Jakobus 1 - Niu Testament 1956 (Manus PNG)

Heb nongen hanu.

¹ Io Jakobus, hom lao dandengei ad Jehova, ma ad Ndorlaben Jesu Kristo, io beani nongen hian le ndro su Israel ber um asu maongul e ruo, Jehova gin sumbue su le horo ma le horo su do da le molengasu Haiden.

Rang momen i gmeher beg hinen mu ndoa ge.

² Mu ndere, ha mugmug ge be rang momen i da ndro mu.

³ Danmu, be mu ndoa, aga i hian le ndro mu, danmu boro ndoui ad Ndorlaben.

⁴ Ar danmu boro i hian ge, danmu dogi monen ge le sal ademu, heb longu momen i da ndro mu bui.

⁵ Ar homo i de danen longu hian ber belengan masou, i ha soling ndro Jehova, i ghenunuen i le longu masigane. I de boii homo bui, i ndemani i gleri, bugane, i hengeni le ndro i.

⁶ Ar homo i soling, i gboro ndoui ad Ndorlaben, mbue de hanguruen, Jehova i danen hengeni de bui. Ar homo i hanguruen dagara, i dege noui ber ndas, ior i rui i le horo ma le horo.

⁷ Hom ndramed dege ogoro, Jehova de hengen le ndro i hebsa bui.

⁸ I hom ndramed ge, i da hanguruen longu marndr le bergoln, bersi longu hendre, heb eluen bui longu hendre lie. I de dogi heb monen bui.

⁹ Hom ndern, be i homo molhege le boan, i gabmugueni Ndorlaben, i da gin rui i le belengan.

¹⁰ Hom labenen ber gor, memrad aden dsoln, hian i ghanguruen le bergoln: I hom ndramed molhege. Ndangen i dege nonou ber lonhou i na gmeng roud.

¹¹ Mernal i gobad, i ha ngendehan, nonou na gmeng, i de heb mamali bui. Dagara hom labenen, heb eluen bui i gina los, i do da le boan bui.

¹² Ndramed homo i horuan, i mamaren, be i ndoa le rang aden momen be su beg seslaini i. Be i gin ndounen rang aden momen, Jehova na ghengen le ndro i gor lundielag, i na ge mamaren, Jehova i hengen le ndro i salion ber gor lundielang, dege i gin bai, i beg hengen le ndro su, golsugisden i.

¹³ Mbue homo i vong le rang aden momen: Jehova i seslaini io. Jehova de danen seslaini hom ndramed gle longu momen bui. Longu hendre de danen seslaini Jehova le longu momen bugane.

¹⁴ Sengen ad hom ndramed i seslaini i le longu ber boan.

¹⁵ Be i ha somui ri, longu momen i mehere. Be longu gin meher ndro i, be homo gin los ri, i gina momen ge, i na gmed.

¹⁶ Mbue hanguruen momen le bergolmu, mu ndere hian.

¹⁷ Longu hendre e hendre hian ge i meher le belengan, Damen ber gor lundielang i ghengeni le ndro du. I de belueni hanguruen aden bui, i de belueni bern aden bugane.

¹⁸ I gin ilgi du le golnisden aden ge, dege i ha leng hinen i, i ha lengi iou hanu le longu masigane ber boan.

Somui le nongen ad Ndorlaben.

¹⁹ Aga danmu, mu ndere hian. Homo ma homo i delengan roud, i de bosoui nongen roud bui, i munie le gus aden.

²⁰ Gus ad hom ndramed de hinen heb longu hian monen bui, Jehova de voaniso aden bugane.

²¹ E bieni longu masi momen, segdan ge, e bieni gus i da le bergolmu, ibdi nongen ad Ndorlaben le bergolmu, orgulue i le hanguruen ademu, i danen rumburdi mu, i danen sobani mu le gor lundielang.

²² Ar homo i hirong ge sidesi nongen ad Ndorlaben, hirong aga i de vonei bui, Ndorlaben i ha lengi, iou ghinen i, dege iou gin hirong i. Ar homo i hirong ge sidesi i de hinen i bui, i bahilou ge.

²³ Ar hom ndramed i hirong ge nongen ad Ndorlaben i de hinen i bui i dege hom ndramed i lele bormarn le glas luglug.

²⁴ Be i gin ilndri bormarn ri, i iao hebndi, i de danen i bui bormarn i hi derbe.

²⁵ Ar homo i da lele ge nongen ad Ndorlaben, be nongen aden i da ndro i sidesi, i de hirong dahed bui, i ghinen i, ndramed ogoro i horuan, i mamaren ge.

²⁶ Ar homo i hanguruen le bergoln, i bo mburer ad Jehova ge, i de bogulue nongen aden bui, i bahilou le meluan, i da bo mburer dahed le ndro Jehova.

²⁷ Aga i mburer hian ge, aga i lodu rosan ge le bormarn ad Jehova, aga Damen adu, ar homo i hanguruen su ndur iohang ma su bihinou le rang asu momen, be i gbieni longu segdan ber gor giao.