ᤂᤠᤜᤢᤴ 3 - LIFOTNTᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤖᤧ ᤗᤠᤃᤡ ᤂᤠᤜᤢᤴ 1 ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤐᤡᤏᤧᤒᤠ ᤏᤡᤛᤠᤶᤔᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤴᤏᤧ᤹ᤀᤥ. ᤁᤖ ᤀᤠᤱᤃᤠ᤹ ᤔᤧᤳᤏᤧᤒᤠ ᤀᤡᤱᤈᤠᤱᤜᤠ᤹ ᤁᤧᤏᤡᤱᤘᤠ᤹ᤀᤥ ᤁᤳᤋᤧ᤹ᤀᤥ. 2 ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤧᤏᤧ᤹ ᤁᤢᤎᤠ᤺ᤰ ᤁᤧᤈᤠ᤹ᤒᤠ ᤁᤧᤈᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤃᤡ ᤂᤧᤸᤗᤧ ᤏᤢ᤹ᤔᤠᤍᤠᤔᤠ ᤋᤠᤖᤢᤖᤥ॥ 3 ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤏᤢ ᤏᤛᤠ᤺ᤴᤛᤠᤒᤠ ᤐᤥᤱᤔᤧᤸᤗᤧ ᤀᤠᤓᤧᤸᤗᤧᤀᤠᤱ ᤁᤧᤸᤗᤧᤳᤏᤧᤴᤗᤖᤥ. ᤂᤧᤱᤜᤠ᤹ ᤂᤧᤏᤧ᤹ ᤁᤧᤏᤡ᤺ᤱᤔᤥ ᤂᤣ᤺ᤰᤂᤧ ᤑᤳᤇᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤛᤠᤵᤋᤧ ᤑᤳᤇᤧ᤹ᤀᤥ॥ 4 ᤂᤧᤒᤩᤠᤱ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤴᤇᤠᤶ ᤕᤠᤵᤔᤡ ᤏᤡᤔᤥ ᤗᤢᤱᤃᤢᤶ ᤏᤢ ᤏᤢᤒᤠ ᤔᤡᤱ ᤁᤧᤄᤥᤛᤢᤖᤥ॥ 5 ᤂᤧᤏᤧ᤹ ᤁᤧᤖᤧᤰ ᤁᤧᤛᤡᤰᤗᤢᤱᤔᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤏᤠᤛᤠ᤹ᤖᤧ᤹ᤀᤥ. ᤜᤧᤰᤁᤩᤠᤱ ᤀᤠᤵᤑᤣᤰ ᤁᤧᤄᤠᤛᤡᤱᤏᤡ᤺ᤵᤔᤥ ᤁᤧᤏᤡᤱᤘᤠ᤹ ᤔᤧᤕᤢᤰᤂᤧᤴᤏᤧ᤹ᤀᤥ 6 ᤂᤧᤏᤧ᤹ ᤁᤧᤏᤠ᤺ᤳᤋᤢᤒᤠ ᤁᤧᤖᤧᤰ ᤁᤧᤗᤠᤶᤔᤥ ᤕᤜᤘᤣ ᤍᤠᤱᤒᤧᤴ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤗᤠᤶᤜᤠ᤹ ᤁᤢᤍᤥ᤺ᤵᤔᤠ ᤆᤥᤃᤢ ᤁᤧᤒᤡᤖᤥ॥ 7 ᤂᤧᤏᤧ᤹ ᤀᤠᤵᤑᤣᤰ ᤁᤧᤏᤡᤔᤥ ᤛᤡᤰᤁᤢᤶᤛᤠᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ. ᤕᤜᤘᤣ ᤍᤠᤱᤒᤧᤴᤏᤢ ᤁᤡᤛᤧ᤹ᤀᤠᤱ ᤑᤧᤴᤕᤠ᤺ᤶᤒᤰᤁᤡᤴ ᤗᤧᤖᤧ᤹ᤀᤥ॥ 8 ᤁᤸᤗᤧ ᤂᤧᤏᤧ᤹ ᤁᤧᤎᤰᤁᤡᤴ ᤆᤠᤱᤈᤠᤱᤒᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤢᤱᤛᤡᤜᤠ᤹ ᤁᤧᤎᤢᤶᤒᤠ ᤆᤥᤃᤢᤖᤥ॥ 9 ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣ ᤏᤢ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤧᤈᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥᤀᤡᤱᤎᤠ᤺ᤱ ᤐᤡᤖᤧ᤹ᤀᤥ. 