Philemon 1 - Niu Testament 1956 (Manus PNG)

Heb nongen hanu.

¹ Io Paulus, io da le kalabus le mburer ordo, io gin hinen i le ndro Jesu Kristo, io ma ndere Timoteus iouoro beani nongen hian le ndro Philemon, goloisden i, i gin sobani du le mburer,

² dagara le ndro biso Apia, ma le ndro Argipus, dagara le ndro su lao ad Jesu, su da le um adem.

³ Golnisden ad Ndorlaben, ma mandri ad Jehova, i Damdu ma ad Ndorlaben Jesu Kristo i da ge ndro uo.

⁴ Io bamugueni Jehova sidesi, be io hanguruen uo le raring ordo.

⁵ Ehe, io hirong i, golnisden adem i manden ge, uo gin boro ndoui ad Ndorlaben Jesu Kristo hian ge, uo golmisden su lao ad Jesu helian ge.

⁶ Io ha soling ndro Jehova, i hengen le ndro uo ndoui aden, uo gob mburer hian monen ge, i ghengen le ndro uo, uo danem longu masi ber lang monen ge, aga le ndro uo sal hian gle ndro Kristo.

⁷ Ehe, io ha mugmug manden le golnisden adem, golnisden adem gin rederhi io, be io gin ilndri, uo gin bo hian ge le ndro su lao ad Ndorlaben helian, uo ndere hian.

Paulus golnisden Onesimus, i gin vob goru.

⁸ Be io ha lengi io dono vong ndoun le ndro uo le ngarn ad Kristo, io dono hondre le ndro uo le longu hendre e hendre, uo ghengen me ndro io, dege io ha lengi.

⁹ Io mbuere hondre dagara, goloisden uo ge, io ha leng ndemani uo hian ge: Io hom gamel, io Paulus, hom hibermanda i da le kalabus, su gin daui ri le mburer ad Kristo, i da gin hinen i.

¹⁰ Io ha soling ndro uo le ad nduro, goloisden i, io damen aden, gle ndoui ad Meluan Helian gin hengeni i me ndro io, be io da le kalabus, aga Onesimus,

¹¹ i da gin bo momen le ndro uo goru, malabo i hian me ndro io, io mugueni mburer aden.

¹² Io rendegien i, i dege io, i gmeher ndro uo, dege io beg meher ndro uo.

¹³ Io ha lengi i, i gsou baghege ndro io, i gob mburer le nongen ber lang, aga le surien ndoui adem.

¹⁴ Io de dono rui i me ndro io bui, be uo de gin somui ri masou.

¹⁵ I gin bieni uo goru le taim murai ge, malabo i adem ge sidegesi.

¹⁶ Goru i lao dandendegei adem ge, malabo dagara bui, i nderm, dege i ndere ordo, ndangen i nderm, goru mandrn aden uo gin semani, malabo i adem gle mandern e gle meluan, i hom lao ad Jesu Kristo.

¹⁷ Be uo golmgisden io, hian ha somui le aden, i dege io.

¹⁸ Be i gin hedi heb ber memrad adem gineao io ha leng surien i, hondre memrad adem, i gina le ndro i goru, gle buk ordo.

¹⁹ Io Paulus, io ha leng surien i: E lele, io gin hondre le peper malabo, io mbuere uo ghanguruen i, uo gsurien memrad ordo mabosanged, io mbuere vong le ndro uo, uo ordo ge.

²⁰ Ehe, ndere hian, malabo io ha leng rui heb longu adem gle ndoui ad Ndorlaben: Ha somui gle soling ordo le ngarn ad Kristo.

²¹ Io gin hondre heb nongen ogo, io dono, uo ha somui ri. Io dono uo ghengen me ndro io longu hendre e hendre, io de gin ndemani uo leri bui.

²² Ghinen longu masi gmonen, e lele, heb eluen bui muren io beg meher ndro uo le um adem, io ha belengen i rang i gmehere be Ndorlaben i ha somui le soling ademu, i grumburdi io le kalabus, muren io ademu lie.

²³ Epavras, i da le kalabus lie la born ndro io le mburer ad Jesu Kristo, i beani nongen hian le ndro uo.

²⁴ Dagara Markus, Aristarkus, Demas e Lukas, su da gin sobani io le mburer ordo.

²⁵ Golnisden ad Ndorlaben adu Jesu Kristo i da ge ndro meluamu! Amen.