ᤈᤁᤖᤡᤕᤠ 1 - LIFOTNT

ᤕᤜᤘᤣ ᤍᤠᤱᤒᤠᤀᤥ ᤏᤢ᤺ᤱᤔᤠ ᤀᤢᤘᤠ

¹ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣ ᤕᤧᤳᤇᤡᤃᤣᤰᤐᤠ ᤗᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤀᤡᤍ᤻ᤍᤥᤖᤧᤸᤗᤧ ᤁᤢᤶᤔᤧᤴᤇᤠ᤹ ᤒᤣᤖᤣᤁᤩᤠᤜ᤺ᤸᤗᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤈᤁᤖᤡᤕᤠᤀᤥ ᤁᤧᤖᤧ—

² “ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤘᤕᤧ॥

³ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤔᤏᤠᤜᤠ᤹ ᤔᤧᤳᤋᤧᤛᤧ᤹—ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ᤀᤥ ᤏᤢ᤺ᤰᤂᤧᤶ ᤋᤩᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤗᤧᤵᤔᤠᤱ ᤏᤢ᤺ᤱᤅᤠᤖᤥ॥’

⁴ “ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤜᤧᤰᤋᤱᤒᤠ ᤂᤡᤏᤡ᤹ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹. ᤋᤃᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤘᤕᤧ—ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤸᤗ ᤂᤡᤏᤡ᤹ ᤋᤠᤵᤑᤧ᤺ᤶᤒᤠ ᤛᤢᤳᤏᤠ ᤏᤢ ᤁᤢ᤹ᤀᤡᤓᤧᤶᤔᤠ ᤕᤧᤵᤗᤧᤰ ᤗᤠᤶᤒᤠ ᤏᤢ᤺ᤰᤂᤧᤶᤔᤧ᤹॥’ ᤁᤖ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤧᤵᤔᤠᤱ ᤏᤡᤱᤘᤠ᤹ᤀᤣ ᤔᤧᤶᤒᤡᤖᤢᤴ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥

⁵ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤀᤠᤸᤗ ᤀᤠᤳᤋᤡ ᤔᤧᤘᤠ᤹ᤒᤣ᥅ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤌᤣ ᤂᤧᤱᤜᤠ᤹ ᤀᤠᤵᤑᤠᤸᤗᤧᤛᤠᤱ ᤔᤧᤜᤡᤱᤅᤠᤱ ᤔᤧᤘᤠ᤹ᤒᤡ᥅

⁶ ᤁᤖ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹. ᤀᤠᤱᤃᤠ᤹ ᤀᤠᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤒᤠ ᤀᤠᤒᤠ᤺ᤴᤈᤠ᤺ᤰᤜᤠ᤹ ᤏᤢ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ᤖᤧ ᤌᤣ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤔᤧᤃᤠ᤺ᤰᤋᤢᤛᤡᤴᤏᤠᤱ ᤔᤧᤘᤕᤧᤶᤒᤡ᥅ ᤂᤧᤒᤩᤠᤱ ᤗᤠᤕᤥᤗᤠᤶ ᤔᤧᤜᤡᤴᤍᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤛᤢᤳᤏᤠ ᤏᤢ ᤕᤧᤵᤗᤧᤰ ᤁᤢᤀᤡᤛᤡᤰ ᤀᤠᤏᤡᤃᤣ ᤌᤧᤔᤠ ᤔᤧᤵᤔᤠ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤕᤧ ᤂᤧᤴ ᤀᤠᤏᤡᤃᤧᤏᤢ ᤆᤥᤃᤢᤀᤠᤱ ᤘᤠ᤹ᤖᤥ॥”

ᤛᤡᤱᤒᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤘᤠ᤹ᤒᤠ ᤔᤏᤠ

⁷ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣ ᤛᤣᤒᤠᤋ ᤔᤧᤵᤔᤏᤠᤒᤠ ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤗᤠ᤺ᤸᤗᤧᤴ ᤏᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤀᤡᤍ᤻ᤍᤥᤖᤧ ᤁᤢᤶᤔᤧᤴᤇᤠ᤹. ᤒᤣᤖᤣᤁᤩᤠᤜᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤈᤁᤖᤡᤕᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤁᤧᤖᤧ॥