10 ᤂᤧᤒᤩᤠᤱ ᤂᤧᤏᤧ᤹ ᤁᤧᤈᤠ ᤕᤠᤱᤔᤠ ᤌᤠ᤺ᤱᤜᤠ᤹ ᤘᤧᤳᤗ ᤌᤠᤖᤡᤰ ᤋᤡᤶᤗᤥ ᤜᤧᤰᤁᤩᤠᤱ ᤁᤧᤄᤵᤐᤩᤠᤜᤠ᤹ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤋᤡᤶᤔᤠᤱ ᤘᤧᤳᤗᤥ॥ 11 ᤀᤠᤛ᤻ᤛᤠᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤧᤴᤌᤡᤶᤔᤡᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤓᤧ᤺ᤰᤁᤡᤸᤗᤧ ᤋᤠᤵᤑᤧ᤺ᤶᤒᤠ ᤔᤧᤗᤣ᤺ᤳᤋᤧᤴᤏᤧ᤹ᤀᤥ॥ 12 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤳ ᤗᤢᤱᤔᤠ᤹ ᤋᤢᤰᤋᤢ᤹ ᤂᤢᤏᤧ᤹ ᤂᤧᤴᤏᤣ ᤜᤧᤴᤌᤡᤶ ᤕᤠᤰᤋᤢᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤐᤠᤏᤢᤍᤡᤱ ᤐᤠ᤺ᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤀᤠᤒᤠᤅᤣ ᤁᤢᤛ᤻ᤛᤠᤴ ᤜᤧᤴᤌᤡᤶ ᤐᤡᤖᤢᤖᤥ॥ 13 ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤁᤧᤄᤥᤒᤠ ᤔᤏᤠᤴ ᤏᤢ ᤂᤠᤛᤡᤱᤏᤡ᤺ᤵᤔᤠ ᤁᤧᤄᤥᤒᤠᤴ ᤔᤢ᤹ᤀᤡᤛᤠᤒᤠᤖᤥ. 14 ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤕᤢᤵᤐᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤡᤴᤎᤠ ᤀᤠᤒᤡᤒᤡᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤛᤠᤶᤔᤩᤠᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤢᤓᤠ᤹ ᤀᤠᤒᤡᤖᤥ॥ 15 ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤔᤢᤎᤡᤱ ᤗᤢᤱᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤒᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤏᤠᤱ ᤂᤧᤴᤏᤢ ᤋᤱᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ 16 ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤁᤢᤈᤢᤰᤘᤠ ᤜᤢᤰᤁᤥ ᤌᤠ᤺ᤰ ᤆᤠ᤹ᤔᤠᤴ ᤏᤢ ᤁᤢᤓᤧᤱᤘᤠ ᤜᤢᤰᤁᤥ ᤕᤠᤱᤛᤠᤁᤢᤴᤎᤣ ᤏᤢ ᤔᤡᤱᤛᤥ ᤀᤡᤱᤎᤠᤱ ᤐᤥᤱᤗᤥ॥ 17 ᤂᤧᤸᤗᤧ ᤁᤢᤔᤠᤖᤠᤶᤜᤠ᤹ ᤏᤡᤱᤘᤠ᤹ ᤁᤧᤍᤠᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤶᤜᤠ᤹ ᤆᤡᤈᤡ ᤕᤧᤶᤕᤧᤶᤒᤠ ᤐᤥᤱᤗᤥ॥ 