2 VAMI 1 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Nyasaye Yakhalachila Ahazia

¹ Lwa Mwami Ahabu wa Israeli yali niyakhutsa, shivala shia Moabu shiahinganyinya Israeli.

² Litukhu lindi, Mwami Ahazia wa Israeli yakukha khurula khu shisoko shili khu shisechese shi inzu yeye yu vwami mu litaala lia Samaria, nasalila vululu muno. Nalwo lwa Mwami Ahazia yaruma varumwa, khutsia khurunishitsa khu Baali-zebubu, wali nali nyasaye wi litaala lia Vafilisti lialaangwangwa Ekuroni, khuruna niiva anyala khuhona inoho khuvula khuhona.

³ Navutswa injelosi yu Mwami Nyasaye yavoolela Eliya, wali nali muprofeti wi litaala lia Tishibe, atsi khwakanila varumwa vu Mwami Ahazia wa Samaria, nu khuvareeva, “Shichila shina mutsitsanga khurunishitsa khu Baali-zebubu, nali nyasaye wi litaala lia Ekuroni? Mukholanga ndio, shichila mukanakananga khuvulakhu Nyasaye mu Israeli?

⁴ Simushi mutsi khuvoolela Mwami Ahazia ndi Mwami Nyasaye avoolanga, ‘Shiuliitsa khuvukha khu shitali shiukonikhu tawe; navutswa ni kilikali utsitsanga khukhutsa!’ ” Eliya yakhola khuli Mwami Nyasaye yamuvoolela.

⁵ Varumwa venavo vakalukha khu Mwami Ahazia. Yavareeva, “Shichila shina numukalukha vwangu?”

⁶ Varumwa venavo vamuchipa, “Khwakani nu mundu, umanyi nakhuvoolela, ‘Kalushi khu mwami wamuruma, mumuvoolele, Mwami Nyasaye avoolanga: Shichila shina urumanga varumwa khutsia khurunishitsa khu Baali-zebubu, nali nyasaye wi litaala lia Ekuroni? Ukholanga ndio, shichila ukanakanga khuvulakhu Nyasaye mu Israeli? Shiuliitsa khuvukha khu shitali shiukonikhu tawe; navutswa ni kilikali utsitsanga khukhutsa!’ ”

⁷ Mwami Ahazia yavareeva, “Nu mundu shina wamwakana naye namuvoolela ndio?”

⁸ Vamuchipa, “Yali wifwali inguvu yalombwa khu liseelo liu muruku, niyivohi lukhaanda mu shisiindi mwemwe.” Mwami Ahazia yavoola, “Ni Eliya, urulanga mu litaala lia Tishibe!”

⁹ Nalwo lwa Mwami Ahazia yaruma mwimilili wa vasikali makhomi karanu khutsia khulera Eliya. Mwimilili wa vasikali mwenoyo, yamunyola niyikhale khu shikulu; namuvoolela, “Yivi mundu wa Nyasaye, Mwami Ahazia avoolanga ukholomoshe hasi vwangu.”

¹⁰ Navutswa Muprofeti Eliya yamuchipa, “Niiva ndi mundu wa Nyasaye, saalanga ndi mulilu kuruli mwikulu, khumulula yivi nende vasikali vovo makhomi karanu!” Nalwo lwa mulilu kwarula mwikulu khandi nu kuyeelitsa mwimilili wa vasikali mwenoyo, nende vasikali veve makhomi karanu.

¹¹ Mwami Ahazia yaruma mwimilili wa vasikali wundi nende vasikali makhomi karanu khutsia khulera Eliya. Mwimilili wa vasikali mwenoyo yavoolela Eliya, “Yivi mundu wa Nyasaye, Mwami Ahazia avoolanga ukholomoshe hasi vwangu!”

¹² Navutswa Eliya yamuvoolela, “Niiva ndi mundu wa Nyasaye, saalanga ndi mulilu kuruli mwikulu, makuyeelitsi yivi halala na vasikali vovo makhomi karanu!” Nalwo lwa mulilu kwa Nyasaye kwarula mwikulu, nu kuyeelitsa mwimilili wa vasikali mwenoyo, nende vasikali veve makhomi karanu.

¹³ Litukhu lindi khandi, Mwami Ahazia yaruma mwimilili wa vasikali wundi halala na vasikali veve makhomi karanu. Mwimilili wa vasikali wa khavaka mwenoyo, yatikulukha natsia khusikama imbeli wa Eliya; namusaya navoola, “Yivi mundu wa Nyasaye, nuyaanza mbelelela tsimbavasi inzi nende varumishi vovo yava. Lekha khuvativitsa!

¹⁴ Vimilili vavili vandi va vasikali nende vasikali vavo viirwa nu mulilu kwarula mwikulu; navutswa nuyaanza mbelela tsimbavasi!”

¹⁵ Injelosi yu Mwami Nyasaye yavoolela Eliya, “Kholomokha hasi naye; lekha khuria.” Nalwo lwa Eliya yasimukha natsia nu mwimilili wa vasikali mwenoyo khu Mwami Ahazia,

¹⁶ namuvoolela, “Mwami Nyasaye avoolanga, ‘Lwa urumi vandu khutsia khurunishitsa khu Baali-zebubu, nali nyasaye wi litaala lia Ekuroni -- khuli khuvulakhuho Nyasaye mu Israeli, wa munyala khutsia khurunishitsa khuye - shiuliitsa khuhona tawe; navutswa ni kilikali, utsitsanga khukhutsa.’ ”

¹⁷ Khulwa yako, Mwami Ahazia yakhutsa, khuli Mwami Nyasaye yali niyavoola khuvirila khu Eliya. Ahazia yali nashili khwivulakhu mwana wi shiyayi wosi. Amwavo wewe walaangwangwa Yoramu yamiha havukono hehe khumuhika kwa khavili, lwa Mwami Yehoramu mwana wa Yehoshafati yamihanga Yuda.

¹⁸ Shia shindu shindi shiosi shiu Mwami Ahazia yakhola shiahandikwa mu Shitabu shi Tsinyinga shia Vami va Israeli.