⁸ ᤀᤥᤔᤧᤳᤋᤧ᤹. ᤛᤧᤴᤍᤡᤰ ᤀᤠᤱᤃᤠ᤹ ᤀᤰᤋᤱᤒᤠ ᤛᤢᤑᤥ ᤏᤡᤛᤢᤱ. ᤀᤠᤱᤃᤠ᤹ ᤀᤠᤍᤃᤡ ᤔᤏᤠᤎᤡᤰᤗᤧ ᤜᤧ᤺ᤳᤋᤠᤱᤒᤠ ᤀᤴᤏᤡᤴ ᤕᤢᤰᤋᤢᤀᤠᤱ ᤘᤕᤧ॥ ᤂᤢᤏᤧ᤹ ᤐᤠᤰᤗᤢᤶᤗᤢᤶᤒᤠ ᤋᤧᤴᤏᤥᤒᤠ ᤌᤰᤔᤣ᤺ᤵᤐᤠ ᤗᤠᤀᤥ ᤁᤧᤓᤧᤰᤐᤠ ᤛᤡᤱᤒᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤕᤧᤒᤧᤃᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤗᤧᤵᤔᤠᤱ ᤜᤧ᤺ᤳᤁᤧᤗ᤹ᤒᤠ. ᤜᤧ᤺ᤋᤩᤱᤕᤱᤒᤠ ᤏᤢ ᤑᤃᤧᤖ᤹ᤒᤠ ᤀᤴᤜᤠ᤹ᤀᤠᤱ ᤔᤧᤘᤕᤧ॥

⁹ ᤀᤠᤱᤃᤠ᤹ ᤛᤣ᤺ᤴᤍᤥᤛᤢᤱ. “ᤀᤠᤍᤠᤱᤒᤣ. ᤁᤴᤜᤠ᤹ ᤌᤣᤛᤡ᥅” ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤔᤠᤱᤗᤠᤀᤡᤱᤒᤧᤸᤗᤧ ᤏᤢᤃᤵ ᤐᤡᤖᤠᤱ. “ᤁᤴᤜᤠ᤹ ᤌᤣᤛᤡᤒᤣ ᤁᤧᤗ᤹ᤒᤠᤴ ᤀᤠᤱᤃᤠ᤹ ᤀᤥ᤺ᤴᤎᤠᤰᤏᤧ॥”

¹⁰ ᤂᤧᤒᤩᤠᤱ ᤌᤰᤔᤣ᤺ᤵᤐᤠ ᤗᤠᤀᤥ ᤁᤧᤓᤧᤰᤐᤠ ᤛᤡᤱᤒᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤕᤧᤵᤐᤠᤃᤧᤈᤠᤒᤠ ᤔᤏᤠ᤺ᤸᤗᤧ ᤐᤠ᤺ᤳᤋᤢᤖ ᤔᤧᤳᤋᤠᤱ. “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤐᤠᤱᤄᤢᤛᤡᤒᤠᤜᤠ᤹ ᤁᤴ ᤀᤴᤃᤧᤕᤢᤰᤐᤠᤜᤠ᤹ᤀᤣᤖᤥ॥”

¹¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤰᤔᤣ᤺ᤵᤐᤠ ᤗᤠᤀᤥ ᤁᤧᤓᤧᤰᤐᤠ ᤛᤡᤱᤒᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤕᤧᤵᤐᤠᤃᤧᤈᤠᤒᤠ ᤔᤠᤱᤗᤠᤀᤡᤱᤒᤧᤴ ᤔᤧᤈᤧᤰᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤏᤡᤃᤣ ᤁᤧᤖᤧᤰ ᤐᤡᤛᤠᤱ ᤐᤣᤃᤡᤃᤧ. ᤜᤧᤰᤁᤩᤠᤱ ᤛᤧᤰᤂᤠᤀᤣ. ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤐᤵᤐᤪᤠ᤹ᤔᤠ ᤏᤢ ᤌᤣᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤁᤣ ᤏᤧᤛ᤻ᤛᤧᤒᤠ ᤏᤡᤛᤢᤶᤒᤧ॥”

