ᤂᤠᤜᤢᤴ 4 - LIFOTNTᤛᤡᤰᤁᤢᤶ ᤏᤡᤱᤘᤠ᤹ᤗᤠᤶ ᤂᤥᤃᤧᤍᤧᤵᤐᤠ ᤀᤡᤴᤎᤠ 1 ᤀᤠᤛ᤻ᤛᤠᤛᤣ. ᤀᤠᤒᤠᤅᤣ ᤐᤠ᤺ᤸᤗᤧ ᤁᤢᤄᤠᤜᤢ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ ᤂᤧᤵᤔᤥ ᤂᤡᤏᤡ᤹ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ. ᤂᤧᤒᤩᤠᤱ ᤂᤠᤛᤡᤱᤏᤡ᤺ᤵᤔᤠᤴ ᤂᤡᤏᤡ᤹ ᤁᤧᤄᤥᤛᤢᤶᤗᤥ॥ 2 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤐᤏᤢᤏᤢᤒᤠ ᤏᤡᤛᤠᤶ ᤜᤢ᤹ᤏᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤗᤧᤖᤧᤶᤔᤡᤴᤏᤧ᤹ᤀᤥ॥ 3 ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤆᤢᤰᤛᤠ ᤘᤕᤠᤱᤅᤡᤸᤗᤧ. ᤂᤠ ᤛᤣ᤺ᤵᤑᤠ ᤁᤧᤘᤠ᤹ᤒᤠ ᤏᤢ ᤀᤠᤶᤔᤠᤖᤧ ᤗᤳᤌᤡᤰᤐᤠ ᤁᤢᤛ᤻ᤛᤠ ᤘᤕᤠᤱᤅᤡᤸᤗᤧ. 4 ᤀᤠᤱᤃᤠ᤹ ᤀᤠᤶᤒᤠᤖᤧ ᤏᤡᤛᤠᤶ ᤜᤢ᤹ᤖᤠᤱᤅᤠᤱ ᤔᤧᤳᤋᤠᤱᤗᤥ. “ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤖᤧᤰ ᤁᤧᤏᤡᤱᤘᤠ᤹ᤖᤧ ᤀᤡ᤺ᤳᤋᤧ ᤁᤳᤋᤧ᤹ᤀᤥ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤠ᤺ᤳᤋᤧ ᤋᤡᤶᤍᤧ᤹ᤀᤥ ᤂᤧᤒᤩᤠᤱ ᤂᤧᤏᤧ᤹ ᤁᤧᤜᤡᤱᤗᤥ॥ 5 ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤛᤧ᤹ ᤜᤧᤰᤁᤩᤠᤱ ᤂᤠᤛᤡᤱᤏᤡ᤺ᤵᤔᤠᤴ ᤂᤥᤛᤧ᤹ᤀᤥ. ᤀᤠᤱᤃᤠ᤹ ᤔᤧᤳᤏᤧᤒᤠ ᤀᤠᤒᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤴᤏᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶᤒᤠ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ॥ 6 ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤔᤧᤗᤧᤖᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤏᤧ᤹ ᤋᤠᤱᤃᤧᤛᤧ᤺ᤵᤗᤥ. ᤂᤧᤴ ᤂᤧᤏᤧ᤹ ᤔᤡ᤺ᤶ ᤔᤧᤳᤋᤧ᤹ᤀᤥ. ᤂᤧᤸᤗᤧ ᤂᤧᤏᤧ᤹ ᤏᤢᤖᤡᤰᤁᤠᤱ ᤁᤧᤃᤳᤗᤥ॥ 7 ᤛᤡᤰᤁᤢᤶᤏᤡᤱᤘᤠᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤐᤠ᤺ᤴᤗᤥ. ᤂᤧᤸᤗᤧᤆᤥᤃᤢᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤛᤧ᤹ᤀᤥ॥ ᤂᤧᤏᤧ᤹ ᤁᤧᤃᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤠᤔᤠ ᤐᤥᤱᤛᤠᤱ. ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠᤴ ᤂᤧᤏᤧ᤹ ᤂᤥᤛᤧ᤹ᤀᤥ॥ 8 ᤂᤧᤏᤧ᤹ ᤂᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧ᤹ᤀᤥ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤏᤧ᤹ ᤌᤠ᤺ᤱ ᤁᤧᤓᤥ᤺ᤱᤗᤥ॥ ᤂᤧᤏᤧ᤹ ᤂᤧᤴ ᤜᤧᤵᤋᤧ᤹ᤀᤠᤱ ᤁᤳᤋᤧ᤹ᤀᤥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤖᤥ॥ 9 ᤂᤧᤸᤗᤧ ᤂᤧᤏᤧ᤹ ᤗᤢᤱᤃᤢᤶᤗᤧ ᤁᤢᤎᤡᤶᤒᤠ ᤁᤠᤴᤎᤡ᤺ᤴ ᤁᤧᤘᤠ᤺ᤳᤗᤥ ᤜᤧᤰᤁᤩᤠᤱ ᤔᤡᤔᤡᤍᤡᤱᤃᤧᤴ ᤋᤡᤆ᤺ᤴ ᤁᤧᤎᤧᤃᤣ᤺ᤰᤐᤥ ᤁᤧᤄᤢ᤺ᤰᤗᤥ॥” 10 ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ. ᤀᤠᤱᤃᤠ᤹ ᤔᤧᤳᤏᤧᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ. ᤂᤧᤒᤩᤠᤱ ᤂᤧᤏᤧ᤹ ᤁᤢᤎᤠ᤺ᤰ ᤁᤧᤈᤠ᤹ᤒᤠ ᤁᤧᤒᤥᤱᤗᤥ॥ 11 ᤀᤠᤱᤃᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤒᤠ ᤗᤠᤶᤔᤡᤴ ᤏᤠ᤺ᤵᤔᤠ ᤜᤢ᤹ᤏᤧᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤗᤠᤶᤔᤥ ᤗᤠᤱᤄᤣ᤺ᤱᤏᤧᤖᤥ॥ 12 ᤂᤧᤏᤧ᤹ ᤗᤠᤱᤃᤧᤄᤣ᤺ᤰᤁᤡᤸᤗᤧ ᤁᤧᤗᤠᤱ ᤋᤠᤵᤐᤣ᤹ᤜᤠ᤹ ᤔᤧᤜᤠᤵᤋᤢᤴᤗᤥ. ᤂᤧᤏᤧ᤹ ᤁᤧᤗᤥ᤺ᤰᤁᤡᤸᤗᤧ ᤁᤧᤴᤈᤥ᤺ᤴᤏᤧᤸᤗᤥ॥ 13 ᤂᤧᤏᤧ᤹ ᤂᤠᤜᤢᤴᤏᤡᤴ ᤋᤧᤶᤛᤧ ᤁᤳᤋᤧ᤹ᤀᤥ. ᤂᤧᤴ ᤐᤡᤶᤔᤠ ᤐᤣ᤺ᤰᤔᤠ ᤔᤧᤒᤠᤱᤄᤧᤴᤏᤧ᤹ᤀᤥ. ᤂᤧᤏᤧ᤹ ᤂᤧᤴ ᤏᤢᤖᤡᤰ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤧᤏᤧ᤹ ᤁᤧᤜᤡᤱᤔᤴᤗᤥ॥ 14 ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤁᤢᤗᤠᤶᤔᤥ ᤗᤠᤱᤔᤧᤎᤠᤛᤧᤴᤏᤧ᤹ᤀᤥ. ᤀᤡᤃᤪ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤁᤢᤕᤧᤵᤗᤧᤰᤁᤥ ᤗᤠᤱᤔᤧᤄᤣᤃᤧᤴᤏᤧ᤹ᤀᤥ॥ 15 ᤂᤧᤏᤧ᤹ ᤂᤧᤴ ᤗᤧᤖᤧᤍᤣᤛᤧ᤹. ᤂᤧᤸᤗᤧ ᤁᤢᤛᤶᤎᤠᤱ ᤗᤠᤱᤔᤧᤎᤠᤛᤧᤴᤏᤧ᤹ᤀᤥ. ᤂᤧᤴᤗᤠᤶᤒᤠ ᤆᤳᤇᤡᤱᤅᤧ᤹ᤀᤠᤱ ᤀᤠᤒᤠᤅᤣ ᤁᤧᤗᤠᤶᤔᤥ ᤗᤠᤱᤄᤣᤃᤧ᤹ᤀᤥ॥ 16 ᤌᤣᤀᤠᤱᤓᤧᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤌᤧᤶᤒᤠ ᤂᤢᤴᤇᤡ᤹ ᤀᤡᤶᤔᤠ ᤔᤧᤴᤇᤢᤰᤏᤧᤴᤗᤥ॥ ᤁᤢᤓᤠ ᤔᤏᤠᤜᤠ᤹ ᤋᤢᤰᤂᤣᤀᤥ ᤔᤧᤴᤎᤠᤛᤡᤱᤅᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤣ ᤔᤧᤕᤢᤏᤧᤴᤗᤥ॥ 