Evesus 1 - Niu Testament 1956 (Manus PNG)

Heb nongen hanu.

¹ Io Paulus, hom Apostel ad Jesu Kristo, Jehova gin loh i, io beani nongen hian le ndro su lao helian, le ndro su, su da gin boro ndoui ad Ndorlaben, Jesu Kristo.

² Golnisden ad Jehova, mandri ad Ndorlaben, i Damen adu, ma ad Ndorlaben Jesu Kristo i da ge ndro mu.

Enger memrad asu Kristen.

³ Gabmugueni Jehova, i Damen ad Ndorlaben adu Jesu Kristo, i da gin hengen me ndro du memrad ber lang hendre e hendre gle ndoui ad Kristo.

⁴ I gin loh du nandugian, be boan ogo masou, i ha lengi i, iou da monen ge, iou helian le bormarn gane.

⁵ I gin hinen du le mbunana aden, gle ndoui ad Jesu Kristo, iou aden ge gle golnisden aden. I gin loh du, dege i ha lengi i.

⁶ Aga golnisden aden ge hian, iou gabmugueni i, da gin hengen me ndro du gle memrad aden.

⁷ I ogo gin bolumia du, i gin surhi longu adu momen le ndrai aden, aga le golnisden aden ge, i da gin hengen me ndro du bulhe.

⁸ Ndangen i gin henunuen du gle memrad aden ber lang i da beg hengen me ndro du.

⁹ I gin boharni longu hendre e hendre i ie lengi i. I beg hinen i bersi muren,

¹⁰ be rang aden gin meher be longu masi hendre e hendre gin me dala, dege i gin bai. I leng hinen Kristo le Ndorlaben ber longu masigane i da le lang, ma i da le boan lie.

¹¹ I gin hengen me ndro du memrad ber belengan, dege i gin bai goru. I gin loh du, iou ibdi gle longu hian, dege i ha lengi i.

¹² Iou gin belengeni le Mesias, i ha lengi i, iou gabmugueni engerang aden.

¹³ Mu aden ge, mu da gin hirong nongen ber lang, nongen hian ge, i da beg rumburdi mu, mu gin boro ndoui aden, mu gin ha somui le aden, i gin daui Meluan Helian le bergolmu, mu aden ge ndangen.

¹⁴ Meluan Helian i boharni me ndro du, iou hilou, iou ngab le memrad adu ber lang. Nongen aden i monen ndangen, nongen aden i mugueni engerang ad Jehova.

Raring le begmarsu i greu.

¹⁵ Be io hanguruen longu ogo masi, io bamugueni Ndorlaben sidesi, i da gin hengen le ndro mu, mu gin boro ndoui ad Ndorlaben Jesu, golmuisden su lao ad Jesu.

¹⁶ Ndangen io hanguruen mu sidesi, be io bo raring le ndro Jehova, io bamugueni i, i da gin loh mu le ngab memrad ber lang.

¹⁷ Jehova, Damen ad Ndorlaben adu Jesu Kristo, engerang i da ndro i, i ghengen le ndro mu Meluan Helian, i da henunuen mu, i gobharni le ndro mu longu hendre e hendre ber bern aden.

¹⁸ I daui sul ber lang le bergolmu, begmarmu i greu, danmu hian ge sehe longu i ademu, mu da gin hirong nongen aden, i ghenunuen mu le memrad ber lang, i da gmeher ndro su lao aden helian.

¹⁹ I bosilieni le ndro mu ndoui aden, i da le molengasu lao aden. Aga ndoui manden ge.

²⁰ Dege iou gin ilndri, i gin meher ndro Kristo, be Ndorlaben gin hingeni i le ngad aden, be i gin rui i le gor lundielang, le nemen sengen aden.

²¹ I ogo, i hanu le asu ndorlaben masigane, i ndoa hanu le ndoui asu masigane, ngarn aden i hanu le ngarsu masigane ber gor boan, ma ber gor lundielang dagara lie.

²² I gin ilgi longu masigane gle ndegen, i gin hinen i le Ndorlaben manden ge asu lao aden,

²³ Su lao aden masi, aga i vonei mandrn, i da gin bo mburer leri. I da bo mburer le longu masigane.