Mattêuse 1 - Labrador Inuttitut Heritage Bible

Kristûsib sivorlingita maliktigêngninginik. Singaigijauninganik atinganiglo.

¹ Aglait Kristûsib sivorlingita maliktigêngninginik: Tâmma Davidib erninga, tâmna Abrahab erninga.

² Abrahab ernetârivâ Isaak. Isaaub ernetârivâ Jâko. Jâkob ernetârivâ Jûda ᴋatangutingillo.

³ Jûdab ernetârivâ Farez Zaralo Tâmamit. Farezib ernetârivâ Hezron. Hezronib ernetârivâ Rame.

⁴ Ramib ernetârivâ Aminada. Aminadab ernetârivâ Nahasson. Nahassonib ernetârivâ Salma.

⁵ Salmab ernetârivâ Bôase Rahabemit. Bôasib ernetârivâ Obede Rutemit. Obedib ernetârivâ Jesse.

⁶ Jessib ernetârivâ atanek Dâvide. Ataniub Dâvidib ernetârivâ Salomo, Urîab nuliarilauktanganit.

⁷ Salomo ernetârivâ Roboa. Roboab ernetârivâ Abîa. Abîab ernetârivâ Assa.

⁸ Assab ernetârivâ Jôsafat. Jôsafatib ernetârivâ Jôrame. Jôramib ernetârivâ Osia.

⁹ Osiab ernetârivâ Jôtame. Jôtamib ernetârivâ Ahas. Ahasib ernetârivâ Ezekîa.

¹⁰ Ezekiab ernetârivâ Manasse. Manassib ernetârivâ Amon. Amonib ernetârivâ Josîa.

¹¹ Josîab ernetârivâ Jekonia ᴋatangutingillo taipsomane Jûdit Babilônemut aularutjaulauktilugit.

¹² Babilonemit uterningata kingorngagut Jekoniab ernetârivâ Sealtiêle. Sealtiêlib ernetârivâ Zorôbabele.

¹³ Zorôbabelib ernetârivâ Abiud. Abiudib ernetârivâ Eliakime. Eliakimib ernetârivâ Asore.

¹⁴ Asorib ernetârivâ Zadoᴋ. Zadub ernetârivâ Akime. Akimib ernetârivâ Eliud.

¹⁵ Eliudib ernetârivâ Eleasar. Eleasarib ernetârivâ Mattan. Mattanib ernetârivâ Jâko.

¹⁶ Jâkob ernetârivâ Jôsefe, Mariab iuksanga. Tâpsoma erniarivâ Jêsuse, Kristûsemik atilik.

¹⁷ Ernerêt ilûnatik Abrahamit Dâvide tikidlugo 14ovut. Dâvidemillo, Jûdit Babilônemut aularutjauᴋârtinagit, ernerêt 14 ogivut. Babilônemit uterninginit Kristûse tikidlugo ernerêt 14 ogivut.

¹⁸ Jêsusible Kristûsib erniangoninga imaipok: Anânanga Maria, Jôsefemut angersimalerame, katerᴋâratik, malungnarsivok, singailermat Anernermit agunginermit.

¹⁹ Uiksangatale Jôsefib, idluartôgame, kangusuktitsomangilâ, issumaᴋalerporle angigutjilune ᴋemagomavlugo.

²⁰ Taimagle issumaᴋalermat, ahâk, Nâlekab Engelingata sakᴋervigivâ sinnaktomanikut, oᴋarlune: Jôsefe, Dâvidib erninga, sivôranak, Maria nuliaksat ilingnut pilugo; singainga Anernermit ajunginermit pingmat.

²¹ Ernermik ernijomarpok; tâmna Jêsusemik atseraraksarivat, inuᴋotine piulijomârmagit ajorninginit.

²² Tamadja tamât taimailerpok, Nâlekab oᴋausingit nalautaijokut nalautserᴋovlugit, oᴋarmat:

²³ Ahâk, uigasuk singaijomârpok, ernermiglo ernijomârlune, Immanuêlemiglo atseraromârpât, atingata tukkinga imaipok: Gûde uvaptingnêtok.

²⁴ Jôsefele siningminit tupakame, taimailivok perᴋojaunermitut Nâlekab Engelinganut, nuliaksane aivlugo.

²⁵ Aktungilâle, erniarerᴋârtaminik ernerᴋârtinnago, atserarpâlo Jêsusemik.