ᤋᤡᤋᤛ 1 - LIFOTNT

¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤐᤠᤘᤗᤗᤠᤶᤒᤠ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤧ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤢᤓᤠ᤹ ᤐᤡᤔᤠᤛᤡ ᤜᤧᤰᤁᤩᤠᤱ ᤀᤠᤏᤡ᤹ ᤛᤠᤶᤕᤥᤖᤧ ᤀᤠᤜᤢ᤹ᤖᤧᤒᤠ ᤛᤧᤰᤂᤠᤀᤥ ᤗᤠᤶᤗᤥᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤣᤃᤠᤱᤗᤥ॥

² ᤁᤴ ᤛᤧᤰᤂᤠ᤺ᤸᤗᤧ ᤆᤥᤃᤢᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧ ᤏᤡᤱᤛᤠᤱᤅᤡᤴ ᤀᤠᤄᤥᤛᤢᤶ. ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤡᤱᤗᤧᤰ ᤔᤧᤶᤒᤠ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤶᤔᤡᤸᤗᤧ ᤁᤢᤜᤣ᤺ᤰᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤁᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧ ᤔᤠᤱᤜᤧᤰᤁᤡᤴ ᤆᤥᤃᤢᤀᤠᤱ ᤘᤕᤧᤖᤥ॥

³ ᤜᤧᤰᤁᤩᤠᤱ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤥ. ᤛᤣ᤺ᤰᤕᤢᤰ ᤆᤥᤃᤢᤒᤠ ᤛᤢᤕᤧᤶᤔᤥ ᤁᤢᤒᤠ᤺ᤴᤈᤠᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤠᤱᤅᤠᤱ ᤂᤧᤴ ᤀᤡᤱᤓᤴ ᤆᤥ᤺ᤰᤔᤠ ᤗᤰᤐᤧᤴ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥

⁴ ᤀᤠᤴᤇᤡ᤹ ᤗᤳᤇᤠ ᤏᤛᤠ᤺ᤴᤏᤥ ᤛᤧᤰᤂᤠᤛᤔᤠ ᤀᤠᤛ᤻ᤛᤠ ᤋᤡᤋᤛᤣ. ᤜᤠᤖᤠ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤁᤧᤒᤡᤖᤖᤥ॥

ᤁᤪᤣᤋ ᤗᤠᤈᤣ᤹ᤀᤥ ᤋᤡᤋᤛᤖᤧ ᤁᤢᤕᤠ᤺ᤶᤒᤰ

⁵ ᤂᤧᤏᤧ᤹ᤃ ᤀᤡᤱᤃᤠ᤹ ᤁᤪᤣᤋ ᤗᤠᤈᤣ᤹ᤀᤥ ᤔᤧᤴᤈᤢ᤺ᤳᤋᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤛᤢ᤺ᤵᤔᤠ ᤜᤧᤰᤁᤩᤠᤱ ᤐᤡᤏᤧᤒᤠ ᤀᤥ᤺ᤴᤎᤠᤰ ᤁᤢᤀᤡᤛᤡᤰ ᤁᤠᤰ ᤐᤠᤱᤈᤢᤶᤜᤠ᤹ᤀᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤋᤢᤶᤗᤠᤶᤗᤥᤒᤠᤜᤠ᤹ ᤛᤣ᤺ᤰᤕᤢᤰ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤐᤰᤌᤠᤏᤧᤒᤠᤖᤥ॥

⁶ ᤋᤢᤶᤗᤠᤶᤗᤥᤒᤠᤱᤃ ᤑᤥᤋᤩᤠ ᤔᤣ᤺ᤴᤏᤣᤒᤠ ᤏᤢ ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ ᤐᤥᤱᤔᤠ ᤐᤥᤱ॥ ᤜᤧᤰᤁᤩᤠᤱ ᤁᤢᤛ᤻ᤛᤠᤜᤠ᤹ᤀᤠᤱ ᤂᤷᤔᤧᤴᤍᤰ ᤏᤢ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤣ᤺ᤴ. ᤁᤖ ᤏᤛᤠᤏᤡᤒᤠ ᤐᤥᤱᤔᤠᤀᤣ ᤐᤥᤱᤗᤥ॥

