Gälâte 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo, ndə̂ më wâtə̂ badjângele, âdə̂âbô lə̂ köbosə̂ azü kä ndə̂ a ê mê ndə̂kə̂ watə̂ badjângele-a, më djêâbo ndjë pö nə̈ lə̂ ma ngâ akrə-a, praâbalë më djë rə̂ lə̂ ma Jezü Krîsiti la Ndjapä Bha ndə̂ tche jô tchë lə̂ kuzü.

² Arə̂mâ gbɛ̂ ndə̂ andjë sə̂ bhâtə la mëmê, ârâ wän mbëtï âtə sə̈ azü ndə̂ a-Egilîze ndə̂ Gälâte.

³ Äfü pä Ndjapä Bha azə̂ la Gbölö Gbïɛ̈ Jezü Krîsiti mbo tchôtchô su tə̂ nyê, kə̂ za zɨtɨ su sə̈ nyê.

⁴ Gbölö Gbïɛ̈ Jezü yösə̂ tə̂ yê la tə̂ yê ndə̂kə̂ ji azə̂ lə̂ angbongbo arə ndə̂ tchîsûwu âtə batə̂ rə̂ ndə̂ su Ndjapä Bha azə̂ nyîndə̂ nə̈.

⁵ Voga wätə̂ andə̂ ye nə̈ logbɛ̂ logbɛ̂! Amin.

Tchôtchô Pö wä kütû balë

⁶ Tchə̂lə̂ küma mê djïngɨli tə̂ pö ndə̂nə̈ ndə̂ nyë gbôtə̂ köbo yê gasa käko, tchetchë ndə̂ tche ê nyê lə̂ köbosə̂ tchôtchô su Krîsiti ndə̂kə̂ za tchêngbâ ngâ tchôtchô pö ngbî.

⁷ Ɛ̂n-ɛ̈n! Änyïndə̂ kə̂ to rə̂ pä, ngâ Tchôtchô Pö tə̂ anə̈ âtə wâbo-a. Praâbalë azü kä ndə̂ âmbo rə̂ pä tchə̂lə̂ küma nyê djingɨli. Andjë nyïndə̂ kə̂ dodo tchə̂lə̂ Tchôtchô Pö ndə̂ Krîsiti.

⁸ Praâbalë âdə ngâ akrə, âdəndjë ârâ, âdəndjë ngâ ânje ndə̂ tchêlafô, âmu ngâ Tchôtchô Pö ngbî tə̂ anə̈ ndə̂ ârâ mû rə̂ sə̈ nyê dokʉ̈tchê lâme, äfü pä Ndjapä dra ndə̂ yê!

⁹ Ârâ tô pö âtə sə̈ nyê dokʉ̈tchê nə̂, ânyë mê kä to rə̂ âtə: Âdə ngâ akrə âmu ngâ Tchôtchô Pö ngbî tə̂ anə̈ ndə̂ nyë djê rə̂ dokʉ̈tchê lâme, äfü pä Ndjapä dra ndə̂ yê!

¹⁰ Bëte angaâtə, më pü köbo ndə̂kə̂ mbo tchôtchô rə lə̂ la azü âdəndjë lə̂ la Ndjapä? Më pü köbo ndə̂kə̂ wa djîrə̂ lə̂ la azü? Âdə mê âpu köbo ndə̂kə̂ daka lə̂ la azü, dëkë mê kä wa bata tə̂ earə̂ kua ndə̂ Krîsiti tee-a.

Köbo ndə̂ Pôlo wâtə̂ badjângele

¹¹ Arə̂mä, më tö rə̂ sə̈ nyê päkëdə̂: Tchôtchô Pö ndə̂ më mû rə̂ sə̈ nyê alême tôâbo bhândə̂ azü-a.

¹² Âdə̂âbo ngâ akrə kä ndə̂ âmû pö nə̈ âdəndjë ndə̂kə̂ nyisə̂ nə̈ sə̈ mê-a. Praâbalë Jezü Krîsiti la tə̂ yê kä ndə̂ âmbô rə̂ pä më wunsə̂ nə̈.

¹³ Bëte nyë djê pö pâ köbo kə̂ mbotə̂ mê ndə̂ gbô mê ndə̂po alême lakə̂ voga Ndjapä batə̂ rə̂ ndə̂ ajuîfu mbo rə̂. Nyë wûnsə̂ nə̈ nə̂ pä më mbö gbôgbô alême tə̂ gbölösə̂nə̈ tə̂ Egilîze ndə̂ Ndjapä, kə̈ pû köbo ndə̂kə̂ ndɨ rə̂.

¹⁴ Lə̂ köbosə̂ kə̂ voga Ndjapä ndə̂ ajuîfu, më rö angbängbä ajuîfu ndə̂ ngû mê la andjê wâ balë pâ mawo ndə̂ mê. Më zätə̂ mê gbɛ̂ ndə̂kə̂ mbo rə gundə̂sə̂ kə̂ mbo rə ndə̂ araâta mê.

¹⁵ Praâbalë Ndjapä zä mê ngbî ndə̂ gbô mê ndə̂po bhâlə̂ anyï mê. Tche ë mê lə̂ köbosə̂ tchôtchô su yê tə̂ lo nə̈ ndə̂ tche nyîndə̂,

¹⁶ kə̈ nyîsə̂ Modô ndə̂ yê sə̈ mê, ndə̂kə̂ pa më nyisə̂ yê batə̂ Tchôtchô Pö sə̈ azü ndə̂ andjë wâbô wâtə̂ ajuîfu, kə̈ yûâbo ngâ akrə balë ndə̂kə̂ pa tche za wängö sə̈ mê-a,

¹⁷ kə̈ êâbo ndjë atə̂ Jerûzalêmo ndə̂kə̂ wun andjanə̈ ndə̂ andjë wâtə̂ abadjângele dokʉ̈tchê tə̂ mê-a. Praâbalë më ë atə̂lə̂ agö ndə̂ Arabï. La tchêngbâ nə̈ më kâ atə̂lə̂ gö ndə̂ Dämâse.

¹⁸ Pânə̈ ngbâ ngû vötaâ, më ê atə̂ Jerûzalêmo ndə̂kə̂ pa mëmê la Pîêre, ârâ wunsə̂ angâ ârâ. Më sə̈ bhândə̂ yê lə̂ lö lə̂ könô gbɛ̂ tchêpâ nə̈ mïndûu.

¹⁹ Më wûn-âbo ngâ badjângele ngbî-a. Praâbalë më wün kütû Jâke, yîngâ Gbölö Gbïɛ̈.

²⁰ Pö ndə̂ më mbô rə̂ lə̂ mbëtï sə̈ nyê âtə, më tö rə̂ lə̂ la Ndjapä, më môâbo yepa-a.

²¹ La tchêngbâ nə̈ më ê kulə̂ agö ndə̂ Sirï la andə̂ Silisï.

²² Praâbalë azü ndə̂ a-Egilîze ndə̂ Krîsiti ndə̂ andjë sə̂ bhâ Judë wûn-âbo mê lo balë-a.

²³ Andjë djë kütû apö ndə̂ azü to rə̂ päkëdə̂: «Köchë ndə̂ tche mbô gbôgbô tə̂ azə̂ alême, angaâtə tchetchë kä ndə̂ âmu pö pâ köbo ndə̂kə̂ za su sə̈ Jezü ndə̂ tche nyîndə̂ kə̂ ndɨ rə̂ alême.»

²⁴ Käko azü nə̈ vôga Ndjapä lə̂ köbosə̂ mê.