18 ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤍᤡᤶᤒᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤗᤠᤃᤡ ᤂᤧᤱᤃ ᤗᤳᤇᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤗᤥ. ᤂᤧᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥ 19 ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶᤒᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤢᤰᤏᤠᤜᤠ᤹ ᤕᤢᤰᤂᤢᤖᤥ. ᤂᤠᤛᤡᤱᤏᤡ᤺ᤵᤐᤠ ᤔᤢᤰᤛᤠᤶᤔᤡᤸᤗᤧᤀᤣ ᤋᤖ᤺ᤰᤁᤧᤴ ᤋᤠᤱᤛᤠᤱᤒᤠᤴ ᤁᤢᤒᤵᤔᤠᤍᤧᤴᤏᤥ ᤑᤳᤇᤢᤖᤥ॥ 20 ᤂᤢᤏᤧ᤹ ᤁᤢᤏᤧᤜᤡ ᤁᤢᤏᤡᤱᤘᤠ᤺ᤸᤗᤧᤀᤣ ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤖ᤺ᤱᤜᤠ᤹ ᤑᤰᤋᤧ ᤗ᤺ᤴᤍᤧᤖᤥ. ᤜᤧᤰᤁᤩᤠᤱ ᤂᤠ᤹ᤔᤡ᤺ᤳᤋᤧᤸᤗᤧ ᤔᤢ ᤗᤧᤵᤔᤠᤱ ᤛᤣ᤺ᤰᤘᤠᤴ ᤌᤠᤛᤢᤖᤥ॥ 21 ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤛᤧᤰᤂᤠᤒᤠ ᤛᤡᤰᤁᤢᤶᤏᤡᤱᤘᤠᤴ ᤏᤢ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ᤀᤡᤴ ᤛᤧ᤺ᤵᤋᤧ ᤁᤳᤋᤧ᤹ᤀᤥ. ᤂᤧᤴ ᤂᤧᤏᤧ᤹ ᤁᤧᤔᤡᤰᤛᤠᤀᤥᤗᤠᤶ ᤐᤡᤶᤔᤠ ᤐᤣ᤺ᤰᤔᤠ ᤔᤧᤒᤠᤱᤄᤧᤴᤏᤧ᤹ᤀᤥ॥ 22 ᤂᤧᤴ ᤂᤧᤏᤧ᤹ ᤁᤧᤗᤠᤃᤡ ᤜᤡᤱᤔᤴ ᤁᤧᤒᤡᤒᤠ ᤏᤢ ᤂᤧᤏᤧ᤹ ᤁᤧᤛᤡᤳᤗᤠᤀᤥ ᤁᤧᤄᤧᤶᤛᤡᤱᤔᤠ ᤛᤠᤔᤠᤐᤢᤔᤠ ᤜᤧᤰᤋᤱᤒᤠ ᤐᤥᤱᤗᤥ॥ 23 ᤂᤧᤒᤩᤠᤱ ᤂᤧᤏᤧ᤹ ᤁᤧᤗᤠᤶᤔᤥ ᤁᤧᤏᤢ᤹ ᤁᤧᤍᤠᤀᤠᤱ ᤗᤠᤱᤃᤧᤄᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤱᤜᤠ᤹ ᤔᤧᤍᤥ᤺ᤰᤏᤧᤴᤗᤥ॥ 24 ᤂᤧᤏᤧ᤹ ᤁᤧᤈᤥ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤱᤃᤡᤏᤧᤴ ᤁᤧᤴᤕᤱᤏᤧᤴᤗᤥ. ᤂᤧᤏᤧ᤹ ᤁᤧᤏᤧᤛᤡᤱᤅᤡᤸᤗᤧ ᤁᤢᤈᤠᤏᤢ᤹ᤖ ᤁᤧᤔᤡᤰᤕᤢᤖᤥ॥ 25 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤡᤰᤗᤧᤱᤗᤧ ᤁᤧᤀᤡᤒᤠ ᤁᤧᤍᤠᤒᤠ ᤋᤢᤰᤂᤣ ᤗᤠᤰᤂᤣ ᤀᤡᤃᤪ ᤔᤧᤰᤔᤠ ᤛᤡᤔᤧᤴᤏᤢ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ॥ 