ᤛᤐᤏᤩᤠᤜ 1 - LIFOTNT

¹ ᤀᤠᤔᤥᤏᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜ᤺ᤸᤗᤧ ᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤜᤡᤈᤁᤡᤕᤠᤜᤖᤧ ᤁᤢᤒᤧᤶᤔᤧᤴᤇᤠ᤹. ᤀᤔᤷᤕᤠᤜᤖᤧ ᤁᤢᤈᤰᤔᤧᤴᤇᤠ᤹. ᤃᤍᤗᤩᤠᤜᤖᤧ ᤁᤢᤶᤔᤧᤴᤇᤠ᤹. ᤁᤢᤛᤡ᤺ᤸᤗᤧ ᤁᤢᤛ᤻ᤛᤠ ᤛᤐᤏᤩᤠᤜᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤁᤧᤖᤧ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤠᤛᤧ᤺ᤴᤗᤧ ᤕᤧᤴ

² “ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤁᤧᤖᤧᤰ ᤐᤠ᤺ᤴᤜᤠ᤹ ᤘᤖᤧᤱᤗᤧᤱ ᤏᤢᤵᤛᤢᤱᤛᤡᤱᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤓᤴ ᤆᤥᤃᤢᤖᤥ॥

³ “ᤔᤏᤠᤜᤠ᤹. ᤌᤰᤛᤠᤜᤠ᤹ ᤁᤧᤖᤧᤰ ᤔᤧᤰᤂᤢᤱᤛᤡᤱᤗᤥ॥ ᤋᤠᤱᤛᤠᤱᤒᤥᤒᤠ ᤐᤢᤛᤠᤜᤠ᤹. ᤘᤖ᤺ᤱᤅᤥᤒᤠ ᤐᤠᤎᤢᤱ ᤗᤧᤰᤅᤠᤜᤠ᤹ ᤀᤠᤱᤃᤠ᤹ ᤌᤩ᤺ᤱ ᤆᤥᤃᤢᤱᤛᤡᤱᤗᤥ॥ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤠᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤗᤠᤃᤡ ᤗᤢᤱᤜᤠ᤹ᤖᤰ ᤗᤢᤶᤛᤡᤱᤅᤠᤱ ᤏᤧᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤓᤴ ᤆᤥᤃᤢᤖᤥ॥

ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ

⁴ “ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱᤗᤥ॥ ᤁᤴ ᤋᤧᤴᤏᤥᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤒᤠᤗ ᤛᤠᤶᤔᤠᤱᤒᤠ ᤐᤠ᤺ᤴᤜᤠ᤹ ᤏᤢ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠ ᤁᤧᤖᤧᤰ ᤕᤰᤕᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤔᤠᤛᤢᤱ ᤐᤡᤖᤢᤱᤛᤡᤱᤗᤥ॥

⁵ ᤜᤡᤶᤔᤥᤒᤠ ᤁᤦᤛᤡᤜᤠ᤹ᤖᤧ ᤁᤢᤛᤶᤎᤠᤱ ᤔᤧᤴᤇ᤻ᤕᤠ ᤐᤢᤖᤢᤰᤔᤠ ᤂᤣᤛᤣᤒᤠᤜᤠ᤹ ᤛᤧᤘᤠ ᤁᤧᤔᤧᤵᤐᤠᤜᤠ᤹. ᤕᤜᤘᤣ ᤍᤠᤱᤒᤧᤴ ᤛᤧᤘᤠ ᤁᤧᤔᤧᤵᤐᤠᤀᤠᤱ ᤔᤠᤱᤜᤧᤰ ᤁᤧᤈᤥ᤺ᤰᤐᤠᤖ ᤔᤥᤗᤥᤂᤀᤥᤀᤠᤱ ᤔᤠᤱᤜᤧᤰ ᤁᤧᤈᤥ᤺ᤰᤐᤠᤜᤠ᤹.

⁶ ᤕᤜᤘᤣ ᤍᤠᤱᤒᤧᤴ ᤋᤡᤶᤔᤠ ᤁᤧᤗᤧᤵᤐᤠᤀᤠᤱ ᤁᤧᤏᤢ᤺ᤱᤒᤠ ᤁᤧᤒᤣ᤺ᤰᤐᤠᤜᤠ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤁᤥ᤺ᤵᤔᤠᤀᤠᤱ ᤔᤧᤱᤃᤥ᤺ᤵᤔᤏᤠᤒᤠᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤐᤠᤴ ᤛᤣ᤺ᤴᤔᤧᤴᤍᤥᤔᤏᤠᤒᤠᤜᤠ᤹ᤀᤠᤱ ᤀᤠᤱᤃᤠ᤹ ᤂᤢᤴᤇᤡ᤹ ᤔᤡᤱ ᤔᤠᤛᤢᤱ ᤐᤡᤖᤢᤱᤛᤡᤱᤗᤥ॥”

