Markus 5 - Niu Testament 1956 (Manus PNG)

Jesu regurdueni homo ngongon i da ndrnen.

¹ Su me ge horo le gor asu Gadarena.

² Jesu i bieni ndol i iao me leng, malabo hom gamel snel i da ndrnen hilou me ndro i.

³ Ir medir ge ngad, dansu de hosi i bui, sen de vonei bui.

⁴ Sidesi su hosi i le vas le sen, i ndumbue sen, i ndrhomuri vas bomud i momen, hom ndramed danen de sendraini i bui.

⁵ Sidesi lobing lorang irge bahali irge ngad, i vale.

⁶ I ilndri Jesu i le manan, i hilou me ndro i, i godurhu,

⁷ i vale, i bodeie: Uo am bo sa ndro io ie? Uo Jesu, Ndur Jehova Ndurhian i da le belengan. Mbue hinen io momen.

⁸ Jesu i boi: Snel alndi or bieni i gamel.

⁹ I ndemani i lie i bodeie: Aga ngarm sie? Snel i boi: Io ngoro: Legion, iou mabosanged.

¹⁰ Boen i ndemani Jesu lie de robuldi su de la manan bui.

¹¹ Baghege ge bu su mabosanged su do da duldul.

¹² Su snel su se ndemani Jesu su bode, be su gal andre bu.

¹³ Jesu i somui. Su snel su la ndro su bu, su bu masi su la vob bahali, su la mad le ndran, su marbou.

¹⁴ Su ndramed ber gulue bu, su hilou me la gor su bosoui longu ogo. Su masi su ber gor su me lele.

¹⁵ Su me ndro Jesu, su me ilndri ndramed goru snel ir ndro i, malabo i lugdo ndro Jesu ma salo aden i hian. Su noh.

¹⁶ Su ndramed su hadlingi i su bosoui longu masi me ndro su, snel gineao le ndro su bu.

¹⁷ Boen su me su ndemani Jesu a i giao, gor asu gsou.

¹⁸ I ndre ndol aden, i ndramed snel aden gineao i ndemani i, i la born ndro i.

¹⁹ Jesu i mbueren i bode: Bugane, aiu al ndro loumsu al bosoui longu hian Ndorlaben i hinen i me ndro uo, i golnisden uo.

²⁰ I la le bohernou le gor asu Degabolis, Jesu gin regurdueni i, su masi su hirong i, meluasu i ieb.

²¹ Boen Jesu i mul iao le ndol su ndramed mabosanged su me ndro i me leng.

²² Malabo hom labenen ber numo hernou, ngarn Jairus i me, i ilndri Jesu i godurhu le ngondrnegen.

²³ I soling i, i boi: Nduro bihin baghege na gmed, hian am ndro i, nemem gle ndro i, i maren lie, a i de so mad bui,

²⁴ Jesu i la born ndro i, su ndramed masi su do ndrbo sor, heb salsaln bui.

²⁵ Hom bihin i med uru masongul e ruo le ndrai aden.

²⁶ Su doktor mabosanged be su girgurdueni, dansu bui, memrad aden masi le adsu, i bihin gina momen ge.

²⁷ I hirong nongen asu le Jesu i gohon le ndrbon beg i boro salo aden.

²⁸ I bodeie: A io gboro salo aden heb ge mandehe ge, io horuo.

²⁹ Malabo i horuan, i danen i maren.

³⁰ Malabo Jesu i danen heb ndoui aden gineao i rebelueni ir molengasu ndramed i ndemani su: Sie i boro salo ordo ie?

³¹ Su lao aden su boi: Nongen adem derbe, su ndramed mabosanged su da besbas ndro uo, uo endemani iou: Sie i boro io ie?

³² Jesu i lele beg gahi, sie i hinen i.

³³ I bihin i noh, i rerr, i danen i maren, i me godurhu me ndro Jesu i boharni, i gin boroi.

³⁴ Jesu i boi me ndro i: Nduro, longu adem gin sobani uo, mbue uo noh, mamarem! Aiu al gor adem, uo horuam ge!

³⁵ Su do da vong ndon, su lao ad Jairus su me dala su boi: Ndurm ginemad, uo al bur Ndorlaben gle oho?

³⁶ Jesu i hirong nongen asu, i boi le ndro Jairus: Mbue uo noh, horuam!

³⁷ Jesu i bien su masi su da, Petrus, Jakobus, Johanes nder Jakobus ge, su me la born ndro i.

³⁸ Su me um ad Jairus su mabosanged su do da ri, su do da dang, su do da durui su.

³⁹ Jesu la lundieum i boi: Desa uomu dang uomu rosni mu ie? Ndurbihin i de mad bui i da medir ge.

⁴⁰ Su hal aden. Jesu i robuldi su masi, hedi damen e nanen e su lao aden madilmou su la ndro i ndurbihin.

⁴¹ Jesu i dori nemen ndurbihin i boi me ndro i: Talita kumi! I vonei: Ndurbihin, io boi me ndro uo: edne!

⁴² Malabo i ndurbihin i edne irgai, uru aden masongul e ruo. Meluasu i ieb manden.

⁴³ Jesu i habai su, mbue su gvong soln, i bode su ghengen i gle gan ge.