⁷ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰ ᤁᤧᤄᤥᤒᤠᤖᤥ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤃ ᤑᤥᤋᤩᤠ ᤔᤣ᤺ᤴᤏᤣᤒᤠ ᤐᤥᤱᤔᤠᤀᤣ ᤐᤥᤱᤗᤥ—ᤀᤠᤱᤍᤡᤱ ᤁᤧᤗ᤹ᤒᤠ ᤏᤢ ᤜᤠᤖᤠ ᤁᤢᤛᤡᤰ ᤁᤧᤒᤥ᤺ᤰᤐᤠ. ᤌᤡ᤺ ᤛᤡᤈᤱᤘᤠ᤺ᤸᤗᤧ ᤁᤧᤔᤒᤠ. ᤁᤧᤀᤠ᤺ᤶᤒᤠ. ᤑᤧᤴᤕᤠ᤺ᤶᤒᤰᤗᤠᤶ ᤕᤠᤱ ᤁᤧᤎᤰᤐᤠ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥

⁸ ᤁᤖ ᤂᤢᤏᤧ᤹ᤃ ᤋᤖᤣ ᤁᤧᤍᤥᤒᤠ ᤏᤢ ᤏᤢᤒᤠ ᤐᤠ᤺ᤴᤜᤠ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤐᤥᤱᤔᤠᤀᤣ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ ᤜᤠᤱᤃᤧᤶᤛᤠᤒᤠ. ᤛᤠᤶᤕᤥᤒᤠ. ᤛᤣᤛᤣ ᤏᤢ ᤜᤧᤴᤌᤡᤶᤒᤠ ᤐᤥᤱᤔᤠᤀᤣ ᤐᤥᤱᤗᤥ॥

⁹ ᤂᤢᤏᤧ᤹ᤃ ᤜᤢ᤹ᤛᤡᤱᤒᤠ ᤛᤧᤰᤂᤠᤛᤔᤠ ᤐᤠ᤺ᤴᤈᤠᤰᤁᤥ ᤘᤠ᤹ᤔᤠᤀᤣ ᤐᤥᤱ. ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤘᤣ᤹ᤜᤠ᤹ ᤛᤧᤰᤂᤠᤛᤔᤠ ᤏᤡᤛᤠᤶᤗᤠᤶᤒᤠ ᤜᤠᤱᤜᤠᤱ ᤔᤧᤵᤔᤠᤛᤡ ᤏᤢ ᤂᤧᤴ ᤏᤡᤛᤠᤶ ᤁᤧᤀᤵᤐᤠᤜᤠ᤹ᤖᤧ ᤂᤢᤏᤡ᤹ ᤐᤣ᤺ᤴᤍᤡ᤺ᤴ ᤀᤥᤛᤣ᤺ᤴᤎᤠᤰᤔᤠ ᤛᤢᤰᤋᤢᤛᤡ᤹ᤖᤥ॥

ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ ᤀᤵᤔᤠᤛᤡ

¹⁰ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤖᤡᤰ ᤕᤢᤰᤁᤥ ᤔᤧᤴᤕᤢᤱᤔᤏᤠᤒᤠ ᤏᤢ ᤐᤠ᤺ᤴᤑᤠᤋᤪᤧᤜᤠ᤹. ᤘᤣ᤹ ᤀᤡᤱᤗᤧᤰ ᤁᤧᤔᤧᤵᤐᤠᤜᤠ᤹ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤀᤥ ᤕᤖᤡᤰᤋᤱᤒᤠᤃ ᤕᤜᤢᤍᤡ ᤜᤷᤍᤥ ᤜᤧᤰᤔᤠ ᤌᤡᤶ ᤏᤠ᤺ᤵᤔᤠᤀᤣ ᤐᤥᤱ ᤗ᤹ᤖᤡᤰ ᤁᤧᤒᤠ᤺ᤵᤐᤠᤛᤡᤖᤥ॥