⁷ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤫᤠ᤺ᤳ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤏᤡ᤺ᤳᤋᤠᤱ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤍᤢᤱᤈᤓᤠ ᤌᤡᤰ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤋᤖᤣᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤆᤠᤔᤠ ᤐᤠᤱᤄᤢᤛᤡᤖᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤕᤧᤴᤏᤥ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹. ᤜᤠᤱᤅᤡᤸᤗᤧ ᤁᤢᤛ᤻ᤛᤠᤜᤠ᤹. ᤂᤶᤓᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤆᤠᤱ ᤁᤧᤈᤠᤱᤒᤠᤜᤠ᤹ ᤁᤧᤖᤧᤰ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥

⁹ ᤂᤧᤸᤗᤧ ᤕᤠ᤺ᤴᤍᤡᤰ ᤗᤠᤶᤎᤣ᤺ᤳᤐᤢᤱ ᤁᤧᤃᤠ᤺ᤰᤐᤠᤜᤠ᤹. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤠᤱᤜᤠ᤹ ᤔᤧᤕᤢᤱᤒᤠ ᤔᤠᤱᤜᤡᤶᤔᤥ ᤂᤠᤷᤔᤧᤴᤍᤰ ᤏᤢ ᤀᤡᤱᤗᤧᤰ ᤀᤡᤛᤣ᤺ᤱ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥”

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖᤥ. “ᤂᤧᤴ ᤕᤧᤴᤏᤥ ᤕᤖᤢᤛᤗᤧ᤺ᤶᤔᤥᤒᤠ ᤅᤠ ᤗᤠᤶᤎᤣ᤺ᤵᤐᤥᤗᤠᤶ ᤐᤣᤗᤡ. ᤁᤢᤛᤱ ᤐᤠᤱᤓᤣ᤹ᤀᤥᤗᤠᤶ ᤜᤠ᤺ᤶᤗᤠᤰᤘᤠ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ᤗᤠᤶ ᤐᤢᤖᤢ᤺ᤱ ᤁᤧᤗᤢ᤺ᤶᤒᤠ ᤀᤡᤰᤗᤠᤴ ᤌᤠ᤺ᤱ ᤗᤧᤵᤔᤠᤱ ᤐᤣ᤺ᤰᤗᤥ॥

¹¹ “ᤛᤱᤀᤡᤱᤍᤧᤴᤏᤥ ᤁᤧᤕᤢᤱᤒᤠᤛᤣ. ᤀ᤺ᤰᤋᤧᤶᤔᤧ᤹ᤀᤠᤱ ᤜᤠᤒᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤖᤧᤰ ᤁᤧᤛᤱᤒᤠ ᤁᤧᤀᤡᤱᤒᤠᤜᤠ᤹ ᤔᤧᤔᤠ ᤔᤧᤒᤣ᤺ᤰᤗᤥ. ᤕᤢᤵᤐᤠ ᤀᤡᤱᤔᤠ ᤛᤱᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤔᤠᤖᤥ॥

¹² ᤂᤧᤴ ᤕᤧᤶᤔᤥ ᤛᤣᤔᤡ ᤜᤠ᤺ᤴᤍᤢᤱᤅᤠᤱ ᤕᤖᤢᤛᤗᤧ᤺ᤶᤔᤡᤴ ᤁᤥ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ ᤕᤠ᤺ᤴᤍᤡᤰ ᤁᤧᤍᤠᤒᤠᤀᤠᤱ ᤁᤧᤕᤢᤱᤒᤠᤜᤠ᤹. ᤁᤢᤕᤢ᤺ᤴᤍᤠᤱᤘᤠ ᤁᤧᤍᤠᤱᤛᤡᤱᤒᤠ ᤆᤧᤸᤗᤧᤰᤛᤣ᤹ ᤌᤡ ᤜᤧᤰᤁᤣ ᤁᤧᤕᤢᤱᤒᤠᤀᤠᤱ ‘ᤕᤜᤘᤣ ᤍᤠᤱᤒᤧᤸᤗᤧ ᤏᤢᤒᤠᤀᤠᤱ ᤔᤧᤈᤥᤃᤢᤴ᤹ ᤋᤠᤵᤑᤧ᤺ᤶᤒᤠᤀᤠᤱ ᤔᤧᤈᤥᤃᤢᤴ’ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ ᤔᤏᤠᤜᤠ᤹ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥