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤐᤠ᤺ᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤁᤴ ᤏᤢᤒᤥᤱ ᤋᤱᤒᤣ ᤌᤠᤖᤡᤰ ᤀᤠᤍᤠᤱᤒᤠ ᤕᤖᤢᤛᤗᤧᤔ ᤏᤢ ᤕᤜᤢᤍᤠ ᤐᤠᤱᤈᤢᤶᤜᤠ᤹ᤀᤥᤒᤠ ᤔᤏᤠᤜᤠ᤹ᤏᤢ ᤁᤧᤛᤡᤰ ᤐᤥᤃᤧᤀᤠᤱ ᤘᤠ᤹॥ ᤀᤠᤍᤠᤱᤒᤠᤖᤧ ᤀᤠᤓᤧᤸᤗᤧ ᤌᤠᤖᤡᤰ ᤂᤧᤱᤜᤠ᤹ ᤗᤢᤱᤔᤠ᤹ ᤁᤧᤴᤍᤢᤰᤋᤢᤛᤡᤴᤒᤠᤒᤣ᥅”

¹³ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤔᤠᤱᤗᤠᤀᤡᤱᤒᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤠ᤺ᤴᤇᤡᤱᤔᤠ ᤐᤠ᤺ᤴᤜᤠ᤹ ᤔᤧᤳᤋᤢ॥

¹⁴ ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤋᤠ᤹ᤃᤧᤈᤧᤱᤒᤠᤖ ᤁᤧᤒᤵᤐᤠ ᤂᤧᤴ ᤔᤠᤱᤗᤠᤀᤡᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥᤃᤧ᤹—ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤕᤖᤢᤛᤗᤧᤔ ᤏᤢ ᤛᤡᤕᤥᤏᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤠᤜᤧᤴ.

¹⁵ ᤁᤖ ᤁᤶᤒᤪᤠᤱ ᤁᤧᤀᤡ᤺ᤵᤐᤠᤀᤠᤱ ᤁᤧᤕᤢᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥᤃᤧᤀᤠᤱ ᤘᤠ᤹᥄ ᤀᤠᤱᤃᤠ᤹ᤃ ᤕᤖᤢᤛᤗᤧᤔ ᤜᤧᤰᤁᤩᤠᤱ ᤛᤡᤕᤥᤏᤧᤴᤏᤢ ᤀᤠᤈᤧ᤺ᤳᤇᤡᤰᤗᤰ ᤀᤠᤛᤠᤰᤁᤧᤴ ᤐᤥᤃᤧᤀᤠᤱ ᤘᤕᤠᤱ. ᤁᤖ ᤕᤖᤢᤛᤗᤧ᤺ᤶᤔᤡᤴ ᤁᤧᤓᤵᤐᤠ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤃ ᤀᤠᤱᤃᤠ᤹ ᤀᤡ᤺ᤳᤋᤢᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ॥’

¹⁶ “ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤡᤰ ᤕᤖᤢᤛᤗᤧ᤺ᤶᤔᤥ ᤏᤢ᤺ᤱᤅᤠᤖᤥ॥ ᤂᤧᤵᤔᤥ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤕᤠᤶᤔᤥ ᤔᤧᤈᤥᤃᤢ᤹॥ ᤕᤖᤢᤛᤗᤧᤔ ᤛᤡ᤺ᤰᤔᤠ ᤀᤡᤍᤠ᤺ᤰᤁᤧᤴ ᤂᤡᤱᤄᤡᤱᤒᤠ ᤐᤥᤱ᤹.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥

