Hebru 1 - Niu Testament 1956 (Manus PNG)

Jesu i hanu le asu Provet ma asu Angelo

¹ Goru Jehova gin vong me ndro du bersi e bersilie le bohosu Provet, le longu hendre e hendre ber lang.

² Muren i gin vong me ndro du le bohon ad Ndurn, i da ibdi memrad aden masi ber lang, i da gin mengseni longu masi ber lang ma ber boan.

³ I ogo, i sameluan ber engerang aden, bern ad Ndorlaben, aga bern aden, i bogulue longu masi ber boan ma ber lang le nongen aden ndoun ndoun. Be i gin hinen mburer aden boen, be i gin surhi longu momen ber gor masi le ndrai aden, i lugdo le nemen sengen ad Jehova, Ndorlaben ber belengan.

⁴ I ndoa hanu le asu Angelo masigane, dagara ngarn aden i manden hanu le ngarsu Angelo masi.

⁵ Jehova gin vong le ndro sie asu Angelo: Uo nduro, io ge, io gin ilgi uo range ie? Ma bersi dege ogoro: Io Damem, uo ge, uo Nduro.

⁶ I vong i bai le rang, be i beg rendegien ndurn aden homo le boan bersilie: Su Angelo ad Jehova masi, su gdohor le ndro i, su gob lodu ndro i.

⁷ I ha bosoui longu le asu Angelo dege ogoro: I hinen su Angelo su dege ior, su lao dandendegei aden su dege moan.

⁸ I vong i bai le ad Ndurn: Logna adem o Jehova, i ndoa sidegesi, ndes adem i monen ge, aga ndes ad King ndangen.

⁹ Uo voamiso longu hian monen ge, ndrnem i mah le longu masi momen, le bern asu momen, su da bieni Jehova. O Jehova, Ndorlaben adem gin daui ndrelgei helian gle borbalen, i ha mugmug leri, sie i dege uo?

¹⁰ Bersi i vong i bai: Uo, Ndorlaben, uo gin mengseni gor boan nandugian, lang ma longu masi do dari, aga mburer ber nemem.

¹¹ Longu masi na glos, uo ge, uo do da sidegesi, su na ge sagen, dege salo sagen.

¹² Uo gulmuni su, dege homo i lugmuni salo aden. Uo garbelueni su. Uo ge, uo dege goru sidegesi. Rang adem i de gbomud bugane.

¹³ Ndorlaben i vong le ndro sehe Angelo bersi heb nongen dege ogoro: Lugdo im nemo sengen, io beg ndounen su ndremda rah adem, ndegem gle ndro su.

¹⁴ Su Angelo masi su lao dandendegei aden ge, uo gin rendegien su, su gob mburer le ndro su lao adem helian, su gibdi gor lundielang bersi muren.