ᤖᤢᤌᤖᤧ ᤁᤢᤛᤠᤵᤐᤴ 1 - LIFOTNT

ᤀᤣᤗᤡᤔᤣᤗᤧᤁ ᤏᤢ ᤁᤢᤜᤡᤶᤛᤕᤱᤜᤠ᤹

¹ ᤀᤢᤴᤇᤣ᤺ᤴ ᤂᤠᤛᤧᤴᤗᤥ᤺ᤶᤒᤠ ᤔᤧᤔᤧᤳᤋᤢᤛᤡᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤕᤢᤰ ᤔᤧᤈᤥᤃᤢᤒᤠ ᤕᤧᤶᤔᤥ ᤗᤠᤈᤣ᤹ᤀᤥ ᤛᤠᤰ ᤐᤥᤃᤧ. ᤜᤧᤰᤁᤩᤠᤱ ᤕᤜᤢᤍᤠ ᤗᤠᤈᤣ᤹ᤒᤠ ᤒᤣᤌᤗᤧᤜᤧᤔᤗᤠᤶ ᤁᤢᤓᤠ ᤔᤏᤠ ᤌᤡᤰᤗᤧ ᤁᤢᤔᤣ᤺ᤳᤋᤡᤴ ᤏᤢ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤧᤳᤇᤡ ᤋᤣ᤹ᤖᤢᤛᤡᤀᤠᤱ ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤁᤢᤓᤠ ᤕᤧᤶᤗᤧ ᤗᤠᤃᤡ ᤕᤢᤱᤛᤧ ᤐᤣ॥

² ᤂᤧᤴ ᤔᤏᤠ᤺ᤸᤗᤧ ᤁᤢᤔᤡᤱ ᤀᤣᤗᤡᤔᤣᤗᤧᤁ ᤘᤕᤧ॥ ᤂᤧᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤁᤢᤔᤡᤱ ᤏᤠᤀᤥᤔᤡ ᤘᤕᤧ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤔᤜᤗᤥᤏ ᤏᤢ ᤁᤡᤗᤩᤥᤏ ᤘᤕᤧ॥ ᤂᤧᤱᤜᤠ᤹ ᤕᤜᤢᤍᤠ ᤒᤣᤌᤗᤧᤜᤧᤔᤒᤠ ᤀᤣᤐᤪᤠᤋᤡ ᤌᤠ᤺ᤰᤁᤥᤒᤠ ᤔᤧᤘᤕᤧ॥ ᤂᤧᤱᤜᤠ᤹ ᤔᤥᤀᤠᤒ ᤗᤠᤈᤣ᤹ᤀᤥ ᤔᤧᤒᤣ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤵᤔᤥ ᤕᤢᤱᤔᤠ ᤔᤧᤜᤣ᤺ᤰᤋᤧ॥

³ ᤀᤣᤗᤡᤔᤣᤗᤧᤰᤁᤧᤴ ᤔᤠᤛᤡᤱ ᤜᤧᤰᤁᤩᤠᤱ ᤏᤠᤀᤥᤔᤡᤴ ᤀᤣ᤺ᤰ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤧᤳᤇᤡᤏᤢ ᤕᤢᤱᤔᤠ ᤜᤣ᤺ᤰᤋᤧ॥

⁴ ᤂᤧᤴ ᤏᤧᤵᤑᤢ ᤑᤢ᤹ᤏᤢᤛᤠ᤹ᤜᤠ᤹ ᤀᤥᤷᤐᤠ ᤏᤢ ᤖᤢᤌ ᤔᤡᤱ ᤁᤧᤘᤠ᤺ᤵᤔᤠ ᤔᤥᤀᤠᤒᤡ ᤔᤧᤴᤇ᤻ᤕᤠᤜᤠ᤹ᤏᤢ ᤔᤣ᤺ᤰᤂᤡᤶ ᤆᤥᤃᤧᤛᤡ॥ ᤂᤧᤴ ᤀᤣᤃᤠᤱ ᤜᤵᤔᤧᤴ ᤋᤱᤒᤣ ᤌᤡᤒᤥᤱ ᤕᤠᤱᤛᤡ

