VAROMA 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ninzi Paulu, murumishi wa Yesu Kristo, warovolwa khuva murumwa, khandi nalaangwa na Nyasaye khwilwatsa Ivanjeli ya Nyasaye.

² Ivanjeli neyo yali ni yalaakwa mumatukhu kakhale na Nyasaye, khuvirila mu vaprofeti veve, khuli kahandikwa mu Mahandiko Matakatifu

³ khulondokhana khu Mwana wewe, uli mwitsukhulu wa Daudi, mu vandu vu lwivulu, khuli vandu vivulwangwa;

⁴ khulondokhana khu liiva lielie liu vutakatifu, yamanyinywa khuvirila mu tsingulu tsinyishi khuva Mwana wa Nyasaye, lwa yamwisimushitsa khurula mu likhutsa.

⁵ Khwanyola tsimbavasi khuvirila muye khuva murumwa, khwenya khulomba vandu vi tsimbia tsindi, khumenya khulondokhana khu lisuuvila shichila lira lielie.

⁶ Khali munyi, muli valala khuvo, lwa mwalaangwa khuva va Yesu Kristo.

⁷ Khulwa yako, mbandichilanga munyi voosi, vamuli mu litaala lia Roma, va Nyasaye yayaanza, khandi namulaanga khuva vandu veve mwene. Nyasaye, uli Tata nende Mwami weru Yesu Kristo vamulolele tsimbavasi khandi vamuhe milembe.

Lisaala lia Paulu liu Khusanditsa Nyasaye

⁸ Lukhuraanga, sanditsanga Nyasaye wanje, khuvirila mu Yesu Kristo shichila munyi voosi, lwa vandu voosi shia havundu hosi mu shivala vahulilanga makhuva khulondokhana khu lisuuvila lienyu.

⁹ Nyasaye neye mushiahidi wanje ndi mbolanga katoto. Nyasaye neye wa ndumishilanga nu mwoyo kwanje kwosi, lwa nzilwatsanga Ivanjeli khulondokhana khu Mwana wewe. Nyasaye wamanya ndi mwitsushitsanga shia khase khosi,

¹⁰ mu lisaala lianje. Ndevanga ndi niiva Nyasaye alayaanza nikanyalikha, nyala khumuchendelelakhu.

¹¹ Ndi na maluhu ku khumulolakhu, khwenya khusanga na munyi shihanwa shirulanga khu Roho, khumukhola khuva ni tsingulu --

¹² nakhwo khuvoola, inzi nende munyi, khutinyilitsane khuvirila mu lisuuvila lia shia mulala.

¹³ Vasuuvili vashianje, khutukha mumanye ndi nakanakana hali khanyishi khwitsa khumuchendelela, navutswa shindu shiamboha lung'anyi shia khase khosi, khwenya khuvula khumuchendelela. Nyenyanga nyole khandi valondi khurula mu munyi, khuli ndi navo mu vandu vi tsimbia tsindi.

¹⁴ Ndi nu muhinzilu ku khukhonya vandu voosi, vave Vaguriki inoho vandu vi tsimbia tsindi, vandu vasoma inoho vandu vashili khusomakhu.

¹⁵ Ndi nu vuha vu khumwilwatsilakhu khandi Ivanjeli, munyi vamumenyanga mu litaala lia Roma.

Ivanjeli ya Yesu ili ni Tsingulu

¹⁶ Mbulakhu tsisoni tsiosi, lwa nzilwatsanga Ivanjeli. Nayo tsingulu tsia Nyasaye, tsiu khuhonyinya shia mundu wosi uli ni lisuuvila, lukhuraanga Vayahudi nende vandu vi tsimbia tsindi khandi.

¹⁷ Ivanjeli imanyinyanga makhuva khulondokhana khuli Nyasaye akholanga vandu khuva valunji imbeli wewe: nu khuvirila mu lisuuvila khurula muliraanga khutukha mulimalilikha. Khuli Mahandiko Matakatifu kavoolanga, “Mundu wa Nyasaye akholi khuva wi likhola liu vulunji, neye uliitsa khuva mwoyo khuvirila mu lisuuvila.”

