DANIELI 1 - IBIBILIA INDAKATIFU MU LUTIRICHI LWITAKHO NENDE LWISUKHA

Vasatsa Vavukha mu Lwanyi lwa Nebukadineza

¹ Khumuhika kwa khavaka muliamiha liu Mwami Yehoyakimu wa Yuda, Mwami Nebukadineza wa Babilonia yitsa mu litaala likali lia Yerusalemi, nalivotokhana.

² Mwami Nyasaye yamuha tsingulu tsiu khukumila Mwami Yehoyakimu wa Yuda, khandi navukula vindu vilala mu Litempeli lia Nyasaye. Yahila vindu vienevo mu shivala shia Babilonia, navikha mu livishilu lia vanyasaye veve.

³ Nalwo lwa Mwami Nebukadineza yavoolela mundu walaangwangwa Ashipenazi mwimilili wi vitsili, atsi khurovola vandu valala mu Vaisraeli, varulanga mu vandu vi inzu yu vwami khandi mu tsinzivulu tsiali nitsiaheelwa luyali tsia vimilili.

⁴ Vandu venavo khutukha vave vavukha vuchila imbala yosi khu mivili chiavo, vi likoondo lilahi, veechitswa vulahi mu vusitsa vwosi, vacheliha, vali ni limanya liu khweka, khandi vatushili khukhola mihinzilu mu inzu yu Mwami Nebukadineza. Ashipenazi yavoolelwa aveechitsi khuli vanyala khuhandika nu khusoma lulomolomo nende mahandiko ka Vababilonia.

⁵ Mwami Nebukadineza yahaana lilako vaheelwi khu shia litukhu shiukhulia nende idivai shilala khuli lwa vandu vi inzu yu vwami vanyolanga. Vandu venavo venyekhanga khwechitswa khumihika chivaka, nu khukhola muhinzilu ku Mwami Nebukadineza nivamali khwechitswa khumihika chienecho.

⁶ Vandu varovolwa vali Danieli, Hanania, Mishaheli nende Azaria; nivali voosi vandu vuluhia lwa Yuda.

⁷ Mwimilili wasinjililanga vitsili viu mu inzu yu vwami yavakulikha mira kandi; yakulikha Danieli lira Beliteshaza; Hanania namukulikha Shadaraka; Mishaheli namulikha Meshaka; khandi nakulikha Azaria lira Abedinego.

⁸ Navutswa Danieli yakanakana, manaviritsa avuli khuva woneshe mwene nalia shiukhulia nende idivai ya vandu vi inzu yu vwami vaheelwangwa. Yareeva mwimilili wasinjililanga vitsili nayaanza amuleshe khuvula khulia vindu vinyala khumwononyinya munjila yeneyo.

⁹ Navutswa Nyasaye yachila Ashipenazi nava nu mwoyo mulahi khandi nalolela Danieli mwoyo kwi tsimbavasi.

¹⁰ Navutswa Ashipenazi yali waria Mwami Nebukadineza. Nalwo lwa yavoolela Danieli, “Mwami Nebukadineza wamala khuviritsa shiukhulia shioshio nende shiu khung'wa; khandi niiva utsitsanga khuvula khuva mukhomeelu khuli vasatsa vandi vavukha vi likhula liolio yavo, anyala khunziira.”

¹¹ Khulwa yako, Danieli yavoolela murumishi wa Ashipenazi, wali mwimilili wi vitsili yali niyarovolwa khumulinda ye mwene, Hanania, Mishaheli nende Azaria,

¹² “Nuyaanza khuhe khutsi varumishi vovo lichela khumatukhu likhomi. Huchilila vakhuhe vutswa tsingutsa tsiu khulia nende matsi ku khung'wa.

¹³ Nalwo lwa witsa khukhusasanyinya na vasatsa vavukha valiitsanga shiukhulia nende vandu vi inzu yu vwami; khandi ukhukhole khutsi varumishi vovo khuli lwa mwene, uliitsa khuva nuloli.”

¹⁴ Yahuchilila makhuva ka yali navoolelwi kenako, navaha lichela khumatukhu likhomi.

¹⁵ Lwa matukhu likhomi kali nikavwele, kalolekha ndi ni vakhomeelu khuvira vasatsa vavukha voosi valiitsanga shiukhulia shia vandu vi inzu yu vwami.

¹⁶ Khulwa yako, mulindi mwenoyo yavukula shiukhulia shia vali nivaheelwa valii nende idivai ya venyekhanga vang'wi; navaha tsingutsa tsiu khulia.

¹⁷ Nyasaye yaha vandu vane venavo vucheli nende limanya khulondokhana khu mahandiko nende vusitsa. Danieli yali wamanya shia shindu shiosi khulondokhana khu malolo nende malooro koosi.

¹⁸ Lwa matukhu kali nikaviritswa nu Mwami Nebukadineza, ka vasatsa vavukha venavo vahilwa mushiina katukha, muruchi wasinjililanga vitsili yavalera khu Mwami Nebukadineza.

¹⁹ Mwami Nebukadineza yalomoloma navo voosi, navutswa mundu avulakhuho wa yanyolakhu khurula khuvo wanyala khusasanyinya khu Danieli, Hanania, Mishaheli nende Azaria. Khulwa yako, vakhola muhinzilu ku Mwami Nebukadineza.

²⁰ Isaa yosi yu Mwami Nebukadineza yavareevanga likhuva khulondokhana khu vusitsa nende limanya, ya vanyola khuva valahi muno hali likhomi khuvira valoochi inoho vakhumu mu shivala shieshie shia yamihanga shiosi.

²¹ Danieli yatsililila khumenyayo khutukha khumuhika ku khuraanga muliamiha liu Mwami Kureeshi.