ᤂᤠᤜᤢᤴ 6 - LIFOTNTᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤣ᤹ ᤐᤠ᤺ᤴᤜᤠ᤹ 1 ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤢᤛᤡᤱᤏᤠᤳᤋᤥ ᤋᤥ᤺ᤴᤍᤡ ᤁᤧᤕᤢᤱᤛᤡᤱᤅᤠᤱ ᤁᤧᤘᤠ᤹ᤏᤧᤓᤃᤪ ᤀᤡᤃᤪ ᤁᤢᤓᤠᤏᤢ ᤔᤠᤱᤃᤧᤜᤧᤰᤛᤡᤱᤅᤠᤱ ᤁᤧᤘᤠ᤹ᤏᤧᤓᤃᤪ. 2 ᤂᤧᤏᤧ᤹ ᤀᤠᤵᤑᤣᤰ ᤔᤠᤱᤃᤧᤜᤧᤰᤛᤡᤱᤒᤠ ᤐᤠ᤺ᤴᤏᤥ ᤁᤧᤎᤠᤏᤧᤓᤃᤪ. ᤜᤧᤰᤁᤩᤠᤱ ᤁᤧᤶᤒᤪᤠᤀᤥᤒᤠ ᤐᤠ᤺ᤴᤏᤡᤸᤗᤧ ᤀᤡᤈᤥᤀᤥ ᤁᤧᤎᤠᤏᤧᤓᤃᤪ. 3 ᤜᤧᤰᤁᤣᤏᤧᤓᤃᤪ. ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤜᤧᤰᤁᤣᤀᤣ ᤆᤥᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤢᤜᤢᤰᤁᤥ ᤂᤧᤏᤧ᤹ ᤁᤧᤎᤩᤧᤀᤠᤱ ᤁᤧᤘᤠ᤹ᤖᤥ— ᤂᤧᤏᤧ᤹ ᤏ᤺ᤶᤏ᤺ᤶᤒᤠ ᤆᤥ᤺ᤰᤛᤡᤱᤅᤧ᤹ᤀᤠᤱ ᤂᤡᤔᤥ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤁᤧᤜᤡᤶᤒᤣᤛᤠᤱᤒᤧᤴ ᤀᤡᤃᤣ᤺ᤰᤁᤠᤱ ᤐᤣᤗᤡ ᤑᤠᤰᤋᤧ᤹ᤀᤥ᥄ 4 ᤁᤧᤔᤡᤰᤁᤧᤴ ᤀᤡᤶᤔᤠ ᤔᤧᤒᤠᤱᤄᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤛᤵᤑᤠᤎᤡᤰᤁᤠᤱ ᤀᤡᤶᤗ᤹ᤖ ᤔᤧᤕᤠ᤺ᤴᤍᤧᤴᤏᤧ᤹ᤀᤥ॥ 5 ᤛᤠᤘᤠᤃᤧᤶᤒᤧᤸᤗᤧ ᤁᤢᤜᤢᤰᤁᤥᤗᤠᤶ ᤐᤧ᤺ᤱᤘᤠᤴ ᤂᤧᤳᤇᤡᤱᤒᤠ ᤁᤢᤀᤡᤛᤡᤰ. ᤐᤢ ᤁᤧᤛᤧᤵᤐᤧᤸᤗᤧ ᤁᤢᤀᤡᤀᤥᤗᤠᤶ ᤐᤢ᤺ᤴ ᤗᤧᤵᤐᤣ᤺ᤰᤐᤠ ᤜᤧᤰᤁᤣ ᤂᤧᤏᤧ᤹ ᤀᤠᤵᤑᤣᤰ ᤑᤡ᤺ᤴᤇᤡᤱᤅᤧ᤹ᤀᤥ॥ 6 ᤗᤧᤶᤛᤫᤠᤒᤣ. ᤛᤡᤰᤆᤥᤒᤠᤸᤗᤥ ᤐᤣᤃᤧ᤹ᤀᤠᤱ ᤂᤧᤸᤗᤧ ᤁᤢᤕᤧᤵᤗᤧᤰ ᤁᤢᤕᤠ᤺ᤶᤒᤰᤁᤡᤴ ᤀᤥᤔᤧᤳᤋᤧ᤹ᤀᤥ ᤂᤧᤶᤒᤩᤠᤱ ᤂᤧᤏᤧ᤹ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧ᤹ᤀᤥ॥ 