ᤑᤡᤗᤣᤔᤥᤏ 1 - LIFOTNT

ᤐᤠᤘᤗᤖᤧ ᤁᤢᤛᤧᤘᤠ

^1-2 ᤀᤠᤴᤇᤡᤃᤣ ᤔᤡ᤺ᤶ ᤆᤢᤶ ᤏᤢ ᤛᤥᤛᤥᤖᤡᤰ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤑᤡᤗᤣᤔᤥᤏ. ᤀᤠᤏᤡ᤹ ᤏᤛᤠᤏᤡᤔᤠ ᤏᤢᤛᤠ᤹ ᤀᤵᤑᤡᤕᤠ. ᤀᤠᤴᤇᤡᤃᤧᤏᤢ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤀᤷᤂᤡᤐᤛ ᤜᤧᤰᤁᤩᤠᤱ ᤁᤧᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤛᤣ. ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧᤛᤢᤱᤅᤡᤸᤗᤧ ᤐᤢᤱᤗᤠᤎᤠᤒᤠ ᤁᤧᤒᤥᤱᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤖᤥ॥

³ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤂᤡᤏᤡ᤹ ᤁᤧᤒᤡᤖᤡᤖ॥

ᤑᤡᤗᤣᤔᤥᤏᤖᤧ ᤁᤢᤗᤠᤃᤡ ᤐᤠᤘᤗᤖᤧ ᤆᤥᤃᤢᤒᤠ ᤋᤢᤘᤠ

⁴ ᤀᤠᤴᤛᤠ᤹ ᤑᤡᤗᤣᤔᤥᤴᤏᤣ. ᤂᤧᤏᤧ᤹ ᤁᤧᤗᤠᤃᤡ ᤋᤢᤘᤠ ᤆᤥ᤺ᤰᤁᤠᤸᤗᤧ ᤀᤡᤱᤃᤠ᤹ ᤛᤧᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤢᤱᤗᤥ.

⁵ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤧᤈᤥᤃᤢᤒᤠ ᤁᤧᤎᤢᤶᤒᤠ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤛᤣᤛᤣ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤀᤠᤖᤥ॥

⁶ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤴ ᤘᤣ᤹ᤜᤠ᤹ ᤁᤧᤈᤧᤰᤋᤢᤛᤡᤸᤗᤧ ᤂᤪᤡᤛ᤻ᤋᤖᤧ ᤀᤠᤒᤡᤖᤧᤒᤠ ᤁᤠᤰ ᤔᤢ᤹ᤀᤡᤛᤠᤶᤜᤠ᤹ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥

⁷ ᤀᤠᤴᤛᤠ᤹ᤀᤣ. ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱ ᤜᤧᤰᤁᤩᤠᤱ ᤀᤠ᤺ᤴᤇᤡᤱᤔᤠ ᤂᤥᤛᤢᤱᤅᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ ᤜᤠᤱᤜᤠᤱ ᤁᤧᤈᤥᤃᤢᤛᤡᤀᤠᤱ ᤁᤧᤘᤠ᤹ᤖᤥ॥

ᤀᤥᤏᤧᤛᤡᤔᤛᤖᤧ ᤁᤢᤗᤠᤃᤡ ᤐᤠᤘᤗᤖᤧ ᤁᤢᤒᤣᤗᤡ

⁸ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤀᤥ ᤁᤧᤘᤠ᤹ᤒᤠ ᤀᤠᤕᤢᤰᤗᤠᤶ ᤂᤧᤏᤧ᤹ ᤌᤧᤔᤠ ᤆᤥ᤺ᤰᤔᤠ ᤐᤥᤱ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤔᤠ ᤛᤢᤰᤏᤧᤛᤠᤱ.

⁹ ᤀᤡᤱᤃᤠ᤹ ᤂᤍᤠᤰᤔᤡ ᤐᤠᤘᤗ. ᤀᤠᤸᤗᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤒᤢᤱᤗᤠᤌᤠᤒᤠ ᤁᤧᤒᤥᤱᤒᤠᤸᤗᤧ. ᤀᤠᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤐᤣᤗᤡ ᤑᤠᤰᤏᤧ᤹ᤖᤥ॥

¹⁰ ᤀᤥᤏᤧᤛᤡᤔᤛᤧᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤏᤧ᤹ ᤐᤣᤗᤡ ᤑᤠᤰᤏᤧ᤹ᤖᤥ॥ ᤂᤢᤏᤧ᤹ᤃ ᤐᤢᤱᤗᤠᤜᤡᤶᤔᤥ ᤕᤠᤃᤠᤱᤅᤡᤸᤗᤧᤀᤣ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤏᤥ ᤋᤠᤖᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤛ᤻ᤛᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

