ᤂᤠᤜᤢᤴ 1 - LIFOTNTᤂᤠᤜᤢᤴᤜᤠ᤹ᤖᤧ ᤁᤢᤍᤠᤖᤵ 1 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ. ᤀᤡᤛᤪᤠᤀᤡᤗᤒᤠ ᤜᤠᤱ ᤛᤥᤗᤥᤔᤏᤖᤧ ᤁᤢᤄᤠᤜᤢᤴᤜᤠ᤹ 2 ᤁᤴᤜᤠ᤹ᤗᤠᤶᤒᤠ ᤔᤏᤠᤜᤠ᤹ᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤜᤧᤴᤌᤡᤶ ᤔᤧᤄᤥᤛᤢᤖᤥ ᤁᤢᤒᤣ ᤜᤶᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥ 3 ᤂᤠᤜᤢᤴᤜᤠ᤹ᤖᤧ ᤜᤡᤱᤔᤴᤏᤥ ᤀᤠᤓᤣᤗ᤹ᤖᤡᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤏᤢ ᤘᤠ᤹ᤔᤠ. ᤛᤧᤰᤂᤠᤒᤠ. ᤏᤡᤛ᤻ᤛᤣᤒᤠ. ᤁᤧᤘᤠ᤹ᤒᤠ ᤂᤠᤛᤧᤴ ᤁᤧᤗᤥ᤺ᤶᤒᤠ ᤏᤢ ᤁᤢᤍᤥ᤺ᤵᤔᤠ ᤐᤥᤱᤔᤠ ᤀᤠᤜᤢ᤹ᤖᤥ॥ 4 ᤁᤴᤜᤠ᤹ᤗᤠᤶᤒᤠ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠᤜᤠ᤹ ᤂᤠᤛᤡᤱ ᤁᤧᤏᤡ᤺ᤵᤐᤠ ᤔᤧᤒᤥᤱᤗᤥ. ᤌᤠᤱᤒᤧᤴᤜᤠ᤹ᤖᤧ ᤏᤧᤜᤡᤏᤡᤱᤘᤠ᤹ ᤏᤢ ᤀᤡ᤺ᤳᤇᤡᤱᤛᤠᤶ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ 5 ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤔᤧᤄᤧᤵᤛᤢᤖᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤜᤡᤏᤡᤱᤘᤠ᤹ ᤐᤥᤖᤖᤥ. ᤀᤡ᤺ᤳᤇᤡᤱᤛᤠᤶ ᤁᤧᤃᤵᤐᤠᤜᤠ᤹ᤖᤧ ᤗᤠᤶᤗᤥᤔᤠ ᤏᤧᤜᤡᤏᤡᤱᤘᤠ᤹ ᤔᤧᤄᤥᤛᤢᤖᤖᤥ. 6 ᤂᤠᤜᤢᤴᤜᤠ᤹ ᤏᤢ ᤂᤧᤍᤠ᤹ᤜᤠ᤹. ᤛᤡᤰᤁᤢᤶᤛᤠᤒᤧᤸᤗᤧ ᤁᤢᤀᤢᤘᤠᤜᤠ᤹ ᤜᤧᤰᤁᤩᤠᤱ ᤛᤡᤒᤡ᤹ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥ 7 ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤧᤴᤏᤣ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤁᤢᤜᤣ᤺ᤰᤛᤡᤱᤔᤠᤖᤥ. ᤁᤖ ᤀᤍᤱᤜᤠ᤹ᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤏᤢ ᤜᤧᤴᤌᤡᤶᤔᤧᤴ ᤜᤏᤧᤒᤠ ᤔᤧᤗᤣ᤺ᤳᤋᤢᤖᤥ॥ ᤁᤢᤜᤣ᤺ᤰᤛᤡᤱᤔᤠ—ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤥᤔᤠ ᤂᤠᤜᤢᤴ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤀᤠᤶᤀᤢ᤺ᤵᤐᤠᤍᤧᤴᤏᤥ ᤐᤣ᤺ᤰᤔᤠ ᤔᤣ᤺ᤴ ᤁᤧᤗ᤹ᤒᤠ ᤛᤠᤶᤍᤡᤱ 8 ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤀᤡᤱᤈᤠᤱᤅᤡᤴ ᤂᤧᤵᤛᤧ᤹ᤀᤥ ᤜᤧᤰᤁᤩᤠᤱ ᤁᤧᤶᤔᤠᤖᤧ ᤁᤧᤜᤢ᤹ᤒᤠ ᤏᤡᤛᤠᤶᤔᤡᤴ ᤔᤧᤗᤧᤖᤧᤴᤏᤧ᤹ᤀᤥ॥ 9 ᤂᤧᤱᤜᤠ᤹ ᤂᤧᤏᤧ᤹ ᤁᤧᤎᤧᤃᤣ᤺ᤰᤐᤥ ᤁᤧᤄᤧᤶᤛᤡᤱᤔᤠ ᤋᤡᤆ᤺ᤴ ᤏᤢ ᤁᤧᤏᤡᤃᤡ᤺ᤱᤔᤠ ᤛᤡᤳᤗᤠᤀᤥ ᤔᤡᤱᤛᤥ ᤀᤡᤱᤎᤠᤱᤒᤠ ᤁᤠᤴᤎᤡ ᤜᤧᤰᤋᤱᤒᤠ ᤐᤥᤱᤗᤥ॥ 10 ᤀᤠᤛ᤻ᤛᤠᤀᤣ. ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤜᤢᤔᤠ ᤐᤱᤔᤠ ᤁᤧᤶᤃᤥᤳᤏᤧᤓᤠᤃᤪ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤶᤔᤠ ᤛᤢ᤺ᤶᤔᤠ ᤐᤠ᤺ᤴᤏᤥ ᤔᤧᤒᤳᤇᤧᤴᤏᤥ॥ 11 ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤰᤂᤣ ᤁᤧᤶᤔᤧᤵᤐᤡᤗᤠ. “ᤀᤠᤏᤡᤃᤧᤏᤢ ᤑᤧᤖᤧ᤹ᤀᤥ. ᤁᤢᤓᤠ ᤔᤏᤠᤴ ᤁᤢᤔᤠᤰᤂᤡ᤹ ᤛᤧᤔᤠᤖᤧ ᤗᤠᤃᤡ ᤜᤠᤱᤛᤢᤶᤔᤠᤱ ᤕᤢᤅᤡᤖᤥ. ᤁᤢᤓᤠ ᤁᤢᤍᤥ᤺ᤵᤔᤠ ᤔᤏᤠᤴ ᤏᤠᤵᤔᤠᤖᤧ ᤗᤠᤃᤡ ᤛᤢᤃᤢᤶᤔᤠᤱ ᤕᤢᤅᤡᤖᤥ᥄ 12 ᤂᤧᤔᤠᤕᤱᤛᤱᤅᤡᤸᤗᤧ ᤁᤢᤶᤒᤪᤠᤴ ᤜᤴᤍᤢᤀᤠᤱ ᤂᤧᤴᤜᤠ᤹ ᤁᤢᤜᤡᤱᤘᤧᤳ ᤗᤖᤢᤛᤡᤒᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤗᤢᤶᤒᤠ᤺ᤳᤋᤥ ᤁᤧᤎᤠᤒᤠᤀᤠᤱ ᤁᤢᤒᤢᤱᤅᤥ ᤁᤧᤃᤧᤵᤐᤠᤜᤠ᤹ ᤁᤢᤀᤡᤛᤡᤰ. ᤂᤧᤱᤜᤠ᤹ ᤁᤧᤖᤧᤰ ᤀᤠᤏᤡ᤹ ᤁᤢᤜᤡᤱᤘᤧᤳ ᤗᤖᤢᤶᤍᤣᤛᤢᤶᤛᤡᤶᤗᤥ॥ 13 ᤁᤧᤖᤧᤰ ᤐᤖᤡᤰᤐᤠ ᤛᤠᤔᤠᤐᤢᤔᤠᤜᤠ᤹ ᤀᤠᤏᤡ᤹ ᤀᤠᤔᤧᤳᤇᤡᤱᤗᤥ. ᤜᤧᤰᤁᤩᤠᤱ ᤏᤠᤵᤔᤏᤠᤛᤡᤒᤠ ᤆᤡᤃᤰᤘᤠᤜᤠ᤹ᤖᤧ ᤀᤠᤏᤡ᤹ ᤜᤡᤶᤜᤠ᤹ ᤀᤠᤎᤡᤶᤛᤢᤶᤗᤥ॥ 14 ᤂᤧᤏᤧ᤹ ᤀᤠᤏᤡᤃᤧᤏᤢ ᤛᤥᤖᤡᤰ ᤗᤰᤁᤧᤄᤥᤒᤠ ᤐᤥ᤺ᤰᤂᤧ᤹ᤀᤥ. ᤜᤧᤰᤁᤩᤠᤱ ᤀᤠᤏᤡ᤹ ᤏᤠᤵᤔᤏᤠᤛᤡᤒᤠ ᤛᤢᤰᤘᤠᤀᤥᤗᤠᤶ ᤀᤠᤜᤠ᤺ᤳᤋᤠᤛᤡᤖᤥ॥” 