7 ᤂᤧᤴ ᤛᤡᤰᤆᤣ᤺ᤶᤒᤧᤸᤗᤧ ᤁᤢᤗᤠᤶᤗᤥᤒᤠ ᤜᤥᤵᤗᤥ. ᤁᤢᤛᤢᤜᤠᤱᤕᤢᤰᤐᤠ ᤀᤡᤃᤪ ᤁᤢᤕᤢᤰᤛᤠᤒᤠ ᤜᤥᤵᤗᤥ. 8 ᤜᤧᤰᤁᤣᤛᤠᤱ ᤜᤠᤱᤘᤠᤔᤠ ᤕᤧᤶᤔᤥ ᤂᤧᤸᤗᤧ ᤁᤢᤈᤠ ᤕᤢᤱᤔᤠ ᤌᤠ᤺ᤱ ᤕᤠᤖᤡᤵ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤢᤈᤠ ᤛᤢᤶᤔᤠ ᤕᤧᤶᤔᤥ ᤁᤢᤈᤠ ᤕᤠᤱᤄᤥᤳᤋᤢᤖᤥ॥ 9 ᤗᤧᤶᤛᤫᤠᤒᤣ. ᤂᤧᤏᤧ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤁᤧᤀᤡᤶᤔᤠᤱ ᤁᤧᤏᤧᤒᤣ᥅ ᤂᤧᤏᤧ᤹ ᤀᤠᤵᤑᤠᤸᤗᤧ ᤁᤧᤔᤡᤰᤕᤢᤔᤥᤗᤠᤶ ᤁᤧᤛᤥᤒᤣ᥅ 10 ᤛᤵᤑᤠᤎᤡᤰ ᤀᤡᤶᤔᤠ ᤏᤢ ᤛᤵᤑᤠᤎᤡᤰ ᤀᤡᤶᤎᤰᤘᤠ ᤋᤣᤔᤠᤖᤧ. ᤜᤢᤰᤁᤡᤴ ᤀᤡᤓᤢᤵᤔᤠᤀᤠᤱ ᤛᤵᤔᤠᤎᤡᤰ ᤏᤠ᤺ᤶᤛᤡᤱᤔᤠᤖᤧ 11 ᤕᤠᤱᤛᤠ᤹ᤔᤠ ᤛᤡᤔᤧᤴ ᤂᤧᤏᤧ᤹ᤀᤥ ᤑᤠ᤺ᤴᤍᤠ ᤁᤢᤀᤡᤛᤡᤰ ᤏᤢ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤧᤴ ᤋᤠᤓᤣ ᤁᤧᤜᤣᤒᤠ ᤔᤏᤠ ᤁᤢᤀᤡᤛᤡᤰ ᤋᤠᤖᤥ॥ 12 ᤂᤠᤷᤔᤧᤴᤍᤰ ᤁᤧᤈᤥ᤺ᤰᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤱᤃ ᤀᤠᤶᤓᤠ ᤁᤴᤗᤥ ᤂᤧᤸᤗᤧ ᤑᤧᤳᤗᤠ᤹ᤔᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤀᤠᤱ ᤘᤠ᤹ᤃᤴᤗᤥ. 13 ᤂᤧᤸᤗᤧ ᤁᤢᤔᤡᤰᤁᤡᤴ ᤆᤡᤄᤡᤶ ᤆᤡᤄᤡᤶ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤁᤢᤗᤠᤱ ᤏᤢ ᤁᤢᤜᤢᤰᤆᤥ᤺ᤸᤗᤧ ᤔᤡᤰᤛᤣᤴ ᤆᤥᤃᤢᤖᤥ॥ 