¹³ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤏᤠᤵᤋᤢᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤔᤧᤗᤢ᤺ᤴᤍᤢᤖᤥ॥ ᤂᤧᤱᤜᤠ᤹ᤖᤧ ᤜᤡᤶᤜᤠ᤹ ᤔᤧᤈᤥᤃᤢ᤹ ᤁᤖ ᤂᤧᤵᤔᤥ ᤕᤢᤱᤔᤠ ᤔᤧᤱᤄᤥᤏᤧᤴᤗᤥ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤔᤧᤗᤣ᤺ᤳᤋᤢᤖᤥ ᤁᤖ ᤂᤧᤴ ᤗᤠᤶᤒᤠ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤔᤧᤱᤄᤥᤛᤢᤴᤗᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤁᤢᤕᤧᤴ

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤁᤢᤕᤧᤴᤏᤡᤴ ᤆᤡᤍᤢᤵ ᤘᤠ᤹ᤖᤥ. ᤂᤧᤴ ᤏᤡ᤺ᤳᤋᤠᤱ ᤏᤢ ᤜᤠᤖᤠᤜᤠᤖᤠ ᤋᤠᤖ ᤐᤳᤗᤥ॥ ᤂᤧᤵᤛᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤥᤒᤠ ᤀᤡᤰᤗᤠᤴ ᤁᤢᤈᤠᤓᤧᤴᤗᤥ. ᤂᤧᤵᤔᤥ ᤌᤰᤗᤡᤜᤠᤱᤜᤠ᤹ ᤛᤠ᤹ᤖᤡᤰ ᤕᤶᤒᤠ ᤔᤧᤀ᤺ᤰᤗᤥ॥

¹⁵ ᤂᤧᤴ ᤕᤧᤴᤏᤡᤴ ᤛᤡᤰᤐᤥ᤺ᤰᤔᤠ ᤕᤧᤴ. ᤋᤢᤰᤂᤣ ᤗᤠᤰᤂᤣ ᤏᤢ ᤁᤧᤛᤠᤰᤐᤠ ᤕᤧᤴ. ᤂᤠᤵᤐᤢᤌᤩ᤺ᤱ ᤐᤥᤱᤔᤠ ᤏᤢ ᤔᤧᤰᤔᤠᤛᤡᤔᤠ ᤕᤧᤴ. ᤂᤠᤔᤠᤰᤔᤠ ᤏᤢ ᤔᤢᤍᤥᤂᤠᤶᤍᤥᤒᤠ ᤕᤧᤴ. ᤂᤠ᤹ᤔᤡᤳ ᤏᤢ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤕᤧᤴ.

¹⁶ ᤁᤒᤪᤡᤱ ᤑᤠᤰᤔᤏᤠᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤛᤢᤰᤐᤥᤒᤠ ᤆᤱᤜᤡᤶᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤌᤢᤳᤌᤢᤖᤡ᤺ᤵᤐᤠ ᤏᤢ ᤋᤧᤴᤎᤱᤃᤧᤴ ᤀᤡᤰᤗᤠ ᤗᤠᤃᤧᤀᤡᤰᤐᤠ ᤕᤧᤴ ᤐᤥᤱᤗᤥ॥

¹⁷ ᤀᤠᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤧᤳᤋᤢᤰᤂᤣ ᤋᤠᤖᤢᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤡᤰᤑ᤺ᤶᤒᤠ ᤜᤧᤰᤁᤣ ᤗᤠᤱᤔᤧᤄᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤀᤠᤸᤗ ᤂᤢᤴᤇᤡ᤹ ᤔᤠᤰᤂᤡᤴ ᤆᤫᤠ᤺ᤳ ᤜᤧᤰᤁᤣ ᤏᤢ ᤂᤢᤴᤇᤡ᤹ ᤜᤡᤍᤢ᤺ᤳ ᤌᤧᤅᤠ᤺ᤱᤜᤠ᤹ ᤜᤡ ᤜᤧᤰᤁᤣ ᤛᤧᤀᤠᤱ ᤏᤧᤖᤥ॥

¹⁸ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ ᤁᤧᤒᤥ᤺ᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤵᤐᤠ᤺ᤸᤗᤧᤀᤠᤱ ᤋᤠᤱᤔᤠ ᤔᤧᤛᤢᤰᤋᤢᤛᤡᤴᤗᤥ ᤛᤠᤶᤔᤩᤠᤱᤅᤡᤸᤗᤧᤀᤠᤱ ᤛᤧ᤺ᤵᤔᤠ ᤔᤧᤛᤢᤰᤋᤢᤛᤡᤴᤗᤥ॥ ᤂᤢᤏᤧ᤹ ᤁᤢᤏᤠᤜᤧᤶᤔᤠ ᤔᤡ᤺ᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤌᤡᤰᤗᤧᤱᤗᤧ ᤏᤢᤵᤛᤢᤛᤡᤖᤥ॥