⁵ ᤔᤜᤗᤥᤏ ᤏᤢ ᤁᤡᤗᤩᤥᤏ ᤏᤧᤵᤔᤠᤱ ᤔᤠᤏᤧᤛᤡ॥ ᤀᤠᤸᤗ ᤏᤠᤀᤥᤔᤡᤴ ᤕᤧᤶᤒᤠ ᤏᤢ ᤕᤧᤶᤒᤡᤳᤇᤠᤛᤠᤜᤠ᤹ ᤔᤣ᤺ᤴᤏᤣ ᤀᤣ᤺ᤰᤛᤧᤳᤇᤠ ᤐᤥ᤺ᤰᤂᤧᤖᤥ॥

ᤏᤠᤀᤥᤔᤡᤴ ᤏᤢ ᤖᤢᤌᤧᤴ ᤒᤣᤌᤗᤧᤜᤧᤔ ᤏᤢ᤺ᤱᤛᤡ᤹

⁶ ᤁᤢᤓᤠ ᤕᤧᤶ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤐᤥᤃᤢᤃᤧᤴ ᤁᤢᤈᤠ ᤌᤥ᤺ᤰᤋᤧᤒᤠᤴ ᤏᤠᤀᤥᤔᤡ᤺ᤸᤗᤧ ᤂᤧᤵᤛᤢ॥ ᤂᤢᤏᤧ᤹ ᤁᤢᤶᤒᤠᤱᤗᤡᤜᤠ᤹ᤏᤢ ᤔᤥᤀᤠᤒ ᤗᤠᤈᤣ᤹ᤗᤠᤶ ᤀᤠᤒᤠᤅᤣ ᤁᤢᤗᤠᤈᤣ᤹ᤀᤥ ᤕᤠᤱᤏᤠ ᤏᤢ᤺ᤱᤔᤠᤖᤧ ᤗᤠᤃᤡ ᤋᤠᤶᤛᤡᤱ ᤆᤥᤃᤧᤖ ᤕᤠᤃᤧ॥

⁷ ᤂᤧᤒᤩᤠᤱ ᤂᤢᤏᤧ᤹ ᤁᤢᤶᤒᤠᤱᤗᤡᤜᤠ᤹ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤕᤢᤅᤧᤒᤠ ᤋᤧᤴᤏᤡᤴ ᤗᤧᤖᤢ. ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤜᤡᤶ ᤕᤜᤢᤍᤠᤒᤠ ᤗᤠᤶᤔᤥ ᤌᤠᤛᤡᤱ॥

⁸ ᤂᤧᤒᤩᤠᤱ ᤏᤠᤀᤥᤔᤡ᤺ᤸᤗᤧ ᤂᤢᤏᤧ᤹ ᤁᤢᤶᤒᤠᤱᤗᤡᤜᤠ᤹ ᤗᤠᤶᤔᤥ ᤔᤧᤳᤋᤢᤛᤡ. “ᤂᤧᤴᤇᤡ᤹ ᤀᤠᤒᤠᤅᤣ ᤐᤠᤔᤠᤖᤧ ᤂᤢᤴᤇᤡ᤹ ᤜᤡᤶᤔᤥ ᤏᤢ᤺ᤰᤂᤧᤛᤧ᤹॥ ᤂᤧᤴᤇᤡ᤹ ᤀᤠᤱᤃᤠ᤹ ᤜᤧᤰᤁᤩᤠᤱ ᤀᤠᤛ᤻ᤛᤠᤜᤠ᤹ ᤕᤠᤵᤔᤡ ᤏᤢᤖᤡᤰ ᤀᤠᤃ᤻ᤔᤧᤳᤋᤧ. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴᤇᤡ᤹ ᤁᤧᤏᤢ᤹ᤛᤡ ᤁᤧᤍᤠᤛᤡᤖ ᤆᤥᤃᤢᤖ॥

⁹ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴᤇᤡ᤹ ᤏᤧᤵᤔᤠᤱᤗᤧ ᤕᤠᤶᤔᤥ ᤔᤣ᤺ᤰᤂᤡᤶ ᤁᤧᤈᤥ᤺ᤰᤛᤢᤸᤗᤧ ᤂᤧᤴᤇᤡ᤹ ᤕᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ᤀᤥ ᤁᤶᤒᤪᤠᤱ ᤁᤧᤔᤧᤳᤇᤡᤖ॥” ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤆᤢᤵ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤢ᤺ᤰᤁᤠᤱ ᤀᤢ᤺ᤰ ᤔᤧᤜᤠᤒᤧ॥