14 ᤂᤢᤏᤧ᤹ ᤀᤡᤱᤗᤧᤰᤁᤣ ᤁᤢᤏᤡᤱᤘᤠ᤹ᤀᤥ ᤋᤠᤵᤑᤧ᤺ᤶᤒᤠ ᤐᤠᤴ ᤀᤡ᤺ᤳᤋᤢᤖᤥ. ᤂᤧᤒᤩᤠᤱ ᤀᤠᤓᤧᤸᤗᤧᤛᤠᤱ ᤕᤧᤔᤧᤴᤍᤱ ᤐᤠᤴ ᤑᤥ᤺ᤰᤂᤢᤖᤥ॥ 15 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤶᤎᤠᤱ ᤆᤄᤵ ᤕᤧᤳᤋᤢᤰᤂᤣ ᤋᤠᤖᤥ. ᤜᤡᤱᤔᤠ ᤗᤠᤶ ᤔᤣ᤺ᤴᤏᤣ ᤂᤧᤴ ᤌᤡᤰᤗᤧᤱᤗᤧ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥ 16 ᤋᤢᤰᤛᤡ ᤐᤠ᤺ᤴᤜᤠ᤹ ᤘᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤗᤧ᤺ᤱᤗᤥ ᤏᤢᤛᤡᤃᤣᤰᤐᤠ ᤐᤠ᤺ᤴᤏᤡᤱᤃ ᤂᤢᤏᤧ᤹ ᤁᤢᤏᤡᤔᤥ ᤛᤡᤰᤁᤧᤗᤧ᤺ᤱᤒᤠ ᤆᤥᤰᤗᤥ— 17 ᤀᤠᤱᤍᤡᤱ ᤁᤧᤗ᤹ᤒᤠ ᤔᤡᤰᤜᤠ᤹. ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤗᤧᤛᤥ᤺ᤳᤜᤠ᤹. ᤁᤢᤍᤥ᤺ᤵᤔᤠ ᤔᤏᤠ᤺ᤸᤗᤧ ᤁᤢᤔᤠᤰᤂᤡ᤹ ᤁᤧᤛᤧᤒᤠ ᤜᤢᤰᤜᤠ᤹. 18 ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤁᤧᤀᤡ᤺ᤵᤐᤠ ᤏᤡᤱᤘᤠᤴ. ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤎᤠᤛᤡᤱᤒᤠ ᤗᤠᤱᤃᤠᤱ. 19 ᤔᤧᤴᤘᤠ᤹ᤔᤏᤠ ᤐᤠᤴ ᤁᤧᤛ᤺ᤶᤒᤠ ᤀᤡᤱᤗᤧᤰᤐᤠ ᤛᤠ᤺ᤰᤂᤡ ᤏᤢ ᤑᤢ᤹ᤏᤢᤛᤠ᤹ ᤗᤢᤶᤔᤥ ᤂᤧᤔᤠ᤹ ᤁᤧᤓᤥᤱᤒᤠ ᤔᤏᤠᤴ॥ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ 20 ᤀᤠᤛ᤻ᤛᤠᤀᤣ. ᤁᤧᤶᤒᤠᤖᤧ ᤁᤢᤀᤡᤱᤈᤠᤱᤜᤠ᤹ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤁᤧᤶᤔᤠᤖᤧ ᤁᤢᤄᤠᤜᤢ᤺ᤴᤏᤡᤴ ᤔᤧᤏᤠ᤹ᤖᤧᤴᤏᤧ᤹ᤀᤥ॥ 21 ᤂᤧᤱᤜᤠ᤹ ᤁᤧᤛᤡᤰᤗᤢᤱᤔᤥ ᤀᤠᤓᤧᤸᤗᤧᤛᤠᤱ ᤁᤳᤋᤧ᤹ᤀᤥ. ᤂᤧᤴ ᤐᤠ᤺ᤴᤜᤠ᤹ ᤁᤧᤛᤡᤳᤗᤠᤀᤥ ᤂᤣ᤺ᤰᤂᤧ ᤁᤳᤋᤧ᤹ᤀᤥ॥ 