¹¹ ᤀᤢᤴᤇᤥᤴ ᤀᤥᤏᤧᤛᤡᤔᤛᤧᤱᤃ ᤂᤧᤏᤧ᤹ ᤁᤧᤗᤠᤃᤡ ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤒᤡᤔᤏᤠᤒᤠ ᤘᤕᤧ. ᤁᤖ ᤀᤠᤸᤗᤃ ᤀᤠᤴᤇᤡ᤹ ᤏᤧᤵᤔᤠᤱᤗᤧ ᤗᤠᤃᤡ ᤕᤠ᤺ᤶᤒᤰ ᤁᤧᤒᤡᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

¹² ᤀᤡᤱᤃᤠ᤹ ᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤔᤏᤠᤴ ᤂᤧᤏᤧ᤹ᤀᤥ ᤕᤠᤱᤏᤠ ᤐᤠᤱᤄᤢᤱᤅᤠᤱ ᤘᤠ᤹ᤀᤠᤖᤥ॥

¹³ ᤛᤧᤰᤂᤠ᤺ᤸᤗᤧ ᤂᤢᤏᤧ᤹ᤃ ᤀᤡᤱᤃᤠ᤹ ᤁᤵᤔᤠ ᤀᤠᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤛᤢᤏᤠᤀᤡᤱ ᤛᤧᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤠᤱᤅᤠᤱ ᤕᤠᤰᤁᤠᤸᤗᤧ ᤂᤧᤏᤧ᤹ ᤁᤧᤗᤧᤰᤘᤠ ᤂᤢᤏᤧ᤹ ᤑᤠ᤹ᤔᤠ ᤛᤢᤰᤋᤠᤱᤒᤠᤖᤥ॥

¹⁴ ᤁᤖ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤢᤒᤠ ᤕᤠ᤺ᤶᤒᤰᤁᤡᤴ ᤛᤠᤰᤁᤧᤸᤗᤧᤰᤁᤠᤱ ᤔᤣ᤺ᤴ. ᤁᤖ ᤀᤠᤒᤠᤅᤣ ᤁᤧᤏᤡᤱᤘᤠ᤹ᤗᤠᤶᤒᤠ ᤐᤥᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤴ ᤐᤠ᤺ᤴᤏᤥ ᤁᤧᤏᤡᤱᤘᤠ᤹ ᤔᤣ᤺ᤴᤏᤣ ᤀᤡᤱᤃᤠ᤹ ᤌᤣᤀᤠᤱ ᤆᤥ᤺ᤰᤔᤠ ᤀᤠᤏᤡᤱᤘᤠ᤹ ᤜᤥᤵᤗᤥ॥

¹⁵ ᤂᤢᤏᤧ᤹ᤃ ᤛᤍᤠᤍᤡᤱᤗᤧ ᤗᤠᤃᤡ ᤂᤧᤏᤧ᤹ᤀᤥ ᤕᤠᤶᤔᤥ ᤏᤢ᤺ᤱᤔᤠ ᤋᤠᤔᤠ ᤑᤠ᤹ᤀᤠᤱᤏᤧ ᤛᤵᤑᤠᤖᤧ ᤗᤠᤃᤡ ᤂᤧᤏᤧ᤹ᤏᤢ ᤛᤧᤴᤍᤧᤒᤠᤖᤧᤳᤇ᥄

¹⁶ ᤀᤠᤸᤗ ᤂᤢᤏᤧ᤹ᤃ ᤕᤥ᤺ᤰᤐᤠ ᤜᤧᤰᤁᤣ ᤔᤣ᤺ᤴᤗᤥ. ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤏᤡ᤹ ᤏᤛᤠᤏᤡᤒᤠ ᤏᤢᤛᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤒᤠᤴᤏᤢ᤺ᤸᤗᤧᤀᤠᤱ ᤂᤧᤏᤧ᤹ ᤏᤠᤛᤡᤱᤃᤧᤴ ᤌᤰᤁᤥ ᤏᤢ ᤍᤠᤱᤒᤠᤀᤥ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢᤒᤠ ᤏᤢᤛᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

¹⁷ ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤀᤡᤱᤃᤠ᤹ ᤀᤠᤒᤠᤅᤣ ᤁᤧᤴᤈᤢᤶ ᤁᤧᤀᤡ᤺ᤳᤋᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤋᤠᤀᤠᤸᤗᤧ ᤗᤠᤶᤍᤠ᤺ᤰᤔᤠ ᤁᤧᤒᤡᤀᤠᤒᤠ ᤁᤢᤀᤡᤛᤡ᤺ᤰᤁᤣ ᤂᤢᤏᤧ᤹ᤀᤠᤱ ᤗᤠᤶᤍᤠ᤺ᤰᤔᤠ ᤐᤡᤖᤧ᤹ᤀᤥ॥