26 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴᤏᤣ ᤂᤧᤏᤧ᤹ ᤁᤧᤀᤠ᤺ᤴᤇᤡᤱᤔᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤗᤠᤱᤜᤠ᤹ ᤀᤡᤈᤥᤀᤥ ᤌᤠᤔᤠᤗᤠᤶ ᤁᤧᤛᤧ᤺ᤵᤗᤥ॥ 27 ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ ᤑᤠ᤹ᤔᤠᤛᤡ ᤁᤧᤒᤥᤱᤒᤠ ᤘᤠ᤹. ᤂᤧᤏᤧ᤹ ᤁᤧᤜᤢᤰᤁᤥ ᤘᤠ᤹ᤖ ᤌᤠᤖᤡᤰ ᤂᤧᤴ ᤔᤧᤛᤠᤰᤋᤧᤴᤏᤧ᤹ᤀᤥ. 28 ᤂᤧᤏᤧ᤹ ᤀᤠᤸᤗᤥ ᤁᤧᤃᤳᤋᤢᤒᤠ ᤐᤠ᤺ᤴᤏᤡᤴ ᤐᤡᤔᤠᤖᤧ ᤗᤠᤃᤡ ᤁᤧᤜᤡᤶᤒᤣᤛᤠᤱᤒᤧᤴ “ᤀᤠᤰᤂᤥ. ᤋᤠ᤺ᤴᤍᤡ᤺ᤰ ᤋᤩᤧ᤹.” ᤔᤧᤔᤧᤳᤋᤧᤴᤏᤧ᤹ᤀᤥ॥ 29 ᤂᤧᤏᤧ᤹ ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤴᤈᤥ᤺ᤰᤁᤧ᤹ᤀᤥ. ᤂᤧᤸᤗᤧ ᤂᤧᤏᤧ᤹ ᤁᤧᤒᤣᤛᤠᤱ ᤏᤛᤠᤴ ᤁᤧᤈᤥ᤺ᤰᤁᤠᤱ ᤕᤢᤱᤗᤥ॥ 30 ᤜᤏᤧ ᤌᤣᤏᤠᤎᤣ ᤂᤧᤏᤧ᤹ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤐᤠ᤺ᤴᤔᤧᤎᤡᤰᤋᤧᤴᤏᤧ᤹ᤀᤥ. ᤂᤧᤸᤗᤧ ᤂᤧᤏᤧ᤹ ᤁᤧᤎᤣᤀᤠᤱ ᤋᤠᤵᤑᤧ᤺ᤶᤒᤠ ᤆᤥᤃᤢᤒᤠ ᤜᤥᤵᤗᤥ॥ 31 ᤔᤏᤠ ᤁᤧᤜᤡᤵᤐᤠ ᤁᤧᤎᤰᤐᤠ ᤕᤠᤵᤔᤡᤴ ᤏᤠᤔᤧᤜᤧᤳᤋᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤳᤋᤡᤴ ᤁᤢᤗᤠᤶᤔᤡᤴᤏᤠᤱ ᤔᤧᤛᤣᤃᤧᤴᤏᤧ᤹ᤀᤥ॥ 32 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤃᤧᤗᤧᤰᤐᤠ ᤔᤏᤠᤴ ᤁᤢᤛᤡᤰᤗᤧ᤺ᤱᤗᤥ. ᤁᤖ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤁᤢᤏᤛᤠ᤺ᤴᤛᤠᤔᤥ ᤁᤳᤋᤢᤛᤡᤖᤥ॥ 33 ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤔᤢᤖᤠ ᤁᤢᤔᤠᤱᤍᤣᤴ ᤌᤠᤖᤥ ᤁᤖ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤶᤔᤥ ᤂᤢᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢ ᤐᤡᤖᤢᤛᤡᤖᤥ॥ 34 ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤔᤏᤠᤜᤠ᤹ ᤂᤢᤏᤧ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡᤖᤥ. ᤁᤖ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 35 ᤛᤡᤰᤁᤢᤶᤏᤡᤒᤠ ᤔᤏᤠᤜᤠ᤹ᤖᤧ ᤔᤡᤱᤛᤥᤀᤡᤱᤎᤠ᤺ᤱ ᤔᤧᤄᤥᤛᤢᤖᤥ. ᤁᤖ ᤕᤠᤰᤋᤢᤵᤐᤠ ᤀᤍᤱᤜᤠ᤹ ᤂᤢᤏᤧ᤹ ᤛᤡᤖᤡᤱᤔᤔᤥ ᤌᤠᤛᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.