¹¹ ᤂᤧᤱᤜᤠ᤹ᤃ ᤛᤫᤠ᤺ᤳ ᤆᤥ᤺ᤰᤔᤠᤛᤡᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤑᤧᤴ ᤕᤠ᤺ᤶᤒᤰᤗᤠᤶᤒᤠ ᤕᤠᤱᤛᤠᤁᤢᤴᤎᤣ ᤌᤰᤛᤧ ᤂᤧᤱᤜᤠ᤹ᤖᤧ ᤜᤢ᤹ᤔᤠ ᤔᤧᤴᤏᤢ᤹ᤔᤏᤠᤒᤠ ᤏᤡᤛᤠᤶ ᤔᤧᤜᤢ᤹ᤖᤢᤛᤡᤖ ᤁᤢᤓᤠ ᤜᤡᤶᤛᤕᤱᤜᤠ᤹ ᤁᤠᤰ ᤑᤧᤳᤔᤧᤗᤠ᤺ᤴᤍᤢᤛᤡᤖ ᤔᤧᤕᤠᤰᤗᤥ॥

¹² ᤜᤧᤰᤁᤩᤠᤱ ᤁᤱᤃ ᤁᤪᤣᤋ ᤁᤧᤕᤢᤱᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤂᤠᤃᤧᤀᤡᤰᤐᤠᤎᤡᤰᤗᤧ ᤀᤠᤵᤑᤣᤰ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤁᤪᤣᤋ ᤁᤧᤕᤢᤱᤒᤠᤜᤠ᤹ᤃ ᤛᤍᤠᤍᤡᤱ ᤀᤡᤱᤗᤧᤰ ᤁᤧᤒᤠ᤺ᤵᤐᤠ. ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠ ᤋᤠᤶᤓᤢᤱ ᤌᤰᤛᤠ ᤜᤧᤰᤋᤱᤒᤠ ᤜᤧᤰᤁᤩᤠᤱ ᤗᤧᤶᤛᤢᤘᤠᤒᤠ ᤋ᤺ᤰᤌᤧ᤺ᤰᤁᤣ ᤔᤧᤈᤥᤰᤗᤥ॥”

¹³ ᤁᤴ ᤐᤠ᤺ᤳᤋᤧᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤏᤛᤠᤏᤡᤒᤠᤜᤠ᤹ ᤀᤠᤸᤗᤛᤠᤱ ᤏᤢᤖᤡᤰᤁᤠᤱ ᤏᤛᤠᤴ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤑᤧ᤺ᤰᤋᤧᤛᤧ᤹ᤀᤥ॥

¹⁴ ᤜᤧᤰᤁᤩᤠᤱ ᤛᤧᤰᤂᤠᤴ ᤁᤧᤀᤵᤐᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤈᤠᤱᤅᤡᤴ ᤏᤢ ᤕᤜᤢᤍᤡ ᤂᤧᤍᤠ᤹ᤜᤠ᤹ ᤂᤧᤱᤜᤠ᤹ᤖᤧ ᤂᤧᤶᤔᤠ ᤔᤧᤗᤧᤖᤢ ᤔᤧᤍᤣᤛᤢᤖᤖᤥ॥

¹⁵ ᤛᤣᤛᤣ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ᤏᤢ ᤁᤠᤰ ᤐᤠ᤺ᤴᤜᤠ᤹ ᤛᤣᤛᤣᤀᤣ ᤆᤥᤰᤗᤥ. ᤁᤖ ᤆᤡ᤺ᤴᤈᤡ᤺ᤶᤒᤠ ᤏᤢ ᤏᤛᤠᤴ ᤔᤧᤱᤃᤵᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤌᤣ᤺ᤴᤏᤠᤱ ᤛᤣᤛᤣ ᤔᤧᤈᤥ᤺ᤰᤁᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤏᤢ ᤂᤠᤛᤡᤱᤅᤡᤴ ᤑᤧᤳᤗᤠ᤹ᤖᤧᤀᤠᤱ ᤘᤠ᤹ᤖᤥ॥

¹⁶ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧ ᤗ᤹ᤖᤡᤰ ᤔᤧᤒᤠ᤺ᤳᤋᤢ᤹. ᤁᤖ ᤀᤠᤒᤠᤅᤣ ᤕᤠ᤺ᤶᤒᤰᤁᤥᤗᤠᤶ ᤔᤧᤏᤠ᤹ᤖᤢᤖᤥ॥ ᤂᤧᤱᤜᤠ᤹ᤃ ᤕᤠᤶᤃᤧᤛᤡᤱᤒᤠ ᤏᤢ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠ ᤔᤧᤈᤥ᤺ᤰᤁᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