¹⁰ ᤂᤧᤴ ᤀᤣᤃᤠᤱ ᤂᤢᤴᤇᤡ᤹ ᤗ᤹ᤖᤧᤛᤡ. “ᤀᤠᤴᤇᤡᤃᤣ ᤂᤧᤏᤧ᤹ ᤁᤧᤔᤏᤠᤜᤠ᤹ᤀᤥ ᤂᤧᤏᤧ᤹ᤏᤢᤀᤣ ᤐᤡᤳᤇᤡᤃᤧ॥”

¹¹ ᤏᤠᤀᤥᤔᤡ᤺ᤸᤗᤧ ᤔᤧᤳᤋᤢᤛᤡ. “ᤔᤣ᤺ᤴᤏᤠ. ᤀᤠᤛ᤻ᤛᤠᤛᤣ. ᤂᤧᤴᤇᤡ᤹ ᤔᤠᤒᤠ ᤜᤡᤶᤔᤥ ᤁᤧᤏᤢ᤺ᤱᤛᤡᤖ ᤐᤥᤱ᤹॥ ᤂᤧᤴᤇᤡ᤹ ᤌᤣᤖᤥ ᤑᤠ᤹ᤀᤠᤱ ᤀᤠᤱᤃᤠ᤹ᤏᤢ ᤐᤣ᤺ᤰᤔᤠ ᤁᤧᤃᤥ᤺ᤳᤇᤡᤒᤠᤒᤣ᥅ ᤂᤧᤴᤇᤡ᤹ ᤕᤧᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤕᤠᤶᤔᤥ ᤕᤧᤶᤒᤡᤳᤇᤠᤛᤠ ᤁᤵᤔᤠ ᤔᤧᤛᤢᤰᤁᤠᤴ॥

¹² ᤜᤡᤶᤔᤥ ᤏᤢ᤺ᤰᤂᤧᤛᤧ᤹॥ ᤀᤠᤱᤃᤠ᤹ ᤁᤠᤵᤔᤢᤔᤠ ᤋᤢᤶᤛᤠᤱ ᤆᤢᤖᤠᤱᤅᤠᤱ ᤘᤠ᤹ᤀᤠ. ᤀᤠᤱᤃᤠ᤹ ᤕᤠᤶᤔᤥ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤔᤧᤛᤢᤰᤁᤠᤴ॥ ᤜᤧᤰᤋᤱᤒᤠ ᤏᤡᤱᤛᤠᤱ ᤆᤥ᤺ᤰᤔᤠ ᤗᤠᤶ ᤘᤠ᤹ ᤜᤧᤰᤁᤩᤠᤱ ᤀᤠᤀᤡᤴ ᤛᤧᤴᤍᤡᤰᤛᤠ ᤔᤣ᤺ᤰᤂᤡᤶ ᤆᤥ᤺ᤰᤁᤠᤀᤠᤱ ᤕᤧᤶᤒᤡᤳᤇᤠᤛᤠ ᤁᤵᤔᤠ ᤛᤢᤰᤋᤢᤱᤛᤠᤱ ᤂᤧᤱᤜᤠ᤹ ᤔᤧᤒᤥᤀᤠᤱ ᤕᤶᤒᤠ ᤔᤧᤒᤥᤱ ᤌᤧᤶᤒᤠᤖᤧ

¹³ ᤂᤧᤴᤇᤡ᤹ ᤜᤠᤱᤔᤠ ᤁᤧᤛᤢᤰᤛᤢᤀᤠᤱᤒᤡ᥅ ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤘᤠ᤹ᤔᤠ ᤁᤧᤛᤢᤰᤛᤢᤒᤡ᥅ ᤔᤣ᤺ᤴ. ᤀᤠᤛ᤻ᤛᤠᤛᤣ. ᤂᤧᤴ ᤐᤥᤱᤔᤠᤀᤣ ᤔᤧᤴᤇᤢᤰᤔᤏᤠᤒᤠ ᤐᤠ᤺ᤴᤗᤥ॥ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤴᤇᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤀᤠᤱᤃᤠ᤹ ᤁᤧᤛᤠᤰᤐᤠ ᤋᤢᤔᤢᤱᤅᤠᤱ ᤘᤠ᤹॥”

