Markus 1 - Niu Testament 1956 (Manus PNG)

Mburer ad Johanes ndremda surhi su.

¹ Aga negdunongen Helian ad Jesu Kristo, Ndur Jehova.

² Dege hom lao ad Jehova gin hondre dugian: Ar io gurdegieni hom lao ordo i hanu, hinen sal adem bomud.

³ Nongen ad homo i da marboga: Mu ghinen sal ad Ndorlaben gbomud, ghinen masigane gmonen.

⁴ Johanes i da marboga i surhi su, i bohernou le ndro su i henunuen su, su da belueni longu asu momen, boen Jehova i sbui longu asu momen giao.

⁵ Su masi ber Juda ma su Jerusalem su la ndro i, i surhi su masi le ndran haga ngarn Jordan su boharni longu asu momen here sumburdi.

⁶ Salo ad Johanes lomonme, i hosi i le gogei aden, gan anen gusiandas e guner.

⁷ I bohernou i boi: Hom ndoundoun gir muren, io de vonei bui io godurhu io dari sumianegen.

⁸ Io surhi mu gle ge ndran, i gi surhi mu le Melua Jehova.

⁹ Malabo Jesu i meher Nasared Galilea le ndro Johanes, Johanes i surhi i le ndran Jordan.

¹⁰ I gobad me belengan lie i lele lang i reu, Melua Jehova me ndre Jesu dege bal si.

¹¹ I hirong nongen ber lang: Uo Nduro, golisden uo, io muguen uo.

Sadan seslaini Jesu.

¹² Boen Meluan le bur Jesu le marboga.

¹³ I medir i ri mahangul da marboga, Sadan i me i seslaini i, i da ndro longu ber marboga su Angelo su me gulue i.

Mburer ad Jesu le Galilea.

¹⁴ Muren su gin hosi Johanes, boen Jesu me Galilea i bohernou nongen hian ad Jehova,

¹⁵ i boi: Bing e longu aden Jehova i meher beg sobani mu. Hian mu garbeluen bern ademu mu ghirong Nongen Helian ad Jehova.

Jesu eloh mahamou le mburer aden.

¹⁶ Jesu irgai le Galilea le leng, i ilndri Simon ma ndern Andreas sor dou gahu le ndran sor ndremda ni.

¹⁷ Jesu i boi le ndro soro: Mor gorndrbo, io ghinen uomoro gle gulue su ndramed.

¹⁸ Malabo sor bieni gahu i asoro sor ie ndrbo Jesu.

¹⁹ I iao la hebe i dilingi Jakobus ndur Sebedeus ma ndern Johanes sor do da ndol asu, su suedi gahu lie.

²⁰ Malabo i loh sor, sor bieni damsor Sebedeus i da lundiendol le bor su lao aden sor do ndrbo Jesu.

Mburer ad Jesu le gor Kapernaum.

²¹ Boen su meher me Kapernaum, malabo le sabbath Jesu i le numo bohernou i henunuen su.

²² Meluasu i ieb le nongen aden, i enger ndorlaben, su ndremda bohernou su de ndoun bui.

²³ Homo, ngongong i da ndren, i da numo hernou i loholo,

²⁴ i bode: Uo Jesu ber Nasaret! Uo hesa am ndro du e? Uo gin me beg rii du ie? Iou dandu uo, uo Ndur Jehova, Helian!

²⁵ Jesu i habai i, i bode: E simge, alndi!

²⁶ Ngongong i rosni ndramed i loholo i iao.

²⁷ Meluasu masi i ieb manden su vong le goure, su bode ie: Aga sa? Sehe longu me malabo, i dege ndorlaben manden, i robuldi ngongong, ngongong hirong nongen aden i iao.

²⁸ Malabo ngarnongen le gor masi asu Galilea.

²⁹ Su do numo hernou su iao landi su iao la um ad Simon sor Andreas, Jakobus e Johanes sor la born ndro su.

³⁰ Naloson Simon i med i busngad, su me bai me ndro Jesu.

³¹ Jesu i le ndro i, i boro i le nemen, i sori i, malabo iab aden gineao, i dne hedi gan me ndro su.

³² Ibia mernal gina boan su hur iab mabosanged me ndro i ma su ndramed beld i rii su.

³³ Su ndramed masi ber gor su do da, lobonhonum ndro Jesu.

³⁴ I soban su, iab i rii su, su maren lie, i robuldi su beld mabosanged su iao: i mbueren beld mbue de gvong

Jesu bieni Kapernaum.

³⁵ Mabing mernal ma de gobad, Jesu i dne i dogi le lonhao le vong le ndro Jehova.

³⁶ Simon e su masi su da ndro i su hilou me ndrbo Jesu.

³⁷ Su meher ndro Jesu su boi: Su masi su gahi uo.

³⁸ Jesu i boi me ndro su: Du gao gle gor hoger lie, io beg bohernou gle ndro su, io meher me ri.

³⁹ I henunuen su le numo hernou masi le gor asu Galilea, i robuldi beld.

Jesu sobani homo, lepra i da ndro i.

⁴⁰ Hom ndramed mandrn masi legen ge i me ndro Jesu i godurhu i ndemani i, i boi: Be uo somui, uo danem sobani io.

⁴¹ Jesu i golnisden i ilgi nemen le ndro i, i dori i, i boi: Io somui, mandrm masi rosan gane.

⁴² Jesu i vong dogoro, legen gineao, mandrn masi gin hivur boen.

⁴³ Boen Jesu i habai i, i bieni,

⁴⁴ i bodeie: Naiu, mbue de vong gle ndro homo, al iao sal adem, al ndro lao ad Jehova gle gan si, dege Mose gin bai, su masi su dilingi i.

⁴⁵ I iao leli, nongen aden dsoln le ndro su masi, Jesu i mbueren le gor hoger lie, irgai le lonhou ge, su ndramed ber gor masi me ge ndro i.