¹⁷ “ᤕᤠᤶᤔᤥ ᤀᤰᤂᤣ ᤐᤠ᤺ᤳᤋᤧ᤹ᤀᤠᤱ ᤀᤢᤘᤠ ᤆᤥᤃᤧ᤹—ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤀᤠᤒᤠᤱᤈᤢᤶᤜᤠ᤹ ᤕᤠᤶᤔᤥ ᤏᤢ᤹ᤔᤠᤍᤠᤔᤠᤖᤧ ᤁᤢᤎᤡᤶ ᤐᤥᤱᤅᤠᤱ ᤘᤧᤳ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤕᤥᤏᤧᤴ ᤕᤠᤶᤔᤥ ᤀᤠ᤺ᤴᤇᤡᤱᤔᤠ ᤐᤡᤖᤢ᤹. ᤂᤶᤓᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤕᤠᤶᤔᤥ ᤛᤣᤃᤢᤖᤥ॥’”

ᤗᤡᤛᤡ ᤋᤠᤱᤜᤠ᤹ ᤏᤢ ᤗᤡᤛᤡ ᤆᤥᤒᤣᤃᤢᤜᤠ᤹

¹⁸ ᤂᤧᤒᤩᤠᤱ ᤀᤠᤱᤃᤠ᤹ ᤌᤠ᤺ᤱ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤀᤥᤔᤧᤳᤋᤧᤶᤔᤧ᤹. ᤂᤧᤵᤔᤥ ᤀᤠᤱᤃᤠ᤹ ᤀᤠᤍᤃᤡ ᤗᤡᤛᤡ ᤋᤠᤱᤜᤠ᤹ ᤐᤳᤇᤧ॥

¹⁹ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠᤖ ᤁᤧᤒᤵᤐᤠ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤛᤣ᤺ᤴᤍᤥᤛᤢᤱ. “ᤁᤴᤜᤠ᤹ ᤌᤧᤔᤠᤛᤡᤒᤣ᥅” ᤂᤢᤏᤧ᤹ ᤏᤢᤃᤵ ᤐᤡᤖᤠᤱ. “ᤀᤡᤛᤪᤠᤀᤡᤗ. ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤡᤴ ᤑᤢᤳᤇᤡᤱᤈᤩᤠᤱ ᤁᤧᤈᤥ᤺ᤰᤐᤠ ᤋᤠᤱᤜᤠ᤹ ᤀᤠᤶᤓᤠ ᤁᤴᤜᤠ᤹ᤖᤥ॥”

²⁰ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤗᤡᤛᤡ ᤑᤧᤴᤈᤣ᤹ ᤁᤧᤎᤰᤐᤠᤜᤠ᤹ ᤀᤥᤛᤣ᤺ᤴᤎᤠᤰᤋᤠᤱ॥

²¹ ᤀᤠᤱᤃᤠ᤹ ᤛᤣ᤺ᤴᤍᤥᤛᤢᤱ. “ᤁᤴᤜᤠ᤹ ᤌᤣ ᤆᤥ᤺ᤰᤛᤧ ᤔᤧᤍᤠᤖ ᤔᤧᤒᤵᤐᤠᤒᤣ᥅” ᤂᤢᤏᤧ᤹ ᤏᤢᤃᤵ ᤐᤡᤖᤠᤱ. “ᤗᤳᤇᤠ ᤔᤏᤠᤖᤧᤀᤠᤱ ᤌᤧᤃᤣᤰ ᤑᤥᤱᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤕᤜᤢᤍᤠᤴ ᤑᤢᤳᤇᤡᤱᤈᤩᤠᤱ ᤁᤧᤈᤥ᤺ᤰᤐᤠ ᤋᤠᤱᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ. ᤁᤖ ᤑᤧᤴᤈᤣ᤹ ᤁᤧᤎᤰᤐᤠᤜᤠ᤹ᤃ ᤂᤧᤱᤜᤠ᤹ ᤕᤱᤔᤠ ᤛᤧᤵᤔᤠᤛᤡ. ᤜᤧᤰᤁᤩᤠᤱ ᤕᤜᤢᤍᤠ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤵᤔᤥᤒᤠ ᤔᤏᤠᤜᤠ᤹ ᤑᤢᤳᤇᤡᤱᤈᤩᤠᤱ ᤁᤧᤈᤥ᤺ᤰᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤱᤜᤠ᤹ ᤗᤠᤵᤑᤢᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤔᤧᤍᤩᤧᤒᤠᤖᤥ॥”