15 ᤀᤠᤒᤢᤃᤧᤴ ᤀᤠᤛ᤻ᤛᤠᤀᤣ. ᤜᤧᤰᤋᤱᤒᤠ ᤔᤏᤠᤜᤠ᤹ᤏᤢ ᤔᤧᤒᤣᤃᤧᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤔᤥ ᤗᤠᤱᤍᤠᤵᤐᤣ᤹ᤀᤣ ᤔᤧᤎᤠᤛᤧᤴᤏᤧ᤹ᤀᤥ॥ 16 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤍᤠᤵᤐᤣᤴ ᤗᤠᤕᤥ ᤆᤥ᤺ᤰᤔᤠ ᤆᤠᤳᤋᤢᤖᤥ. ᤂᤧᤱᤜᤠ᤹ ᤔᤠᤰᤂᤡ᤹ ᤛᤧᤔᤠᤖᤧ ᤗᤠᤃᤡ ᤂᤠ ᤕᤠᤖᤡᤵ ᤔᤧᤒᤥᤱᤗᤥ॥ 17 ᤁᤧᤖᤧᤰ ᤐᤢᤜᤠ᤹ᤖᤧ ᤔᤧᤏᤡᤛᤢᤖᤀᤣ ᤀᤡᤕᤢᤰᤔᤠᤛᤡᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤌᤣᤏᤠᤎᤣᤖᤰ ᤐᤥᤱᤗᤥ॥ 18 ᤁᤴ ᤔᤏᤠᤜᤠ᤹ᤖᤧ ᤀᤠᤒᤠᤅᤣ ᤔᤠᤰᤂᤡᤴ ᤛᤧᤔᤠᤖᤧ ᤗᤠᤃᤡ ᤔᤧᤛᤢᤃᤢᤀᤠᤱ ᤔᤧᤕᤢᤱᤗᤥ. ᤂᤧᤱᤜᤠ᤹ ᤀᤡᤈᤥᤀᤥ ᤀᤠᤵᤑᤣᤰ ᤌᤠᤔᤠᤖᤧ ᤗᤠᤃᤡ ᤔᤧᤃᤥᤛᤢᤀᤠᤱ ᤔᤧᤕᤢᤱᤗᤥ᥄ 19 ᤔᤧᤴᤘᤠ᤹ᤔᤏᤠᤒᤠ ᤕᤠ᤺ᤶᤒᤰᤗᤠᤶ ᤕᤠᤱ ᤌᤰᤔᤠ ᤗᤧᤵᤔᤠᤱ ᤁᤧᤗᤠ᤺ᤵᤐᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤢᤵᤔᤧᤴ ᤁᤴ ᤐᤖᤡᤰᤗᤧᤀᤣ ᤐᤥᤱᤗᤥ. ᤁᤶᤓᤗ᤹ᤖᤡᤰ ᤕᤠᤱᤛᤠᤁᤢᤴᤎᤣ ᤁᤧᤎᤰᤐᤧᤸᤗᤧ ᤁᤢᤜᤡᤱᤔᤧᤴ ᤁᤸᤗᤧᤀᤣ ᤐᤰᤂᤢ ᤋᤣ᤹ᤖᤢᤖᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤶᤛᤧ ᤀᤢ᤺ᤳᤋᤢᤛᤡ᤹ 20 ᤔᤠᤖᤠᤶᤜᤠ᤹ᤀᤥ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗᤥ. ᤂᤧᤸᤗᤧ ᤗᤠᤶᤍᤥᤜᤠ᤹ᤀᤥ ᤕᤶᤒᤕᤶᤒᤠ ᤀᤡᤰᤗᤠ ᤗ᤺ᤳᤋᤢᤖᤥ. 21 ᤜᤕᤱ ᤁᤡᤸᤗᤡᤱ ᤀᤡᤛᤣ᤺ᤱᤒᤠ ᤔᤠᤖᤠᤶᤜᤠ᤹ᤀᤥᤒᤠ ᤗᤢᤱᤎᤠᤰᤜᤠ᤹ᤀᤥᤗᤠᤶ ᤂᤧᤴ ᤕᤶᤒᤠ ᤀᤡᤰᤗᤠᤀᤥ ᤛᤠ᤹ᤖᤡᤰ ᤀ᤺ᤰᤗᤥ. ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤀᤥ ᤂᤧᤸᤗᤧ ᤁᤶᤓᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ— 22 “ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠᤛᤣ. ᤀᤠᤓᤧᤸᤗᤧ ᤌᤠᤖᤡᤰ ᤂᤡᤏᤡ᤹ ᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤗᤠᤶᤔᤧᤴ ᤗᤢᤱᤔᤠ᤹ ᤁᤧᤍᤢᤰᤋᤢᤶᤒᤠᤒᤣ᥅ ᤀᤠᤓᤧᤸᤗᤧ ᤌᤠᤖᤡᤰ ᤁᤢᤏᤠᤔᤧᤴᤇᤠ᤹ ᤁᤧᤒᤠ᤺ᤵᤐᤠᤜᤠ᤹ᤖᤧ ᤏᤠᤔᤧᤴᤇᤠᤴ ᤐᤠ᤺ᤵᤔᤠᤀᤥ ᤔᤧᤛ᤺ᤵᤐᤠᤒᤣ᥅ ᤜᤧᤰᤁᤩᤠᤱ ᤀᤍᤱᤜᤠ᤹ᤖᤧ ᤏᤧᤜᤡᤏᤡᤱᤘᤠᤴ ᤔᤧᤈᤡ᤺ᤳᤋᤢᤖ ᤔᤧᤘᤠ᤹ᤒᤠᤒᤣ᥅ 23 ᤀᤠᤱᤃᤠ᤹ ᤂᤡᤏᤡ᤹ ᤑᤧ᤺ᤰᤏᤡᤱᤒᤠ ᤐᤠ᤺ᤴᤏᤡᤴ ᤁᤧᤄᤧᤵᤛᤢᤶᤏᤧᤓᤃᤪ. ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤥᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤏᤡᤱᤗᤥ. ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤕᤠ᤺ᤴᤏᤡᤱᤗᤥ॥ 24 ᤁᤖ ᤀᤠᤱᤃᤠ᤹ ᤀᤡᤱᤓᤥ᤺ᤴᤏᤡᤱᤅᤡᤸᤗᤧ ᤂᤧᤶᤔᤠ ᤁᤧᤴᤍᤧᤴᤍᤡᤴᤒᤧᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤢᤰᤜᤠ᤹ ᤜᤵᤑᤧ ᤔᤧᤳᤋᤢᤱᤅᤡᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤏᤡ ᤂᤧᤶᤄᤧᤶ ᤁᤧᤴᤗᤠᤵᤋᤢᤶᤔᤡᤴᤒᤧᤸᤗᤧ ᤆᤥᤃᤢᤸᤗᤧ. 25 ᤀᤠᤛᤢᤈᤠᤜᤠ᤹ ᤁᤧᤖᤧᤰ ᤏᤡᤏᤡ ᤂᤧᤶᤄᤧᤶ ᤁᤧᤴᤗᤠᤵᤋᤢᤶᤔᤡᤴᤒᤧᤸᤗᤧ ᤆᤥᤃᤢᤸᤗᤧ ᤜᤶᤓᤩᤠᤱ ᤀᤠᤱᤃᤠ᤹ ᤑᤧ᤺ᤰᤏᤡᤱᤒᤠᤴ ᤁᤧᤱᤄᤧᤵᤛᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ. 26 ᤂᤡᤏᤡ᤹ ᤋᤢᤰᤂᤣᤗᤠᤰᤂᤣᤀᤥ ᤁᤧᤎᤩᤧ᤹ᤀᤡᤸᤗᤧ ᤀᤠᤱᤃᤠ᤹ ᤀᤣ᤺ᤳᤋᤠᤖᤥ. ᤕᤧᤋᤢᤰᤂᤣ ᤁᤧᤍᤢᤔᤡᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤏᤡᤱᤗᤥ— 27 ᤛᤢᤖᤡᤳ ᤁᤣᤈᤱ ᤁᤢᤀᤡᤛᤡᤰ ᤋᤢᤰᤂᤣ ᤗᤠᤰᤂᤣᤜᤠ᤹ᤖᤧ ᤂᤡᤏᤡ᤹ ᤁᤧᤍᤧᤳᤋᤡᤸᤗᤧ. ᤁᤧᤀᤡᤰᤛᤡᤱᤒᤠ ᤛᤠᤶᤔᤡ᤺ᤳ ᤜᤧᤰᤁᤣ ᤕᤧᤳᤋᤢᤰᤂᤣᤴ ᤂᤡᤏᤡ᤹ᤀᤥ ᤀᤡᤍᤠ᤺ᤸᤗᤧ. ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣ ᤏᤢ ᤗᤠᤰᤂᤣᤀᤥ ᤂᤡᤏᤡ᤹ ᤁᤧᤎᤩᤧ᤹ᤀᤡᤖᤥ॥ 