wun tchë-a. Tche də̈ dokʉ̈ Bechë tə̂ küma arə gbɛ̂ ndə̂ Ndjapä mbô rə̂.

¹⁶ Bëte lə̂ köbosə̂ yê, Ndjapä mbö arə tchêlafô la tchêbêche, arə ndə̂ akrə wûn rə̂ la arə ndə̂ akrə wûn-âbo rə̂ wûn, agbôgbô, ayingö ndə̂ tchə̂lə̂ bütchî, akümändëmä la amakündji. Ndjapä mbö rə̂ gbɛ̂ lə̂ köbosə̂ Krîsiti, bëte tchë.

¹⁷ Krîsiti wä alême dokʉ̈tchê tə̂ arə gbɛ̂, arə gbɛ̂ wä kütû bëte tchë.

¹⁸ Tche də̈ küma Egilîze ndə̂ âdə̂ tə̂ yê, arə gbɛ̂ tö tə̂ yê, tchetchë kä ndə̂ âjô lə̂ kuzü dokʉ̈tchê ndə̂kə̂ pa lə̂ arə gbɛ̂, tche sə lə̂ dokʉ̈ tchô.

¹⁹ Bëte äfü tə̂ Ndjapä ndə̂kə̂ sə gbɛ̂ lə̂ Modô ndə̂ yê.

²⁰ Ndjapä nyï ndjë ndə̂nə̈ pä tchôtchô kə̂ sə kangbâ yê lə̂ gbâtə̂ yê la arə tchêbêche ndjë la arə tchêlafô gbɛ̂ lə̂ köbosə̂ Modô ndə̂ yê. Tche zä zɨtɨ su la arə gbɛ̂ lə̂ köbosə̂ jï Modô ndə̂ yê ndə̂ âgârɨ tə̂ yö ndə̂ gba.

²¹ Nyënyê ndjë gbɛ̂, nyë wä alême tə̂ azü ndə̂ tchə̂lə̂ nyê la Ndjapä sôâ, nyë də̈ azü ndə̂ nyë kôsə̂ kə̂ za su nyê sə̈ tchë bëte angbongbo apö tə̂ su nyê ndjë la angbongbo arə ndə̂ nyë mbô rə̂.

²² Praâbalë angaâtə lə̂ köbosə̂ kuzü Modô ndə̂ yê ndə̂ tche wûn yûkü lə̂ tə̂ yê ndə̂ akrə, tchôtchô kə̂ sə kângbâ yê lə̂ gbâtə̂ nyê la Ndjapä, ndə̂kə̂ mbo rə̂ ânyë nyê krʉ tchâtchu Ndjapä batə̂ azü ndə̂ andjë wâ ngbî ânyë kə̈ dâka gbɛ̂, azü ndə̂ pö wâbô wâ lə̂ küma andjê, azü ndə̂ ngâ ngbongbo rə wâbô wâ tə̂ andjê-ê.

²³ Praâbalë äwäpä su nyë ndə̂ nyë zâ rə̂ sə̈ Ndjapä ndəpo la gbôgbô ânyë kə̂ kpokpo tə̂ yê. Nyë ëäbô ê ngrɨ̈ tə̂ rə ndə̂ su nyê wâ pânə̈ ndə̂ nyë krʉ̂ bëte rə̂ lâme sə̂nə̈ ndə̂ nyë djê Tchôtchô Pö lâme, ndə̂ a mû rə̂ sə̈ azü pâ cho gbɛ̂, ndə̂ mëmê Pôlo, më mbôtə̂ mê tə̂ earə̂ kua ndə̂kə̂ mu Tchôtchô Pö nə̈.

Kua ndə̂ badjângele Pôlo tə̂ pö ndə̂ Egilîze

²⁴ Arə̂mä, angaâtə më wä la mômô bëte rə̂ ndə̂ më sə̂ lakə̂ wun yûkü bëte nyê, bëte lə̂ köbosə̂ kə̂ wun yûkü nə̈ lâme, mê wün ndjë yûkü batə̂ rə̂ ndə̂ Krîsiti wûn ndjë rə̂ bëte Egilîze ndə̂ âwâtə̂ tə̂ yê.

²⁵ Më də̈ earə̂ kua ndə̂ Egilîze gundə̂sə̂ kua ndə̂ Ndjapä zâ rə̂ sə̈ mê ndə̂kə̂ mbo rə̂ bëte nyê: Kua nə̈ də̈ kə̂ mu pö ndə̂ Ndjapä gbɛ̂.

²⁶ Ndjapä vüsə̂ nə̈ lə̂ angû balë balë tə̂ azü gbɛ̂, ânyë kə̈ vrô lanə̈ angaâtə sə̈ azü ndə̂ yê.

²⁷ Ndjapä nyïndə̂ nə̈ pä andjë wunsə̂ atchôtchô arə ndə̂ ârô masə̂nə̈ ndə̂ tche nyîkrə rə̂ lə̂ küwû nə̈ bëte azü ndə̂ andjë wâbô wâtə̂ ajuîfu. Rə nə̈ ndə̂ tche nyïkrə rə̂ wä kâkë: Krîsiti kä lə̂ nyê ndə̂kə̂ pa nyë za su nyê ndə̂kə̂ krʉ bëte tchë ânyë kə̂ sə la tchë lə̂kə̂ wa gbölö ndə̂ yê.

²⁸ Pö ndə̂ yê kä ndə̂ ârâ mu rə̂ sə̈ azü. Ârâ krä tü andjê ndjë lakə̂ nyisə̂ rə sə̈ andjê balë balë gbɛ̂ lə̂ köbosə̂ küma ndə̂ âwâ lanə̈, ânyë akrə balë balë ge lə̂ Kpɨ̂ki Yingö lakə̂ wa balë la Krîsiti.

²⁹ Bëte rə̂ kä ndə̂, më sə̂ lakə̂ mbo kua, ânyë kə̈ sə̂ lakə̂ mbo kʉ̈ʉ̈ la gbôgbô ndə̂ âtô bhândə̂ Krîsiti, ânyë kə̈ mbô kua lə̂ mê la gbôgbô ndə̂ Krîsiti zâ rə̂ sə̈ mê, gbôgbô ndə̂ âmbô rə̂ pä më kpokpo tə̂ mê lə̂ kua nə̈.