Markuse 1 - Labrador Inuttitut Heritage Bible

Jôhannesib oᴋâlaninganik baptitsininganiglo. Jêsusib baptitauninganik Jôhannesemut. Jêsusib ôktorluktauninganik. Oᴋâlaninganik. Illiniartiksaminik ᴋaiᴋojininganik. Pijungnaititsininganik ᴋanimajunik Sâtanaseᴋartuniglo. Aᴋêninganik Pêtrusib sakkinganik. Galilêamuarninganik.

¹ Tamadja oᴋautsit tussarnertut pigiarningat Jêsuse Kristusemik, Gûdib Erninganik.

² Sorlo nalautaijut aglangine aglaksimangmat: Ahâk, Engeliga tilivara sivunernut, apᴋotiksarnik âᴋiksoije sivunangne.

³ Ajoᴋertuijub nippinga inuᴋangitome imâk pivoᴋ: Nâlekab apᴋotiksanga âᴋiksorsiuk, apᴋosiningit naggotisigik.

⁴ Inuᴋajuitome Jôhannese baptitsivoᴋ ajoᴋertuivlunelo baptijumik ᴋaᴋialerᴋojijomik, ajortunit pêjautiksamik.

⁵ Jûdêamiullo ilûnatik, Jerusalemiullo nelipsarpât, ilûnatik baptitaujomavlutik, tâpsomunga, Jordaneme kôngme, sagvarlugillo ajornitik.

⁶ Johannesele annorâlik nergjutsûb kamêlib merᴋunginik, tapseruteᴋarlarmelo amivinermik; piglertaujârtullo igupsaujârtullo orᴋsungit nerᴋigivait.

⁷ Ajoᴋertuivlunelo oᴋarpoᴋ: Kingunipkut tikituksaᴋ pitsartunersauvoᴋ uvamnit, nelopᴋotivungalo, tapsoma sângane okkolunga, itigagutîgik singêjarlugik.

⁸ Imermut baptipapse; tâpsomale baptitsomârpâse anernermut ajunginermut.

⁹ Neliutome taipsomane Jêsuse Galilêamit Nazaretemit pivoᴋ, baptitaujomavlune Jôhannesemut Jordaneme.

¹⁰ Tuavidlunelo ᴋaᴋᴋingmat, ᴋilak angmartoᴋ takovâ, anernerlo ajungineᴋ tingmiatut taubetut aᴋᴋartoᴋ, Jêsusemullo pijoᴋ.

¹¹ Tagvalo nippe ᴋilangmit pijoᴋ oᴋarpoᴋ: Ernerivagit nagliktagit, ᴋuviagijagit.

¹² Erinesârdlugolo Gûdib Anerningata inuᴋangitomut aitipâ.

¹³ Tagvalo inuᴋangitomêpoᴋ uvlunik 40 nik, Sâtanasemullo ôktortaulerpoᴋ, nergjutillo illagivait, Engelillo kivgartorpât.

¹⁴ Jôhannesele parngnanairsimavingmut pititaulaungmat, Jêsuse Galilêamut pivoᴋ; ajoᴋertuilerlunelo oᴋautsinik tussarnertunik Gûdib nâlegauvinganik.

¹⁵ Oᴋarlunelo: Neliutoᴋ neliusimavoᴋ, Gûdiblo nâlegauvia ᴋanitomut tikisimavoᴋ; ᴋaᴋialeritse oᴋautsillo tussarnertut okperisigik.

¹⁶ Galilêable tesseᴋsoangata sidjangane pisukkame, Simon takovâ, nukâlo Andrêase, nulluamingnik ningititsijuk imânut, mingeriarniartiogamik.

¹⁷ Jêsusib oᴋautivak: Maliktinga, inungnik aulasartiotitsomavaptik.

¹⁸ Tuavilutiglo nulluatik ᴋemaklugit malikpâk.

¹⁹ Tagvangallo sivumualerame, Jakôbuse takovâ, Zebedêusib erninga, nukâlo Jôhannese, umiarmêtuk, nulluamingnik killaijaijuk; tuavilo ᴋaiᴋavak.

²⁰ Atâtatiglo Zebedêuse umiarmut ᴋemakpâk kivgat illagivlugit, (Jêsuselo) malikkivâk.