¹⁴ ᤂᤧᤒᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤀᤢ᤺ᤰᤁᤠᤱ ᤀᤢ᤺ᤰ ᤔᤧᤜᤠᤒᤧ॥ ᤂᤧᤴ ᤀᤣᤃᤠᤱ ᤀᤥᤷᤐᤠ᤺ᤸᤗᤧ ᤁᤢᤴᤏᤢ᤺ᤵᤔᤠᤴ ᤆᤢᤵ ᤔᤧᤳᤋᤢᤀᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤀᤥ ᤏᤢ᤺ᤰᤂᤧᤒᤣ. ᤁᤖ ᤖᤢᤌᤧᤴ ᤁᤢᤴᤏᤢ᤺ᤵᤔᤧᤴᤏᤢ ᤂᤧ᤺ᤶᤛᤡᤱᤅᤠᤱ ᤐᤳᤇᤧ॥

¹⁵ ᤏᤠᤀᤥᤔᤡ᤺ᤸᤗᤧ ᤖᤢᤌᤧᤴ ᤔᤧᤳᤋᤢ. “ᤀᤥᤔᤧᤳᤋᤧᤛᤠ᤹ᤖᤧ. ᤂᤧᤏᤧ᤹ ᤁᤧᤴᤏᤧ᤹ ᤀᤠᤒᤠᤅᤣ ᤁᤢᤃᤠ᤹ᤀᤡᤜᤠ᤹ᤀᤥ ᤏᤢ ᤁᤢᤔᤠᤱ ᤛᤠᤶᤔᤠᤱᤜᤠ᤹ᤀᤥ ᤏᤢ᤺ᤰᤂᤧᤀᤠᤱ ᤐᤣ. ᤂᤧᤏᤧ᤹ᤀᤠᤱ ᤏᤢ᤺ᤰᤂᤧ ᤐᤣᤃᤧ᤹॥”

¹⁶ ᤁᤖ ᤖᤢᤌᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤗᤧᤖᤠᤱᤅᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤧᤛᤠᤰᤐᤠ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹॥ ᤀᤠᤱᤃᤠ᤹ ᤂᤧᤏᤧ᤹ᤏᤢᤀᤣ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹॥ ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰ ᤜᤧᤰᤁᤩᤠᤱ ᤁᤧᤕᤢᤱ. ᤀᤠᤱᤃᤠ᤹ ᤂᤧᤵᤔᤥᤀᤣ ᤐᤣ᤺ᤰᤁᤠ ᤜᤧᤰᤁᤩᤠᤱ ᤕᤢᤱᤅᤠ॥ ᤂᤧᤏᤧ᤹ ᤁᤧᤃᤠ᤹ᤀᤡᤜᤠ᤹ ᤀᤠᤱᤃᤠ᤹ ᤀᤠᤃᤠ᤹ᤀᤡ ᤔᤧᤒᤥᤱ. ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱ ᤐᤥᤱ᤹॥

¹⁷ ᤂᤧᤏᤧ᤹ ᤀᤠᤳᤋᤡ ᤁᤧᤔᤠᤛᤡᤱ. ᤀᤠᤱᤃᤠ᤹ ᤂᤧᤵᤔᤥᤀᤣ ᤔᤠᤛᤡᤱᤅᤠ ᤜᤧᤰᤁᤩᤠᤱ ᤂᤧᤵᤔᤥᤀᤣ ᤔᤧᤗᤢᤵᤐᤠᤖ॥ ᤛᤡᤔᤧᤸᤗᤧᤖᤰ ᤀᤠᤱᤃᤠ᤹ ᤂᤧᤏᤧ᤹ᤗᤠᤶᤒᤠ ᤗᤠ᤺ᤳᤗᤠ᤺ᤳ ᤆᤥ᤺ᤰᤁᤠ. ᤘᤣ᤹ ᤐᤠ᤺ᤴᤏᤡᤸᤗᤧ ᤗᤠ᤺ᤳᤗᤠ᤺ᤳ ᤐᤥᤱᤅᤠᤏᤧᤓᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤍᤣ ᤛᤠᤱᤃᤪᤠ᤺ᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤆᤢᤰᤗ॥”

¹⁸ ᤖᤢᤌᤧᤸᤗᤧ ᤀᤠᤱᤃᤠ᤹ᤏᤢᤀᤣ ᤐᤣ᤺ᤰᤔᤠ ᤛᤧᤰᤂᤠᤒᤠ ᤏᤡ᤺ᤴᤎᤥ ᤆᤥᤃᤢ ᤛᤢᤖᤢᤖᤧᤳᤇ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤏᤠᤀᤥᤔᤡ᤺ᤸᤗᤧ ᤕᤠᤶᤔᤥ ᤘᤣ᤹ ᤌᤣᤀᤠᤱ ᤔᤧᤒᤠ᤺ᤳᤋᤢᤴ॥