28 “ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤐᤣᤗᤡ ᤔᤧᤓᤠᤰᤁᤠᤖᤥ. ᤁᤖ ᤂᤧᤱᤜᤠ᤹ ᤀᤠᤱᤃᤠ᤹ ᤏᤢᤃᤵ ᤔᤧᤒᤡᤖᤢᤱᤛᤡᤱᤅᤡᤴᤗᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤃᤥ᤺ᤳᤋᤠ ᤁᤖ ᤀᤠᤱᤃᤠ᤹ ᤔᤧᤱᤄᤥᤀᤠᤴᤗᤥ॥ 29 ᤂᤧᤱᤜᤠ᤹ᤖᤧ ᤏᤧᤜᤡ ᤏᤡᤱᤘᤠᤴ ᤔᤧᤈᤡ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤁᤡᤵᤔᤠ ᤔᤧᤴᤍᤧᤴᤍᤧᤴᤒᤠᤸᤗᤧ ᤆᤥᤃᤢᤸᤗᤧ. 30 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤢᤈᤠᤜᤠ᤹ ᤂᤧᤶᤔᤠ ᤔᤧᤴᤍᤧᤴᤍᤧᤴᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤑᤧ᤺ᤰᤋᤢᤱᤛᤡᤱᤒᤧᤴ ᤂᤧᤶᤔᤠ ᤔᤧᤴᤍᤧᤴᤍᤧᤴᤒᤠᤸᤗᤧ ᤆᤥᤃᤢᤸᤗᤧ. 31 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤁᤡᤸᤗᤧ ᤁᤢᤗᤧᤰᤘᤠ ᤔᤧᤍᤢᤔᤢᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤡᤱᤗᤧᤰᤐᤠ ᤏᤡᤱᤛᤣ᤺ᤰᤁᤧᤸᤗᤧ ᤀᤠᤵᤑᤣᤰ ᤋᤧᤳᤋᤢᤛᤡᤖᤥ॥ 32 ᤀᤠᤵᤑᤣᤰ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ. ᤏᤡᤱᤘᤠ᤹ ᤁᤧᤒᤠ᤺ᤰᤐᤠᤜᤠ᤹ ᤜᤍ᤹ ᤔᤧᤛᤡᤖᤥ. ᤂᤴᤏᤠᤱ ᤀᤍᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤕᤠ᤺ᤴᤍᤡᤰ ᤋᤠᤔᤠᤖᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤧᤰᤔᤠᤛᤡᤔᤧᤴ ᤋᤠᤖᤥ॥ 33 ᤁᤖ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤴᤜᤠ᤹ᤖᤧ ᤔᤧᤄᤧᤵᤛᤢ᤹ ᤂᤧᤱᤜᤠ᤹ ᤌᤣᤀᤠᤱ ᤔᤧᤸᤗ᤹ᤀᤣ ᤋᤠᤵᤌᤣᤰ ᤕᤠᤶᤎᤣᤰᤁᤥ ᤔᤧᤜᤡᤱᤗᤥ. ᤜᤧᤰᤁᤩᤠᤱ ᤜᤠᤴᤋᤡ ᤔᤧᤶᤒᤥᤱᤅᤣ ᤔᤧᤱᤃᤡᤀᤣ ᤜᤠᤱᤜᤠᤱᤅᤠᤱ ᤔᤧᤘᤠ᤹ᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.