¹⁸ ᤂᤧᤸᤗᤧ ᤐᤠᤴ ᤑᤣ᤺ᤴᤍᤢ ᤁᤧᤒᤡᤖᤧᤀᤠᤱ ᤘᤠ᤹ ᤀᤡᤃᤪ ᤂᤧᤏᤧ᤹ ᤁᤧᤛᤡᤱᤏᤠᤳ ᤜᤢᤱᤔᤠ ᤁᤳᤋᤢ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤔᤡᤱᤅᤥ ᤛᤠᤵᤋᤧ ᤕᤢᤰᤂᤧ᤹ᤀᤥ॥

¹⁹ ᤀᤡᤱᤃᤠ᤹ ᤐᤠᤘᤗᤖᤧ ᤜᤢᤅᤢᤱ ᤐᤡᤏᤧ ᤑᤠ᤹ᤀᤠᤱ ᤀᤠᤵᤑᤣᤰ ᤀᤠᤜᤢᤰᤁᤡᤸᤗᤧ ᤁᤴ ᤛᤠᤵᤋᤢᤱᤗ ᤐᤳᤋᤠᤖᤥ॥ ᤂᤧᤏᤧ᤹ ᤀᤠᤒᤠᤅᤣᤀᤠᤱ ᤂᤪᤡᤛ᤻ᤋᤀᤥ ᤁᤢᤛᤱ ᤜᤡᤱᤔᤴ ᤀᤡᤱᤃᤠ᤹ᤗᤠᤶᤒᤠ ᤁᤧᤄᤥᤛᤢ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤴᤏᤧ᤹ᤀᤥ॥

²⁰ ᤀᤠᤴᤛᤠ᤹ᤀᤣ. ᤍᤠᤱᤒᤠᤀᤥ ᤂᤢᤏᤧ᤹ ᤗᤠᤱᤍᤠ᤺ᤰᤋᤠᤱ ᤐᤡᤖᤠᤱᤅᤧ᤹. ᤜᤧᤰᤁᤣᤗ᤹ᤖᤡᤰ ᤂᤪᤡᤛ᤻ᤋᤀᤥ ᤀᤡᤱᤃᤠ᤹ ᤜᤠᤱᤜᤠᤱ ᤔᤧᤳᤋᤠᤱᤅᤧ᤹ᤀᤥ॥

²¹ ᤀᤡᤱᤃᤠ᤹ ᤛᤠᤵᤋᤢᤱᤗ ᤐᤳᤋᤠᤸᤗᤧᤛᤠ ᤐᤣᤗᤡ ᤑᤠᤰᤏᤧᤒᤠᤴ ᤏᤡᤛ᤻ᤛᤣ ᤁᤧᤈᤥᤃᤢ᤹. ᤜᤧᤰᤁᤩᤠᤱ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤧᤈᤥᤃᤢ᤹ ᤑᤠ᤹ᤀᤠᤱ ᤏᤡᤛᤢᤱᤗᤥ॥

²² ᤜᤧᤰᤁᤩᤠᤱ ᤗᤳᤇᤠ ᤐᤠᤴ ᤘᤠ᤹—ᤀᤡᤱᤃᤠ᤹ ᤀᤠᤕᤢᤱᤔᤠᤖᤧ ᤗᤠᤃᤡ ᤕᤠᤰᤑᤠᤎᤡᤰ ᤕᤠᤖᤡᤵ ᤆᤥᤃᤠᤱ ᤐᤡᤖᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤁᤧᤈᤥᤃᤢᤒᤠ ᤋᤢᤘᤠ᤺ᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ᤀᤥ ᤏᤢ᤺ᤱᤅᤠ ᤋᤠᤀᤠᤒᤡ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥

ᤁᤢᤏᤢᤵᤔᤠ ᤛᤧᤘᤠ

²³ ᤂᤪᤡᤛ᤻ᤋ ᤕᤧᤛᤢᤀᤥ ᤀᤡᤱᤃᤠ᤹ᤏᤢ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠ ᤀᤡᤐᤠᤑᤪᤠᤛᤖᤧ ᤂᤧᤏᤧ᤹ ᤛᤧᤘᤠ ᤁᤧᤜᤠᤰᤋᤧᤀᤠᤱ ᤘᤠ᤹ᤖᤥ॥

²⁴ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ᤏᤢ ᤛᤥᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤷᤁᤢᤛ. ᤀᤖᤡᤛ᤻ᤋᤠᤷᤂᤛ. ᤍᤣᤔᤠᤛ ᤏᤢ ᤗᤢᤁᤠᤖᤧᤀᤠᤱ ᤛᤧᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥

²⁵ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