¹⁹ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤵᤔᤠᤱ ᤗᤠᤶ ᤌᤠᤏᤧᤳᤇᤡ. ᤜᤧᤰᤁᤩᤠᤱ ᤒᤣᤌᤗᤧᤜᤧᤔ ᤁᤧᤖᤧ ᤑᤧᤖᤧᤳᤇᤡ॥ ᤀᤠᤸᤗ ᤒᤣᤌᤗᤧᤜᤧ᤺ᤶᤔᤥ ᤂᤢᤴᤇᤡ᤹ ᤁᤧᤖᤧᤛᤡᤸᤗᤧ ᤕᤧᤰᤕᤰᤁᤥ ᤁᤧᤖᤧᤰ ᤐᤡᤛᤠᤱ ᤁᤴ ᤐᤠ᤺ᤴᤏᤡᤴ ᤀᤡᤅᤧ॥ ᤔᤧᤴᤇᤢᤔᤠᤜᤠ᤹ ᤀᤰᤂᤣᤗ᤹ᤖᤡᤰ ᤐᤠᤴ ᤛᤣ᤺ᤴᤍᤥᤔᤠ ᤔᤧᤜᤣ᤺ᤰᤋᤧ. “ᤌᤣ ᤁᤴ ᤛᤧᤰᤂᤠ ᤏᤠᤀᤥᤔᤡ᤺ᤴᤏᤣᤒᤡ᥅”

²⁰ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤠᤀᤥᤔᤡ ᤀᤠᤶᤔᤧᤳᤋᤧᤶᤔᤡᤴᤏᤧ᤹ ᤁᤖ ᤔᤠᤖᤠ ᤀᤥᤔᤧᤳᤋᤧ᤹. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤏᤡᤱᤘᤠ᤹ ᤁᤧᤒᤱᤒᤠ ᤆᤥᤃᤢᤀᤠᤱ ᤘᤠ᤹॥

²¹ ᤀᤠᤱᤃᤠ᤹ ᤁᤵᤔᤥᤏᤢ ᤐᤣᤃᤠᤱᤅᤡᤸᤗᤧ ᤀᤠᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤳᤋᤢᤱ. ᤁᤖ ᤀᤠᤸᤗᤥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤌᤣᤀᤠᤱ ᤔᤣ᤺ᤴᤏᤣ ᤏᤢ᤺ᤰᤋᤠᤱ ᤑᤧᤳᤋᤠᤱᤅᤠᤱ ᤘᤠ᤹॥ ᤀᤠᤸᤗ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤠᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤶᤎᤠᤱ ᤋᤢᤰᤂᤣ ᤗᤠᤰᤂᤣᤜᤠ᤹ ᤋᤠᤖᤢᤀᤠᤱ ᤘᤠ᤹ᤀᤡᤸᤗᤧ ᤀᤠᤱᤃᤠ᤹ ᤌᤣᤀᤠᤱ ᤏᤠᤀᤥᤔᤡ ᤀᤠᤃ᤻ᤔᤧᤵᤐᤠᤒᤣ᥅”

²² ᤁᤶᤓᤗ᤹ᤖᤡᤰ ᤏᤠᤀᤥᤔᤡᤴ ᤁᤢᤶᤒᤠᤱᤗᤡ ᤔᤥᤀᤠᤒᤡ ᤖᤢᤌᤧᤴᤏᤢ ᤛᤥᤖᤡᤰ ᤔᤥᤀᤠᤒᤗᤠᤶᤒᤠ ᤏᤢ᤺ᤰᤂᤧ ᤑᤧᤖᤧ॥ ᤒᤣᤌᤗᤧᤜᤧ᤺ᤶᤔᤥ ᤂᤢᤴᤇᤡ᤹ ᤁᤧᤖᤧ ᤑᤧᤖᤧᤛᤡᤸᤗᤧ ᤂᤠᤖᤰ ᤜ᤺ᤰᤛᤡ ᤜᤧᤰᤔᤠ ᤔᤧᤜᤣ᤺ᤰᤋᤢᤖ ᤔᤧᤕᤠᤃᤧᤖᤥ॥