Vandu Voosi ni Voni

¹⁸ Nyasaye umali khumanyinya vurima vwevwe khurula mwikulu khulondokhana khu vwoni nende vutamanu vwosi vwa vandu vakholanga khwikalila katoto.

¹⁹ Nyasaye avasalilitsanga, lwa vamanya shia shindu shiosi havulavu khulondokhana khuye, shichila Nyasaye mwene neye wavamanyinya havulavu.

²⁰ Khurula Nyasaye naloonga likulu nende lilova, liiva lielie liu khuvula khulola, khali tsingulu tsietsie tsi mihika ni mihika nende liiva lielie litakatifu, viamala khulolekha havulavu; vilolekhanilanga mu vindu viosi via Nyasaye yalomba. Khulwa yako, vandu venavo vavulakhu shivune shinyala khuchila vihonoloshe!

²¹ Khali niiva vamanya Nyasaye, vambakhana khumuha luyali inoho khumusanditsa lwa ali Nyasaye; navutswa tsinganakani tsiavo tsiali tsiasuluhala, khandi vwoongo vwavo nu vukoyana.

²² Vikholanga vali nu vusitsa, navutswa ni vayiingwa;

²³ Vukhala vu khusaala khu Nyasaye uli mwoyo mihika ni mihika, vasaalanga khu vifwanani vialombwa khusasa likoondo liu mundu utushili khukhutsa, inoho manyonyi inoho tsinyama inoho vindu vimolanga hasi.

²⁴ Khulwa yako, Nyasaye wavalekha vakhole vindu vi shifwavi via vikombanga khukhola mu mioyo chiavo; khandi vakholelananga vene mu mivili chiavo vindu viu khuheelelana tsisoni.

²⁵ Vakalukhanyinyanga katoto, khulondokhana khu Nyasaye khukwa vuvehi; nivasaala khandi nivarumishila vilombe via Nyasaye yaloonga, vukhala vu khusaala khu Muloonji mwene, utushili khwitsominywa mihika ni mihika! Amina.

²⁶ Lwa vakholanga ndio, Nyasaye wavalekha mu likomba liavo liu khuvalerela tsisoni. Khali vakhali vavo vakonanga na vakhali vandi, vuchila khukona na vasatsa vavo.

²⁷ Khali vasatsa vakholanga malala mele, shichila valekhanga khukona na vakhali vavo; khali vakona vene khuvene. Vandu vasatsa vakholanga vindu vi tsisoni na vasatsa vandi; khwilerela vene lisalilitswa khurulana khu vikholwa vitamanu via vakholanga.

²⁸ Lwa vandu yava vambakhananga khutsililila khulonda vucheli vwatoto khulondokhana khu Nyasaye; Nyasaye wavalekha valonde tsinganakani tsiavo tsingoyanu, nu khukhola vindu via vatushili khuvula khukhola.

²⁹ Vayitsula vwoni vunyishi lukanu, vutamanu, vung'wang'wa, miima chindi mitamanu minyishi lukanu na lukanu; imbotokha yayitsula muvo, ni viiri, vayaanza khukwana, ni vakaati, khandi vikombelanga vandi vindu vitamanu. Ni vamoonyi;

³⁰ khandi valomoloma vindu vitamanu khu vandi; vayambakhana khuyaanza Nyasaye; vanyekanga vandi, vayilola, khandi vayichinjilila; vakanakananga tsinjila tsinyishi lukanu na lukanu, tsia vanyala khukholelamu vindu vitamanu; vayambakhana khuha vivuli vavo luyali;

³¹ vavula tsinganakani tsiu mukari tsindahi; vayambakhana khurweshitsa lilaaka liavo; khandi valekha khulolela vandi malahi inoho khuvavela tsimbavasi.

³² Vamanya ndi Malako ka Nyasaye kavoolanga ndi vandu vamenyanga limenya khuli lienelo vatukhananga khukhutsa. Khali ndio, shikali vatsilililanga khukhola vindu vienevo vionyene tawe; navutswa khali vayaanzanga vandu vakholanga vindu khuli vienevo.