Maliko 1 - Ulufingo Ulupya

Ubulumbilili ubwa Yohani Uwalozyo

¹ Agha gho Mazyu Amiza, ghagho ghakunena nizya Yesu Kilisitu, u Mwana uwa Chala.

² Ghakanda ngati mumo umulaghuzi u Yesaya akasimbila ukuti, “U Chala akati, ‘Nkwiza pakuyituma intumi yane kuntazi kukwako pakukuyanizizya izila.’

³ Izyu ilya muntu yumo likukolomoka munkolongo likuti, ‘Yannya umusebo uwa Mwene, gholosya izila ukuti endemo!’ ”

⁴ U Yohani akaboneka munkolongo, akulumbilila nu kozya. Akababuzya abantu akati, “Pinduka nukuzileka imbibi zyinyu nukoziwa, po u Chala akwiza pakubahobokela imbibi zyinyu.”

⁵ Abantu bosi aba muchigaba icha Yudeya naba mu Yelusalemu bakiza kukwache. Bakilata imbibi zyabo nukoziwa nu Yohani mulusoko ulwa Yolodani.

⁶ U Yohani akavwalagha amenda aghameya agha ngamila nu lamba uwikwela mumusana wache, po ichakulya chache chikaba we kanta nu buchi.

⁷ Akalumbililagha akati, “Pisinda papane pakwiza yumo uwamaka ukunchila. Ane ntabaghiye napo panandi pakwinama nukusatula utupinyilo utwa nkwato zyache.

⁸ Ane inkubozya na mizi, loli akwiza pakubozya nu Muzimu Umuzelu.”

Ukoziwa nu kuyeliwa kwa Yesu

⁹ Pakabalilo kalakala u Yesu akafuma mukaya aka Nazaleti muchigaba icha Galileya, po u Yohani akamozya mulusoko ulwa Yolodani.

¹⁰ Bo u Yesu azubuka mumizi, akennya kumwanya kukwighuka, sona u Muzimu Umuzelu akamwikila ngati yo nkunda.

¹¹ Po izyu likivwika kumwanya likati, “Awe we Mwana wane umughaniwa. Ihobokite nkani nawe.”

¹² Panapo na panapo u Muzimu Umuzelu akamusendela u Yesu munkolongo,

¹³ mumo akikala amasiku 40, ukuyeliwa nu Satana. Ivinyamana ivya munkolongo vyope vikaba mulamula, loli abantumi aba kumwanya bakiza pakumwavwa.

U Yesu akubitizya abalobaswi folo

¹⁴ Bo u Yohani bamwighalila mujele, u Yesu akabuka mu Galileya pakulumbilila Amazyu Amiza agha Chala.

¹⁵ Akati, “Akabalilo kakwana, u Chala ali papipi pakwikazya Ubumwene bwache! Pinduka nukuzileka imbibi zyinyu nukwitika Amazyu Amiza!”

¹⁶ Bo u Yesu akwenda mulubazu ulwa Nyanja iya Galileya akennya abalobaswi babili, u Simoni nu wamwabo u Andeleya, bakuloba iswi ni chilepa.

¹⁷ U Yesu akati, “Nkonka, inkwiza pakubapela pakuba baloba bantu.”

¹⁸ Umwalubilolubilo bakavileka ivilepa vyabo nukumukonka.

¹⁹ Bo u Yesu enda panandi, akamwennya u Yakobo nu wamwabo u Yohani, abana aba Zebediya. Bakaba mubwato pakuyanizya zila ivilepa vyabo.

²⁰ Bo u Yesu abennya bulo, akabitizya. Bakamuleka uwise u Zebediya mubwato na bambombo bache nukumukonka u Yesu.

Umuntu uwa muzimu umubibi

²¹ U Yesu na bamanyili bache bakabuka kukaya aka Kapelinahumu. Pisiku Ilyakutuzya u Yesu akinjila munyumba iyakwiputilamo aba Yuda nukwanda pakumanyizya.

²² Abantu babo bakamwivwa bakaswigha nkani namumo akamanyizizya. Atakamanyizya ngati bo bamanyisi aba Ndaghilo, loli akamanyizya ngati we mwenecho uwa bulaghili.

