Philipi 1 - Niu Testament 1956 (Manus PNG)

Heb nongen hanu.

¹ Iouoro Paulus e Timoteus iou lao dandendegei ad Jesu Kristo, iou beani nongen hian ge le ndro su lao helian ad Jesu Kristo ber gor Philipi, dagara le ndro su labenen ber lodu, ma le ndro su lao dandendegei.

² Golnisden ad Jehova e mandri ad Ndorlaben, i Damen adu, ma ad Ndorlaben Jesu Kristo i da ge ndro mu.

Paulus i bamugueni Ndorlaben le mburer hian i da le gor Philipi.

³ Io bamugueni Jehova, Ndorlaben ordo, be io hanguruen mu.

⁴ Be io ha lodu le ndro i, io hanguruen mu masi le raring ordo, io ha mugmug le ademu.

⁵ Be io hanguruen bern ademu monen ge, mu da gin somui le nongen ber lang, ar mu gin hirong leri. Mu gin bogulue nongen le bergolmu mabenan range.

⁶ Io dono i, i ge, i da gin bo mburer le bergolmu, dagara i ghinen mburer ogo le bergolmu boen, be rang ad Jesu Kristo na gmehere, be Ndorlaben i gmeher lie me ndro du.

⁷ Aga i monen ge be io hanguruen hian le ademu. Sidesi io hanguruen mu le bergolo, mu masigane mu da gin sobani io, be io da le kalabus, mu gin sobani io le bohernou le ndro su, longu ad Ndorlaben, ehe, mu gin sobani io le mburer, Ndorlaben gin daui le bergolo.

⁸ Jehova i danen i, bergolo gunuen hi bui le ndro mu masi, golnisden ad Jesu Kristo.

⁹ Io ha soling ndro i, golnisden ademu i menda gle mabosanged, boen danmu hanguruen monen ge le longu hendre e hendre.

¹⁰ Ndorlaben i danen bogulue mu, mu hian monen ge mabenan rang ad Kristo na gmehere, ar Ndorlaben i gmeher lie.

¹¹ I danen hengen le ndro mu, sengen ademu gin reg hian ge gle ndoui ad Jesu Kristo, le bamugueni Jehova gleri.

Paulus boharni heb nongen le aden.

¹² Mu ndere hian, io ha lengi i, danmu longu hendre e hendre, i da gin meher ndro io, longu masigane i gin sobani io le bohernou nongen hian ber lang le ndro su.

¹³ Ngarnongen gin hilou le ndro su polisboi masi ad Sesar, ngarnongen gin hilou le horo ma le horo, su gin hosi io, le mburer ad Kristo, io da gin hinen i.

¹⁴ Su ndere holel, su lao ad Ndorlaben, be su gin ilndri io, su de noh hebsa bui, su bohernou nongen ad Jehova le ndro su.

¹⁵ Su holel ge su de bohernou nongen ad Kristo heb monen bui, ndrnesu i irgu le mburer ordo, su bo iil me ndro du. Su holel su bohernou le bergol monen.

¹⁶ Su holel su hinen mburer ogo golsuisden io, dansu, Jehova gin daui mburer ogo le nemo, io gobharni gleri.

¹⁷ Su holel, su da bohernou nongen le Kristo, bergolsu e hanguruen asu i heb monen bui. Su ha leng bo ngendian me ndro io, su ha lengi ngendian ordo i gmenda le kalabus.

¹⁸ Gonan, su hanguruen hian de momen, io ha mugmug ge, be su bohernou nongen ad Kristo. Ehe, io ha mugmug gleri.

¹⁹ Io dono, longu masi bo hian me ndro io mu ha soling le ndro Ndorlaben, Meluan ad Jesu Kristo i sobani io.

²⁰ Io dono i, io ha mugmug leri, bombulo na gmesi le longu hendre e hendre bui, su masi dansu ilndri io, bamugueni Kristo le longu ordo masigane, io da mamaren, de io na gmed.

²¹ Kristo, aga i ndoui ordo ge, ar io na gmed aga i hian ge me ndro io.

²² Ar Kristo i ha lengi io dandon le mondro, i ha lengi i, io bo mburer ge, i ha leng ilndri sengen hian ge, i da reg le bergolo. Malabo io de dono i bui sehe longu i hian hanu me ndro io.

²³ Io ha leng longu hendre ogoro, ma longu hendre dagara lie: Io ha leng bieni boan ogo, beg hilou le ndro Kristo, aga i hian ge me ndro io.

²⁴ Ar io dandon, ar io gsou le boan ogo aga i hian le ndro mu.

²⁵ Io dono i hian, io mamaren ge. Io de gmad masou, io gob mburer le ndro mu, io osbani mu le ndoui ber lang.

²⁶ Boen danmu mugueni Jesu Kristo le longu ordo, be io gmul le ndro mu bersi muren.

Nongen ad Paulus le ndro su Kristen le longu hendre e hendre.

²⁷ Hian, girgai monen le bormarsu lao ad Jesu aga i vonei le ndro Kristo. Io ha lengi, be io gmeher ndro mu, ilndri dogi ademu monen ge, ar io da manan ge, io ha leng hirong le ademu, Meluan Helian ge i da ndro mu masi, mu da bo iil bahun ad Jehova ge, mu masi dege hom gamel ge ndoa.

²⁸ Io ha leng hirong i, su ndremda rah de heb ndoa le ndro mu bui, su gina momen ri. Mu ge, mu gina horuan ge ar Jehova i ndoa le bergolmu.

²⁹ Golnisden ad Jehova i da ndro mu, mu dogi monen ge le bern asu Kristen, mu gin boro ndoui ad Kristo, mu ndoa le ibdi ngendian ad Kristo dagara lie.

³⁰ Malabo mu dege io, longu hendre e hendre momen i da gin meher ndro io, dege mu gin ilndri, dagara mu gin hirong leri, i gin meher ndro mu lie: Aga longu hendre e hendre ber ngendian.