22 ᤂᤧᤏᤧ᤹ ᤗᤠᤱᤃᤧᤄᤣ᤺ᤰᤁᤡᤸᤗᤧ ᤂᤧᤸᤗᤧ ᤗᤠᤶᤃᤧᤗᤥᤖᤥ. ᤂᤧᤏᤧ᤹ ᤁᤧᤀᤡᤶᤔᤧᤸᤗᤧ ᤂᤧᤸᤗᤧ ᤋᤠᤱᤃᤧᤛᤧ᤺ᤵᤗᤥ. ᤕᤠᤰᤌᤢᤱᤎᤥ ᤁᤧᤘᤠ᤹ᤀᤡᤸᤗᤧ ᤂᤧᤴ ᤂᤧᤏᤧ᤹ᤏᤢ ᤋᤠ᤹ᤈᤧᤱᤗᤥ॥ 23 ᤌᤣᤀᤠᤱᤓᤧᤸᤗᤧ ᤂᤧᤴ ᤀᤡᤱᤈᤠᤱᤜᤠ᤹ ᤛᤣᤔᤡᤖᤥ. ᤜᤧᤰᤁᤩᤠᤱ ᤂᤠᤜᤢᤴᤏᤡᤴ ᤛᤧᤍᤡᤱᤍᤡᤱ ᤁᤧᤀᤥ᤺ᤵᤐᤠ ᤀᤥ᤺ᤳᤋᤡᤖᤥ. ᤂᤶᤓᤩᤠᤱ ᤜᤧᤴᤌᤡᤶᤗᤧ ᤗᤠᤃᤡ ᤑᤧ᤺ᤰᤛᤡᤱᤔᤠᤴ ᤜᤡᤱᤔᤠ ᤗᤠᤶᤗᤥ. 24 ᤂᤧᤸᤗᤧ ᤂᤧᤏᤧ᤹ ᤕᤧᤶᤒᤠ ᤁᤧᤃᤥ᤺ᤵᤔᤠ ᤔᤧᤴᤇᤢᤔᤠ ᤏᤢ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤖᤧᤴ ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤂᤧᤸᤗᤧ ᤔᤠ᤺ᤱᤄᤠ ᤁᤧᤃᤳᤗᤥ॥ 25 ᤂᤧᤴ ᤏᤢᤔᤠᤛᤢᤰᤔᤠ ᤆᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤂᤧᤴ ᤔᤡᤰ ᤔᤧᤃᤣ᤺ᤳᤋᤧᤴᤏᤧ᤹ᤀᤥ. ᤀᤡᤃᤪ ᤂᤧᤸᤗᤧ ᤁᤢᤔᤡᤰᤁᤡᤸᤗᤧ ᤀᤡᤱᤗᤧᤰᤁᤥ ᤁᤧᤴᤎᤠᤏᤧᤸᤗᤖᤥ॥ 26 ᤌᤣᤀᤠᤱᤓᤧᤸᤗᤧ ᤔᤏᤠ᤺ᤸᤗᤧ ᤁᤢᤄᤧ᤺ᤰ ᤌᤡᤰ ᤂᤖᤧ᤺ᤱᤅᤥ ᤁᤧᤳᤏᤡᤔᤠ ᤔᤧᤴᤇᤢᤔᤠᤴ ᤋᤠ᤺ᤵᤔᤠ ᤛᤢᤰᤋᤢᤖᤥ. ᤁᤖ ᤕᤧᤶᤒᤠ ᤜᤱᤈᤣᤏᤠ ᤔᤧᤴᤇᤢᤔᤠ᤺ᤸᤗᤧᤃ ᤁᤧᤜᤡᤱᤔᤴᤏᤧᤴ ᤔᤧᤰᤂᤢᤖᤥ॥ 27 ᤌᤣ ᤁᤢᤓᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤍᤣ᤺ᤳᤋᤧᤴ ᤔᤡᤔᤧᤴᤍᤡᤰᤁᤣ ᤂᤢᤏᤧ᤹ ᤁᤢᤓᤰᤋᤢᤱᤔᤥ ᤔᤡᤴ ᤏᤧᤔᤠ ᤛᤢᤰᤋᤢᤒᤡ᥅ 28 ᤔᤡᤄᤠᤱᤃᤪᤥ᤺ᤰᤁᤥ ᤁᤢᤓᤠ ᤔᤏᤠᤴ ᤗᤠᤱᤄᤣ᤺ᤰᤁᤡᤸᤗᤧ ᤌᤣ ᤂᤢᤏᤧ᤹ ᤁᤢᤗᤠᤱᤅᤡᤴ ᤔᤡᤔᤧᤍᤡᤰᤏᤧᤶᤒᤡ᥅ 29 ᤕᤠᤵᤔᤡ᤺ᤸᤗᤧ ᤁᤢᤔᤣ᤺ᤳᤋᤧᤴᤏᤢ ᤁᤧᤀᤡᤶᤒᤧᤴ ᤜᤧᤰᤋᤱᤒᤠᤀᤣ ᤐᤥᤱᤗᤥ. ᤂᤧᤴ ᤔᤧᤴᤇᤢᤔᤠᤴ ᤁᤧᤛᤢᤒᤠ ᤀᤠᤳᤋᤡᤴ ᤕᤧᤶᤒᤡᤳᤇᤠ᤺ᤴᤇᤠᤱ ᤂᤢᤶᤍᤡᤱ ᤔᤧᤱᤄᤥᤀᤣ ᤂᤧᤳᤇᤡᤱᤔᤠ ᤔᤧᤄᤥᤏᤧᤴᤗᤥ॥ 