²¹ Kapernaumullo pivut; erinesulerdlunelo sabbatine katimavingmut iterpoᴋ, ajoᴋertuivlunelo.

²² Ajoᴋertûtingillo tataminiarivait; kiblingnadlartomik oᴋâlangmat, aglangnik illisimajutitungitorlo.

²³ Katimavingmêtoᴋarporlo inungmik; anernermik maᴋojungnartomik ilumiktomik; tâmna nipliadlarlune oᴋarpoᴋ:

²⁴ Adjai! suliniarpitâ ilingnut, Jêsuse Nazaremiôk? asseroriartorpaptigut; kinaujotit ᴋaujimagapkit, Gûdib ivsornaitoᴋotigingmatit.

²⁵ Jêsusible inerterpâ oᴋarlune: Oᴋajuêrit, inungmit ômangat anît!

²⁶ Anernerublo maᴋojungnartub aulajârtidlarpâ, nipliadlarlunelo, anivorlo tâpsomangat.

²⁷ Ilunamatsiatik tataminialerput apersortigêlerlutiglo, oᴋarlutiglo; Suna unâ? suna una ajoᴋertûsertâᴋ? Anernerit maᴋojungnartut pitsartudlarlune perᴋovait, nalekpâllo.

²⁸ Tagvainaᴋ piniarningit tussaumajaulerput Galilêab erᴋâne ilûnâne.

²⁹ Erinesulerdlutiglo katimavingmit anivut, Simonib Andrêasiblo iglungangnut pivlutik, Jakôbuse Jôhanneselo illagilugik.

³⁰ Simoniblo sakᴋia (arnaᴋ) nalavoᴋ ôlingnartomut ᴋanimavlune; tâpsominga oᴋautisârpât.

³¹ Tikipâlo, aggangitigullo tiguvâ makitilâllo; tagvainarlo ôlingnartub ᴋemakpâ, kivgartorpaillo.

³² Unnulermallo, seᴋineᴋ nipimalermat, ᴋanimajut sunatuinait sâtanasilillo pitipait tâpsomunga.

³³ Iglugasaksoarmiullo ilûnatik upkuab silatânut katilerput.

³⁴ Kanimajullo unuktut pijungnaitipait, sunatuinarnik ᴋanimasilit; Sâtanasillo unuktut anitipait, Sâtanasillo oᴋarᴋongilait, illitarigamitsuk.

³⁵ Kaulermallo, sulle tâᴋtilugo, makipoᴋ anivlunelo. Jêsuselo inuᴋangitomut aularpoᴋ tuksiarlunelo tagvane.

³⁶ Pêtrusiblo najortingitalo katsungaidlutik malikpât.

³⁷ Nenigamitsuglo oᴋautivât: Ilûnatik ᴋenerpâtit.

³⁸ Oᴋautivaillo: Iglugasangnut ᴋaninerpânut ailerta, tagvanetauᴋ ajoᴋertuijomavlunga; taimak pivlugo tikisimagama.

³⁹ Galilêamelo ilûnâne katimavingine ajoᴋertuivoᴋ, Sâtanasillo anitipait.

⁴⁰ Kalaktullo illangata tikipâ, sêrᴋortorvigivlugolo tuksiarvigivâ oᴋautivlugolo: Pijomaguvit, kalagungnaititsungnaralloarparma.

⁴¹ Jêsusiblo nâpkoarivâ, agganelo issakpait, aktorlâlo, oᴋarlune: Pijomavunga, kalagungnairit.

⁴² Taimaglo oᴋarmat, tagvainaᴋ kalagungnaisârpoᴋ tâva.

⁴³ Jêsusiblo inerterpâ aulartisârlâllo,

⁴⁴ Oᴋautivlugolo: Udjertulerit, assingnut sunamik oᴋarniarnak; ajoᴋertuijomulle ainiarit, takotilutillo taipsomunga, tunergutiksarlo Môsesib tunerᴋojanga tunivlugo, kalagungnainernik nelojungnairᴋovlugit.

⁴⁵ Tâmnale anigame pigialerpoᴋ oᴋautigiluarlugo, taimailijauninelo ᴋaujijautipâ; taimaimat, (Jêsuse) kingorngagut sapilerpoᴋ iglogasaksoarnut iternermik takuksauvlune; silatânêporle inuᴋangitune, tagvungalo tikipât ilûnainit.