²³ Panapo umuntu uwa muzimu umubibi akiza munyumba iyakwiputilamo nukukolomoka ukuti,

²⁴ “Wee Yesu uwa mu Nazaleti, ukulonda ichoni naswe. Nkimba wiza pakutunangannya? Inkumenye! Awe we ntumi izelu iya Chala!”

²⁵ U Yesu akaghulamula umuzimu umubibi ghula akati, “Banga myee, sona epamo mu muntu uyu!”

²⁶ Umuzimu umubibi ghukamuneng'ennya nkani nukukolomoka nukwepamo mumwache.

²⁷ Abantu bosi bakaswigha nkani, umwakuti bakanda pakunenezannya benebene ukuti, “Cho choni chinichi? Nkimba chimanyisyo ichipya? Umuntu uyu ali nu bulaghili pakulamula imizimu imibibi nukumwivwila!”

²⁸ Po ipangwi ilya Yesu likasata umwalubilolubilo posi na posi muchigaba icha Galileya.

U Yesu akubapozya abantu abinji

²⁹ U Yesu na bamanyili bache poka nu Yakobo nu Yohani bakepamo munyumba iyakwiputilamo nukubuka kunyumba iya Simoni nu Andeleya.

³⁰ Unyinavyala uwa Simoni akalambalala pachifukwa icha zekema. Bo u Yesu afika, bakamubuzya nizya bubine ubwa mukolo yula.

³¹ U Yesu akabuka ku mukolo yula, akamulema inyobe nukumwavwa ukuti imilile. Akapola nukwanda pakubabombela.

³² Pachamabwila bo izuba lyinjila, abantu bakiza na bantu ababine bosi poka na bantu babo bakaba ni mizimu imibibi.

³³ Abantu bosi mukaya mula bakabungana palubinjilo ulwa nyumba.

³⁴ U Yesu akapozya abantu abinji babo bakaba nu bubine ubwakulekanalekana nukwefya imizimu imibibi imyinji. Atakayitikizya ukuti yinene chimo, pachifukwa chakuti yikamumanya.

U Yesu akulumbilila muchigaba icha Galileya

³⁵ Pandabindabi nkani, u Yesu akanyamuka nukwepapo panyumba pala. Akabuka kuzi kukaya kala, kubuzilo kuko kutakabako abantu nukwiputa.

³⁶ Loli u Simoni na bamwabo bakabuka pakumulondelezya,

³⁷ bo bamwagha bakati, “Abantu bosi bakukulonda.”

³⁸ Loli u Yesu akabamula akati, “Twende tubukaye mutwaya utunji tuto tuli papipi. Imbaghiye pakulumbilila mope pakuti cho chicho nkizila.”

³⁹ Po akenda muchigaba chosi icha Galileya pakulumbilila munyumba izyakwiputilamo nukwefya imizimu imibibi.

U Yesu akupozya umuntu uwa mambombo

⁴⁰ Umuntu yumo uwa mambombo akiza kwa Yesu, akamufughamila nukwanda pakumulaba ukuti, “Nanti ukulonda, unswefye ane.”

⁴¹ Ichisa chikamulema u Yesu, akagholosya inyobe yache nukumupalamasya. Akamula akati, “Nkulonda, swepa!”

⁴² Panapo na panapo amambombo ghala ghakamala nukumuleka aswepite.

⁴³ Po u Yesu akamusoka nkani nukumubwezya,

⁴⁴ akamubuzya akati, “Ivwa kuno! Utakamubuzyepo nayumo umuntu. Loli bukagha wilanjizye ku muputi ukuti akupime ukuti abantu bosi bamanye ukuti wapola, ubike ichabupi chicho u Mozesi akalamula.”

⁴⁵ Umuntu yula akanyamuka nukwanda pakufumusya zizyo zikabombiwa kosi kuko akabukagha, umwakuti u Yesu akapotwa pakubuka pabuzelu mukaya kosi. Loli akikala kubuzilo kuko kutakabako abantu, po abantu bakiza kukwache ukufuma kosi na kosi.