30 ᤛᤠ᤹ᤖᤡᤰ ᤁᤢᤛᤡᤰᤁᤧᤗᤠ᤺ᤰᤐᤠ ᤂᤢ᤺ᤴᤍᤪᤡᤰᤐᤠ ᤔᤏᤠ᤺ᤸᤗᤧ ᤁᤢᤛᤡᤰᤗᤠ᤺ᤰᤔᤠ ᤛᤡᤶᤔᤠᤖᤧ ᤗᤠᤃᤡ ᤂᤢ᤺ᤳᤏᤧᤓᤃᤪ ᤔᤏᤠᤜᤠ᤹ᤖᤧ ᤂᤧᤴ ᤔᤧᤴᤈᤡ᤺ᤳᤋᤢᤴᤗᤥ॥ 31 ᤁᤖᤛᤠᤱ ᤂᤧᤴ ᤔᤧᤍᤧᤶᤛᤢᤏᤧᤓᤃᤪ ᤂᤧᤸᤗᤧ ᤏᤢᤛᤡᤗᤧᤱ ᤕᤠᤖᤡᤰ ᤕᤖᤡᤰ ᤜᤢᤱᤔᤠᤀᤣ ᤐᤥᤱᤗᤥ. ᤐᤥᤱᤔᤠ ᤛᤢᤰ ᤂᤧᤸᤗᤧ ᤁᤢᤜᤡᤶᤔᤥᤒᤠ ᤁᤧᤖᤧᤰ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ᤖᤧᤀᤠᤱ ᤜᤢᤱᤔᤠ ᤐᤥᤱᤗᤥ॥ 32 ᤁᤖ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤴ ᤁᤢᤏᤧᤜᤡ ᤁᤧᤜᤥᤵᤐᤠ ᤆᤥᤰᤗᤥ. ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤛᤶᤎᤠᤱ ᤑᤧᤳᤗᤠ᤹ᤔᤧᤴ ᤋᤠᤖᤢᤖᤥ॥ 33 ᤂᤧᤴ ᤋᤧ᤺ᤶᤓᤢᤰ ᤋᤢᤶᤔᤠᤱ ᤁᤢᤈᤠ᤺ᤳᤌᤡ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤔᤧᤵᤔᤧᤴ ᤀᤠᤓᤧᤸᤗᤧᤀᤠᤱ ᤔᤧᤔᤠᤏᤧᤸᤗᤥ॥ 34 ᤌᤣᤀᤠᤱᤓᤧᤸᤗᤧ ᤏᤠᤜᤧᤶᤔᤧᤸᤗᤧ ᤕᤧᤶᤒᤠ᤺ᤸᤗᤧ ᤁᤢᤛᤡᤰ ᤐᤥ᤺ᤰᤗᤥ. ᤜᤧᤰᤁᤩᤠᤱ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤁᤢᤗᤧᤰᤘᤠ ᤏᤢ᤺ᤰᤋᤢᤖᤥ॥ 35 ᤂᤧᤸᤗᤧ ᤁᤢᤗᤧᤰᤘᤠ ᤛᤠᤶᤒᤠᤴ ᤌᤣᤀᤠᤱ ᤔᤧᤍᤠ᤺ᤰᤋᤢᤴᤗᤥ. ᤀᤠᤰᤂᤩᤠᤖᤡᤰ ᤕᤸᤗᤡᤰ ᤛᤢᤖᤢᤳ ᤕᤠᤱᤗᤧᤀᤠᤱ ᤂᤧᤴ ᤗᤧᤶᤔᤠ ᤛᤢ᤺ᤶᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.