NAHUMU 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Yili nalio likhuva lia Nyasaye shichila litaala lia Nineve, khuli kahandikwa mu shitabu shia Malolo ka Nahumu wi litaala lia Elikoshi yalola.

Vurima vwa Nyasaye khu Nineve

² Mwami Nyasaye ni Nyasaye wi lishiendekha, avanzilanga, Mwami Nyasaye avanzilanga khandi nu mululu; Mwami Nyasaye avanzilanga vatsiku veve, khandi alulilanga vatsiku veve.

³ Mwami Nyasaye avula vurima vu vwangu, navutswa wayitsula tsingulu, khali asalilitsanga vandu vali nu vutamanu. Alolekhanga khuli shihungutsi nende imbuutsa; malesi kalolekhanga khuli lukuushi lutuumukhanga lwa aviranga.

⁴ Akondeshelanga inyanza, nu khuchikhaaminya, yuminyanga michela chiosi; khali lwayilu lwa Bashani nende Shikulu shia Karameli vinialanga, khali mawua ka Lebanoni kavungulukha.

⁵ Vikulu vitechelanga imbeli wewe, khali rukulu ruyekukhanga; lilova litechelanga imbeli wewe, halala ni shivala nende vindu viosi vimenyamu.

⁶ Ni viina unyala khwihonolokha khurula mu vurima vwa Mwami Nyasaye? Ni viina unyala khwikhutsila vurima vwevwe vululu? Vurima vwevwe vumemanga nu vuhemukha khuli mulilu, khali tsinyanda tsiatikhananga mu vitonye shichila ye.

⁷ Mwami Nyasaye nu mulahi, ali khuli imbinga mumatukhu ku vutiinyu; alindanga vandu vilushilanga muye.

⁸ Navutswa vatsiku nivaseera shivala khuli matsi ki michelelo, neye uvativitsanga; avahitsanyinyanga vakorela mu shisuundi.

⁹ Ni shina shia muloshitsanga khukhola Mwami Nyasaye? Neye uliitsa khumutivitsa, mutsiku avulakhuho wa aliitsa khuvanzila hali khavili.

¹⁰ Vatsiku veve valiitsa khulaalitswa nu mulilu khuli shisakha shia mavwa; valiitsa khutivitswa khuli vunyasi vumakanu.

¹¹ Mundu warula mu munyi, ukanakanilanga Mwami Nyasaye likhola litamanu, wukhavanga inganakani yu khukhonywa khurula khu vandu vatamanu.

¹² Mwami Nyasaye avoolelanga vandu veve, “Khali niiva Vashuria vali ni tsingulu tsinyishi khandi ni vanyishi, valiitsa khwiirwa nu khutivitswa. Khali niiva ninzi wachila numunyakhana, niitsa khulekha khumunyashitsa khali hati hene.

¹³ Niitsa khumenekanyinya tsingulu tsia Vashuria shichila munyi, khandi ndemakanyinyi minyololo chia mwavohwa.”

¹⁴ Mwami Nyasaye umali khuhaana malako keke shichila yivi Nineve, “Mundu avulakhuho uliitsa khukhukulikha numali khukhutsa. Niitsa khutivitsa vifwanani via walomba nende vifwanani via wakhonga khurula mu litempeli lia vanyasaye venyu. Ninzi uliitsa khukhuyeveela shilindwa shioshio, shichila utushili khukhutsa.”

¹⁵ Loli! Murumwa yitsanga narula mu vikulu, nalera makhuva malahi! Aleranga likhuva li milembe; Munyi vandu va Yuda, mwikhoyele milukha chienyu, nu murweshitsa ka mwisuuha muliitsa khukhola; shichila litukhu livulakhuho liu mundu mutamanu aliitsa khumuseera khandi; shichila wamala khutivitswa.