17 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤠᤔᤠ ᤁᤢᤈᤠᤖᤥ ᤜᤧᤰᤁᤩᤠᤱ ᤂᤠᤷᤔᤧᤴᤍᤰ ᤆᤥ᤺ᤰᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤢᤱᤔᤠ ᤆᤧᤸᤗᤧᤰᤛᤣ ᤌᤡᤖᤥ॥ 18 ᤛᤠᤶᤕᤥᤒᤠᤸᤗᤧ ᤁᤢᤕᤧᤵᤗᤧᤰᤁᤡᤴ ᤋᤠᤏᤠᤶ ᤁᤧᤃᤧᤵᤐᤠ ᤏᤠᤶ ᤜᤧᤰᤋᤱᤒᤠᤖᤥ. ᤂᤧᤴ ᤗᤧᤴᤈᤥ ᤔᤧᤶᤒᤥᤱᤅᤣ ᤌᤠᤖᤡᤰ ᤀᤠᤸᤗᤛᤠᤱ ᤛᤠ᤹ᤖᤡᤰ ᤀᤥ᤺ᤳᤗ ᤐᤣ᤺ᤰᤗᤥ॥ 19 ᤁᤖ ᤋᤠᤰᤁᤧᤓᤧ᤹ᤒᤠᤸᤗᤧ ᤁᤢᤕᤧᤵᤗᤧᤰᤁᤡᤴ ᤂᤠᤃᤧᤔᤠᤰᤐᤠ ᤁᤢᤀᤡᤛᤡ᤺ᤰᤗᤥ. ᤌᤣ᤺ᤸᤗᤧ ᤂᤧᤱᤜᤠ᤹ ᤛᤥ᤺ᤴᤍᤢᤛᤡᤖ ᤐᤳ ᤂᤢᤴᤇᤡ᤹ ᤂᤧᤴ ᤔᤧᤴᤏᤡᤛᤢᤴᤗᤥ॥ 20 ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ. ᤀᤠᤱᤃᤠ᤹ ᤀᤠᤒᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤂᤧᤵᤛᤧ᤹ᤀᤥ॥ 21 ᤁᤧᤔᤡᤰᤛᤠᤀᤥᤗᤠᤶ ᤂᤧᤱᤜᤠ᤹ ᤐᤡᤶᤔᤠ ᤐᤣ᤺ᤰᤔᤠ ᤔᤧᤒᤠᤱᤄᤧᤴᤏᤧ᤹ᤀᤥ. ᤂᤧᤱᤜᤠ᤹ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤁᤳᤋᤧ ᤕᤢᤰᤂᤧ᤹ᤀᤥ॥ 22 ᤌᤣᤀᤠᤱᤓᤧᤸᤗᤧ ᤀᤠᤒᤠᤴ ᤁᤧᤄᤧᤶᤒᤧᤸᤗᤧ ᤁᤢᤗᤠᤃᤡ ᤂᤧᤴ ᤜᤡᤱᤔᤠᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤎᤰᤁᤡᤸᤗᤧ ᤗᤠᤃᤡ ᤁᤢᤕᤠᤶ ᤛᤣᤛᤣ ᤗ᤹ᤔᤠᤖᤥ॥ 23 ᤁᤠᤰ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤕᤖᤡᤰ. ᤁᤧᤛᤡᤰᤗᤢᤱᤔᤧᤴ ᤛᤧ᤺ᤵᤋᤧ ᤁᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤧᤖᤧᤰ ᤜᤡᤱᤔᤴᤗᤧ ᤁᤢᤒᤢᤴᤗᤥ॥ 24 ᤋᤠᤵᤑᤧ᤺ᤶᤒᤠ ᤐᤠ᤺ᤴᤛᤢᤳᤗᤠᤴ ᤁᤧᤶᤒᤪᤠᤀᤥᤗᤠᤶ ᤔᤠ᤺ᤱᤄᤠ ᤘᤠ᤹ᤖᤖᤥ. ᤑᤧᤰᤁᤧᤗᤠ᤹ᤒᤠ ᤋᤠ᤹ᤈᤧᤱᤜᤠ᤹ ᤁᤧᤶᤒᤪᤠᤛᤣ᤹ᤀᤥᤗᤠᤶ ᤗᤠ᤺ᤳᤗᤠ᤺ᤳ ᤘᤠ᤹ᤖᤖᤥ॥ 25 ᤂᤧᤏᤧ᤹ ᤁᤧᤔᤡᤰᤁᤧᤸᤗᤧ ᤁᤧᤍᤃᤡ ᤁᤢᤍᤥ᤺ᤵᤔᤠ ᤀᤥᤔᤧᤳᤋᤢᤖᤖᤥ. ᤁᤧᤍᤃᤠᤱ ᤗᤧᤵᤔᤠᤱ ᤁᤢᤍᤥ᤺ᤵᤔᤠ ᤀᤍᤰᤋᤰ ᤀᤥᤔᤧᤳᤋᤢᤖᤖᤥ॥ 26 ᤗᤠᤱᤃᤠᤱ ᤆᤵᤔᤠᤖᤧ ᤗᤠᤃᤡ ᤏᤢᤒᤠ ᤕᤧᤵᤗᤧᤰᤐᤠ ᤗᤠᤶᤔᤡᤴ ᤕᤠᤖᤡᤵ ᤆᤥᤃᤧ᤹ᤀᤥ. ᤜᤧᤰᤁᤩᤠᤱ ᤏᤡ᤺ᤴᤎᤥ ᤁᤧᤒᤥᤱᤒᤠ ᤔᤠᤖᤠᤶᤜᤠ᤹ᤖᤰ ᤛᤣᤃᤧ᤹ᤀᤥ॥ 27 ᤆᤢᤵᤛᤠᤱ ᤑᤧᤴᤇᤠᤱ ᤗᤧᤵᤔᤠᤱ ᤔᤧᤜᤡᤛᤡᤱᤅᤡᤴᤏᤧ᤹ᤀᤥ. ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤗᤠᤶ ᤁᤧᤗᤠᤱᤜᤠ᤹ ᤗᤠ᤺ᤳᤗᤠ᤺ᤳ ᤁᤳᤋᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.